चंद्रपूरचा हा अत्यंत महत्त्वाचा रस्ता अखेर बदलणार! बागला चौक ते राजीव गांधी कॉलेज रस्ता काँक्रीटीकरण कामाचे भूमिपूजन

चंद्रपूर : Chandrapur Road Work अंतर्गत चंद्रपूर शहरातील अत्यंत वर्दळीचा आणि महत्त्वाचा मार्ग असलेल्या बागला चौक ते राजीव गांधी इंजिनिअरिंग कॉलेज या मुख्य रस्त्याच्या काँक्रीट कामाचे बहुप्रतिक्षित भूमिपूजन आज मोठ्या उत्साहात संपन्न झाले. मा. महापौर सौ. संगीता राजेंद्र खांडेकर यांच्या शुभहस्ते या भव्य विकासकामाचा श्रीगणेशा करण्यात आला. अनेक वर्षांपासून प्रलंबित असलेला हा प्रश्न आता मार्गी लागला आहे.

Chandrapur Road Work : ५ कोटी ९० लाखांचा भव्य निधी मंजूर

अनेक वर्षांपासून अत्यंत दुरवस्थेत असलेला आणि रखडलेला हा रस्ता अखेर मार्गी लागत असल्याने परिसरातील नागरिकांमध्ये आनंदाचे वातावरण आहे. विशेष म्हणजे, या रस्त्याचे काम प्रत्यक्ष सुरू करण्यापूर्वी महानगरपालिकेने या मार्गावर दुभाजक (डिवायडर) तयार केले होते, आणि आता त्यानंतर थेट लोकशाहीर अण्णाभाऊ साठे नागरी दलित वस्ती सुधार योजना अंतर्गत सन २०२५-२६ मध्ये मंजूर झालेल्या तब्बल ₹५ कोटी ९० लाखांच्या निधीतून या भव्य काँक्रीटीकरण रस्त्याचे प्रत्यक्ष निर्माण कार्य हाती घेण्यात येत आहे. (हे हि वाचा – चंद्रपुरात MIDC चा विस्तार होणार)

हा रस्ता चंद्रपूर शहरातील शैक्षणिक आणि व्यापारी दृष्टिकोनातून अत्यंत महत्त्वाचा मानला जातो. बागला चौक ते राजीव गांधी इंजिनिअरिंग कॉलेज दरम्यान विविध संस्थांमध्ये शिक्षण घेणाऱ्या हजारो विद्यार्थी-विद्यार्थिनींसाठी हा प्रमुख संपर्क मार्ग आहे. याशिवाय, हा रस्ता बागला चौक ते लालपेठ कॉलरी परिसराला थेट जोडत असल्याने स्थानिक नागरिक, व्यापारी, चाकरमानी आणि वाहनधारकांची येथे रात्रंदिवस मोठी वर्दळ असते. चंद्रपूर शहरातून बल्लारशाकडे जाणाऱ्या वाहनांसाठी हा रस्ता एक उत्तम पर्यायी (बायपास) मार्ग म्हणूनही ओळखला जातो.

रखडलेला हा काँक्रीट रस्ता आता पूर्ण झाल्यानंतर वाहतुकीस अधिक सुरक्षित, सुकर व गतिमान सुविधा उपलब्ध होणार आहे. विशेषतः पावसाळ्यात नागरिकांना चिखल आणि खड्ड्यांमुळे सोसाव्या लागणाऱ्या प्रचंड त्रासातून कायमची सुटका मिळणार असून, अपघातांची शक्यताही यामुळे नगण्य होईल. या दर्जेदार रस्ते विकासामुळे परिसराच्या सामाजिक व आर्थिक विकासाला मोठी चालना मिळणार असून, हा प्रकल्प नागरिकांच्या दैनंदिन जीवनात मोठा सकारात्मक बदल घडवून आणणारा ठरेल.

या अत्यंत महत्त्वाच्या भूमिपूजन सोहळ्यास उपमहापौर श्री. प्रशांत दानव, स्थायी समिती सभापती सौ. मनस्वी गिऱ्हे, सभागृह नेत्या सौ. जयश्री जुमडे, विरोधी पक्षनेते व गटनेते श्री. राजेश अडूर, आणि झोन क्र. २ च्या सभापती सौ. वैशाली चंदनखेडे यांची प्रमुख उपस्थिती होती. यासोबतच महाकाली प्रभाग क्र. १२ च्या नगरसेविका सौ. करुणा चालखूरे, सौ. संगीता अमृतकर, नगरसेवक श्री. प्रज्वलंत कडू, श्री. नंदू नागरकर आणि भिवापूर प्रभाग क्र. १५ च्या नगरसेविका सौ. ज्योती जिवने, नगरसेवक श्री. वसंत देशमुख, श्री. सुनील खंडेलवार यांच्यासह परिसरातील नागरिक व मान्यवर मोठ्या संख्येने उपस्थित होते. चंद्रपूर शहराच्या सर्वांगीण आणि शाश्वत विकासासाठी महानगरपालिका पूर्णपणे कटिबद्ध असून, नागरिकांना अशाच दर्जेदार मूलभूत सुविधा उपलब्ध करून देण्यासाठी विकासकामांचा हा वेग यापुढेही अविरतपणे कायम ठेवला जाईल, असा ठाम विश्वास यावेळी उपस्थित लोकप्रतिनिधींनी व्यक्त केला.