चिमूरमधील वर्षभरापासून बेपत्ता असलेल्या अल्पवयीन बालिकेचा शोध; नागपूरमधून सुखरूप सुटका

चंद्रपूर: Chimur Missing Girl Found प्रकरणात चंद्रपूर पोलिसांच्या ‘ऑपरेशन शोध-4’ मोहिमेला मोठे यश मिळाले आहे. वर्षभरापासून बेपत्ता असलेल्या चिमूरमधील अल्पवयीन बालिकेचा शोध नागपूर जिल्ह्यातील कामठी तालुक्यात लागला. एलसीबी, एएचटीयू आणि सायबर सेलच्या संयुक्त कारवाईत आरोपीला अटक करण्यात आली असून बालिकेची सुखरूप सुटका करण्यात आली आहे. (एलसीबी ची धडक कारवाई, सुगंधित तंबाखू कारखान्यावर धाड)

जिल्हा पोलीस दलाच्या स्थानिक गुन्हे शाखा (LCB) आणि अनैतिक मानवी वाहतूक प्रतिबंधक कक्षाने (AHTU) ‘ऑपरेशन शोध-४’ अंतर्गत एक मोठी आणि कौतुकास्पद कामगिरी बजावली आहे. चिमूर पोलीस स्टेशन अंतर्गत तब्बल एक वर्षापूर्वी पळवून नेण्यात आलेल्या एका अल्पवयीन बालिकेचा आणि तिच्या अपहरणकर्त्याचा छडा लावण्यात पोलिसांना यश आले आहे. पोलिसांनी या प्रकरणी २४ तासांच्या आत नागपूर जिल्ह्यातील कामठी तालुक्यातून आरोपीला बेड्या ठोकत बालिकेची सुखरूप सुटका केली आहे.

Chimur Missing Girl Found प्रकरणात पोलिसांना कसे मिळाले यश?

मिळालेल्या माहितीनुसार, चिमूर पोलीस ठाण्यात वर्ष २०२५ मध्ये भारतीय न्याय संहितेच्या (BNS) कलम १३७(२) अन्वये एका बालिकेच्या अपहरणाचा गुन्हा (अ.क्र. ४१/२०२५) दाखल करण्यात आला होता. गुन्हा दाखल झाल्यापासून ही बालिका आणि आरोपी पोलिसांना हुलकावणी देत होते. हे प्रकरण दीर्घकाळापासून प्रलंबित असल्याने पोलिसांसमोर एक मोठे आव्हान निर्माण झाले होते. अखेर चंद्रपूर सायबर सेलच्या मदतीने या प्रकरणाचा तांत्रिक तपास सुरू करण्यात आला.

तपासादरम्यान संशयित आरोपीच्या मोबाईल क्रमांकाचे तांत्रिक विश्लेषण करण्यात आले असता, तो मोबाईल क्रमांक नागपूर जिल्ह्यातील कामठी तालुक्यातील मौजा गुंमथळा येथे सुरू असल्याचे निष्पन्न झाले. त्यानंतर पोलिसांनी प्राप्त सीडीआर (Call Detail Record) आणि इतर तांत्रिक माहितीचे सखोल विश्लेषण केले. या तांत्रिक तपासातून पीडित बालिका आणि संशयित आरोपी सरगम केशव बावणे (वय २५ वर्षे, रा. मोटेगाव, ता. चिमूर) हे दोघेही नागपूर परिसरात वास्तव्यास असल्याची खात्रीशीर माहिती पोलिसांना मिळाली.

माहिती मिळताच एलसीबी, एएचटीयू आणि सायबर सेलच्या संयुक्त पथकाने तात्काळ नागपूरकडे कूच केली. पथकाने अतिशय नियोजनबद्ध रीतीने धाड टाकून १५ जून २०२६ रोजी मौजा गुंमथळा (ता. कामठी, जि. नागपूर) येथून आरोपी सरगम बावणे आणि पीडित बालिकेला ताब्यात घेतले. या यशस्वी कारवाईनंतर पुढील कायदेशीर प्रक्रिया आणि तपासासाठी या दोघांनाही चिमूर पोलिसांच्या स्वाधीन करण्यात आले आहे.

दीर्घकाळापासून बेपत्ता असलेल्या बालिकेचा शोध लागल्याने चिमूर परिसरात आणि बालिकेच्या नातेवाईकांमध्ये सुटकेचा श्वास घेतला जात आहे. गुंतागुंतीच्या ठरलेल्या या प्रकरणात चंद्रपूर पोलिसांच्या एलसीबी, एएचटीयू आणि सायबर सेलच्या पथकाने दाखवलेल्या चातुर्य आणि तांत्रिक कौशल्यामुळे ‘ऑपरेशन शोध-४’ ला मोठे यश लाभले असून, पोलीस दलाचे सर्वत्र कौतुक होत आहे.