चंद्रपूर नवजात बालक खरेदी-विक्री प्रकरणात भाजपने केली SIT चौकशीची मागणी

चंद्रपूर : (Chandrapur Baby Trafficking) प्रकरणात नवजात बालकांच्या कथित अवैध खरेदी-विक्रीच्या तपासाला गती देण्याची मागणी वाढली आहे. भाजप जिल्हा महिला आघाडीने जिल्हा पोलीस अधीक्षक आयुष नोपाणी यांना निवेदन देत विशेष तपास पथक (SIT) स्थापन करण्याची मागणी केली. मुख्य सूत्रधाराला तातडीने अटक करून संपूर्ण रॅकेटचा पर्दाफाश करावा, अशी भूमिका निवेदनात मांडण्यात आली आहे. या प्रकरणाकडे आता संपूर्ण चंद्रपूर जिल्ह्याचे लक्ष लागले आहे.

शहरात नवजात बालकांच्या अवैध खरेदी-विक्रीचे जे धक्कादायक रॅकेट उघडकीस आले आहे, त्या संपूर्ण प्रकरणाची अत्यंत सखोल चौकशी करून यामागे असलेल्या मुख्य सूत्रधाराला तात्काळ अटक करण्यात यावी, अशी आग्रही मागणी आज भारतीय जनता पार्टी जिल्हा महिला आघाडीच्या वतीने जिल्हा पोलीस अधीक्षक आयुष नोपाणी यांच्याकडे एका निवेदनाद्वारे करण्यात आली. या संवेदनशील प्रकरणामुळे चंद्रपूर शहर आणि परिसरात तीव्र खळबळ उडाली असून, या गुन्ह्याची पाळेमुळे शोधून काढण्यासाठी पोलीस प्रशासनाने ठोस पावले उचलावीत, अशी मागणी आता सत्ताधारी पक्षाकडूनच लावून धरण्यात आली आहे. (चंद्रपुरातील बाळ विक्री प्रकरणात भाजपच्या २ महिला कार्यकर्त्यांना अटक)

जिल्हा पोलीस अधीक्षकांना सादर केलेल्या निवेदनात भाजप महिला आघाडीने म्हटले आहे की, अटक करण्यात आलेल्या महिलांनी यापूर्वीसुद्धा अशा प्रकारचे गंभीर आणि अमानुष गुन्हे केले असण्याची दाट शक्यता नाकारता येत नाही. या रॅकेटची व्याप्ती पाहता आणि गुन्ह्याचे गांभीर्य लक्षात घेता या प्रकरणाच्या सखोल चौकशीसाठी तात्काळ एक विशेष तपास पथक अर्थात ‘एस.आय.टी.’ (SIT) स्थापन करण्यात यावी.

Chandrapur Baby Trafficking : SIT स्थापन करण्याची मागणी का झाली?

अटक करण्यात आलेल्या महिलांचे धागेदोरे आणि नेटवर्क केवळ चंद्रपूरपुरते मर्यादित नसून इतर शहरांशीही जुळलेले असण्याची शक्यता आहे. त्यामुळे या महिला आरोपींना जास्तीत जास्त काळ पोलीस कोठडीत ठेवून त्यांची कसून चौकशी करण्यात यावी, जेणेकरून या आंतरजिल्हा किंवा आंतरराज्यीय रॅकेटमधील इतर मोठ्या चेहऱ्यांचा आणि माहितीचा पर्दाफाश होऊ शकेल, अशी आग्रही विनंती भाजप महिला आघाडीने पोलीस प्रशासनाला केली आहे.

या महत्त्वाच्या मागणीसाठी भाजपच्या वतीने एक शिष्टमंडळ पोलीस अधीक्षक कार्यालयात पोहोचले होते. यावेळी पोलीस अधीक्षक आयुष नोपाणी यांना निवेदन देताना माजी नगरसेविका सुनीता जयस्वाल, नगरसेवक रवी लोणकर, नम्रता आचार्य ठेमस्कर, शीला चव्हाण, माया उईके, मुग्धा खाडे, मनिषा महातव, समिस्ता फारुकी, हिना पठाण आणि जयश्री आत्राम यांच्यासह भाजप महिला आघाडीच्या अनेक पदाधिकारी व कार्यकर्त्या उपस्थित होत्या. बालतस्करीच्या या संवेदनशील प्रकरणाचा छडा लावून मुख्य सूत्रधाराला जेलच्या गजाआड धाडण्यासाठी आता पोलीस प्रशासन काय पावले उचलते, याकडे संपूर्ण जिल्ह्याचे लक्ष लागले आहे.