चंद्रपूरमध्ये सराईत गुन्हेगार अजय सरकारला तडीपार करण्याची भाजपची प्रशासनाकडे मागणी

चंद्रपूर – Ajay Sarkar Externment प्रकरणामुळे चंद्रपूर शहरातील कायदा व सुव्यवस्थेचा प्रश्न पुन्हा ऐरणीवर आला आहे. सराईत गुन्हेगार अजय सरकार याला शहर व जिल्ह्यातून तात्काळ तडीपार करावे, अशी मागणी भारतीय जनता पार्टीच्या चंद्रपूर महानगर शाखेने प्रशासनाकडे केली आहे. अजय सरकारविरुद्ध ३३ हून अधिक गंभीर गुन्ह्यांची नोंद असल्याचा दावा निवेदनात करण्यात आला. नागरिकांमध्ये वाढती भीती, महिलांच्या सुरक्षेचा प्रश्न आणि कायद्याचा धाक कमी झाल्याचा आरोप करत भाजपने त्वरित कारवाईची मागणी केली आहे. (चंद्रपूर नवजात बाळ विक्री प्रकरणी भाजप महिला कार्यकर्त्यांना अटक)

चंद्रपूर शहरातील सराईत गुन्हेगार अजय सरकार याला तात्काळ चंद्रपूर शहर व जिल्ह्यातून तडीपार (हद्दपार) करण्यात यावे, अशी मागणी भारतीय जनता पार्टी चंद्रपूर महानगरच्या वतीने उपविभागीय दंडाधिकारी विशाल मेश्राम यांच्याकडे करण्यात आली. भाजपचे शहराध्यक्ष सुभाष कासगोट्टूवार यांच्या नेतृत्वात यासंदर्भातील निवेदन प्रशासनाला देण्यात आले.

यावेळी महामंत्री रवींद्र गुरनुले, बलराम डोडानी, तुषार सोम, मनपा गटनेता शेखर शेट्टी, नगर सेवक भालचंद्र दानव, जितेश कुळमेथे, नितेश गवळी, आदींची उपस्थिती होती.

Ajay Sarkar Externment प्रकरणात भाजपने तडीपारची मागणी का केली?

अजय सरकारच्या वाढत्या गुन्हेगारी कारवायांमुळे शहरातील सर्वसामान्य नागरिक, विशेषतः महिला वर्गामध्ये भीतीचे व असुरक्षिततेचे वातावरण निर्माण झाल्याचा आरोप भाजपने केला आहे.
अजय सरकार हा शहरातील कुख्यात गुन्हेगार असून त्याच्याविरुद्ध हत्या, खुनाचा प्रयत्न, अपहरण, दंगल, बेदम मारहाण यांसारख्या गंभीर स्वरूपाच्या ३३ हून अधिक गुन्ह्यांची विविध पोलीस ठाण्यांमध्ये नोंद असल्याचे भाजपने म्हटले आहे. एवढेच नव्हे, तर त्याच्याविरुद्ध सातत्याने नवीन गुन्हेही दाखल होत असल्याकडे लक्ष वेधण्यात आले.

अलीकडेच बंगाली कॅम्प परिसरात एका महिलेला भररस्त्यात मारहाण करून तिचा विनयभंग करण्यात आल्याची घटना घडली. तसेच मच्छीमार संघटनेच्या संचालकांना धमकावल्याप्रकरणी भद्रावती पोलीस ठाण्यातही त्याच्याविरुद्ध गुन्हा दाखल आहे. या घटनांमुळे त्याच्या गुन्हेगारी प्रवृत्तीवर कायद्याचा कोणताही धाक राहिलेला नसल्याचा आरोप करण्यात आला.

यापूर्वी अजय सरकारवर तडीपारीची कारवाई होऊनही तो सध्या शहरात मुक्तपणे वावरत असल्याने नागरिकांच्या जीवित व मालमत्तेला गंभीर धोका निर्माण झाला आहे. त्याच्या दहशतीमुळे अनेक नागरिक तक्रार करण्यासही धजावत नसल्याचे भाजपने म्हटले आहे.
पोलीस प्रशासनाने आवश्यक अहवाल सादर करूनही अद्याप तडीपारीची कारवाई झालेली नसल्याबद्दल भाजपने नाराजी व्यक्त केली. शहरातील कायदा व सुव्यवस्था अबाधित राखण्यासाठी तसेच नागरिकांना भयमुक्त वातावरण उपलब्ध करून देण्यासाठी महाराष्ट्र पोलीस कायद्यातील तरतुदीनुसार अजय सरकारला चंद्रपूर शहर व जिल्ह्यातून तात्काळ तडीपार करण्याचे आदेश काढावेत, अशी मागणी करण्यात आली आहे.