चंद्रपूर - चंद्रपूर येथील स्थानिक गुन्हे शाखेच्या विशेष पथकाने एका गोपनीय माहितीच्या आधारे अत्यंत यशस्वी आणि धडक कारवाई करत, रामनगर पोलीस स्टेशनच्या हद्दीतील तीन मोठे गुन्हे उघडकीस आणले आहेत. यामध्ये दोन मोटारसायकल चोरी आणि एका घरफोडीच्या गुन्ह्याचा समावेश आहे. या यशस्वी कारवाईदरम्यान पोलीस पथकाने आरोपीकडून एकूण ७०,००० रुपये किमतीचा मुद्देमाल जप्त केला आहे. (घरी आल्यावर बसला चोरीचा धक्का)
अटक करण्यात आलेल्या आरोपीचे नाव गोपाल जीवन मालाकर, वय २६ वर्षे, राहणार शाम नगर, चंद्रपूर असे असून त्याला पुढील कायदेशीर तपासासाठी रामनगर पोलिसांच्या स्वाधीन करण्यात आले आहे. पोलिसांनुसार, आरोपीच्या ताब्यातून दोन हिरो होंडा स्प्लेंडर मोटारसायकल, ज्यांचे क्रमांक एमएच ३४ एएस ५०३५ आणि एमएच ३१ बीजे ३६२८ आहेत, यासह चोरीचे सोन्या-चांदीचे दागिने असा एकूण मुद्देमाल हस्तगत करण्यात आला आहे.
या कारवाईमुळे रामनगर पोलीस ठाण्यात दाखल असलेले तीन महत्त्वपूर्ण गुन्हे एकाच वेळी उघडकीस आले आहेत. यामध्ये अपराध क्रमांक ६५०/२६ आणि ६७२/२६ अंतर्गत भारतीय न्याय संहितेच्या (BNS) कलम ३०३(२) नुसार मोटारसायकल चोरीचे दोन गुन्हे, तसेच अपराध क्रमांक ६५१/२६ अंतर्गत कलम ३०५ आणि ३३१(४) BNS नुसार दाखल असलेला घरफोडीचा गुन्हा निकाली काढण्यात पोलिसांना मोठे यश आले आहे. आरोपी मालाकार ने रामनगर पोलीस स्टेशनच्या हद्दीत ३ दुचाकी चोरी व घरफोडीचे गुन्हे केले हे विशेष.
गुन्हेगारीला आळा घालणारी ही कौतुकास्पद कामगिरी स्थानिक गुन्हे शाखा चंद्रपूरच्या विशेष कार्यवाही पथकाने बजावली आहे. या धाडसी मोहिमेचे नेतृत्व पोलीस उपनिरीक्षक विनोद भुरले आणि पोलीस उपनिरीक्षक सुनील गौरकार यांनी केले. या मोहिमेत त्यांना पोलीस हवालदार सुभाष गोहोकार, सतिश अवथरे, रजनिकांत पुठ्ठावार, दिपक डोंगरे आणि इमान खान यांचे मोलाचे सहकार्य लाभले. तसेच पोलीस अंमलदार किशोर वाकाटे, शशांक बदामवार आणि हिरालाल गुप्ता यांनीही या कारवाईत अत्यंत तत्परतेने आपली भूमिका पार पाडली. चंद्रपूर पोलीस दलाच्या या उत्कृष्ट आणि नियोजनबद्ध कामगिरीमुळे सर्वसामान्य नागरिकांमधून समाधान व्यक्त होत असून, गुन्हेगारी प्रवृत्तींवर पोलिसांचा वचक निर्माण झाला आहे.
Leave a Comment