चंद्रपूर: चंद्रपूर जिल्ह्यातील पांढरकवडा येथील श्री पंचमुखी हनुमान मंदिराला ‘ब’ वर्ग यात्रास्थळाचा अधिकृत दर्जा मिळाला आहे. पुण्यश्लोक अहिल्यादेवी होळकर ग्रामीण यात्रास्थळ योजनेअंतर्गत हा निर्णय घेण्यात आला. आमदार किशोर जोरगेवार यांनी केलेल्या सातत्यपूर्ण पाठपुराव्याला यश आले असून, मंदिर परिसरातील पायाभूत सुविधांच्या विकासाला यामुळे चालना मिळण्याची अपेक्षा आहे.
पंचमुखी हनुमान मंदिराला ‘ब’ वर्ग यात्रास्थळाचा दर्जा
जिल्ह्यातील पांढरकवडा येथील ऐतिहासिक आणि हजारो भाविकांचे श्रद्धास्थान असलेल्या श्री हनुमान मंदिराला ‘पुण्यश्लोक अहिल्यादेवी होळकर ग्रामीण यात्रास्थळ विकास योजने’अंतर्गत ‘ब’ वर्ग यात्रास्थळाचा अधिकृत दर्जा प्राप्त झाला आहे. आमदार किशोर जोरगेवार यांनी याप्रकरणी केलेल्या सातत्यपूर्ण पाठपुराव्याला मोठे यश आले असून, या निर्णयामुळे मंदिर परिसराच्या सर्वांगीण विकासाचा मार्ग मोकळा झाला आहे. (मुलच्या एसटी बस आगाराचा मार्ग मोकळा? १४.९९ कोटींचा प्रस्ताव सादर करण्याचे निर्देश, वाचा सविस्तर)
पांढरकवडा येथील श्री पंचमुखी हनुमान मंदिराला मोठा धार्मिक आणि ऐतिहासिक वारसा लाभला आहे. वर्षभरातील विविध धार्मिक पर्व, उत्सव आणि विशेषतः हनुमान जयंतीनिमित्त येथे पंचक्रोशीतून व दूरवरून येणाऱ्या भाविकांची मोठी गर्दी होते. भाविकांची ही वाढती संख्या लक्षात घेता मंदिर परिसरात आधुनिक व दर्जेदार पायाभूत सुविधा उभारणे काळाची गरज बनले होते. हीच बाब हेरून आमदार किशोर जोरगेवार यांनी मंदिराला शासनाच्या विकास योजनांचा लाभ मिळावा आणि यात्रास्थळाचा अधिकृत दर्जा बहाल व्हावा, यासाठी शासन स्तरावर सातत्याने पाठपुरावा केला.
आता शासनाने मंदिराला ‘ब’ वर्ग यात्रास्थळाचा दर्जा दिल्याने मंदिर परिसराच्या विकासासाठी भरीव शासकीय निधी उपलब्ध होण्याचा मार्ग प्रशस्त झाला आहे. या निधीतून परिसरातील रस्त्यांची सुधारणा, स्वच्छ पिण्याच्या पाण्याची सोय, स्वच्छतागृहे, भक्तनिवास आणि भाविकांसाठीच्या इतर मूलभूत सुविधांची कामे प्राधान्याने मार्गी लावता येणार आहेत. यामुळे दर्शनासाठी येणाऱ्या भाविकांचा प्रवास आणि मुक्काम अधिक सुखकर होणार आहे. (नाव वगळलेल्या मतदारांना पुन्हा संधी, वाचा सविस्तर)
धार्मिक पर्यटनातून ग्रामीण अर्थव्यवस्थेला मिळणार चालना शासनाच्या या निर्णयाचा लाभ केवळ मंदिर आणि भाविकांपुरता मर्यादित राहणार नसून स्थानिक गावाच्या विकासालाही यामुळे मोठी गती मिळणार आहे. यात्रा आणि उत्सवांच्या काळात वाढणारी भाविकांची वर्दळ स्थानिक छोटे व्यावसायिक, फूल-प्रसाद विक्रेते, लघुउद्योजक आणि सेवा पुरवणाऱ्या नागरिकांसाठी रोजगाराच्या नव्या संधी निर्माण करणार आहे. धार्मिक पर्यटनाच्या माध्यमातून परिसरातील ग्रामीण अर्थव्यवस्थेला बळकटी मिळण्यास मदत होणार आहे.
किशोर जोरगेवार यांनी मानले ग्रामविकास मंत्र्यांचे आभार
या महत्त्वपूर्ण आणि लोकोपयोगी निर्णयाबद्दल आमदार किशोर जोरगेवार यांनी राज्याचे ग्रामविकास मंत्री जयकुमार गोरे यांचे आभार मानले आहेत. शासनाने ऐतिहासिक श्री पंचमुखी हनुमान मंदिराला ‘ब’ वर्ग यात्रास्थळाचा दर्जा देऊन लाखो भाविकांच्या श्रद्धेचा यथोचित सन्मान केला असल्याची भावना त्यांनी व्यक्त केली. चंद्रपूर जिल्ह्याला समृद्ध धार्मिक व ऐतिहासिक वारसा लाभला असून, या वारशाचे जतन करण्यासोबतच धार्मिक स्थळांवर दर्जेदार सुविधा निर्माण करून स्थानिक पर्यटनाला चालना देण्यासाठी आपण सदैव कटिबद्ध राहणार असल्याचेही आ. जोरगेवार यांनी स्पष्ट केले.
📢 NEWS34 WhatsApp Channel
ताज्या बातम्या सर्वात आधी मिळवण्यासाठी आमच्या WhatsApp Channel ला Follow करा.
✅ Follow Now






