थेट शेतशिवारातून अवजारे पळवणारी गँग गजाआड; चंद्रपुरात आंतर-तालुका चोरट्यांचा पर्दाफाश

चंद्रपूर: (Chandrapur Agri Theft Case) अंतर्गत चंद्रपूर स्थानिक गुन्हे शाखेने (LCB) एका सराईत आंतर-तालुका टोळीचा पर्दाफाश केला आहे. पोलिसांनी पडोली रोडवर नाकाबंदी करून मुख्य आरोपीला अटक केली. त्याच्याकडून ९ लाख ५१ हजार ५०० रुपयांचा मुद्देमाल जप्त करण्यात आला आहे. या धडक कारवाईमुळे वरोरा, बल्लारपूर, राजुरा भागातील शेतकऱ्यांनी सुटकेचा श्वास सोडला आहे. पोलीस आता फरार असलेल्या इतर ३ आरोपींचा कसून शोध घेत आहेत.

Chandrapur Agri Theft Case मध्ये पोलिसांची मोठी कारवाई

चंद्रपूर जिल्ह्यातील ग्रामीण भागातून शेतकऱ्यांचे शेतीसाहित्य आणि महागडी अवजारे चोरी करणाऱ्या एका सराईत आंतर-तालुका टोळीचा स्थानिक गुन्हे शाखेने (LCB) पर्दाफाश केला आहे. स्थानिक गुन्हे शाखेच्या पथकाने कोसारा ते पडोली रोडवर अत्यंत चाणाक्षपणे नाकाबंदी करून मुख्य आरोपीला बेड्या ठोकल्या आहेत. या धडक कारवाईत पोलिसांनी आरोपीकडून चोरीचे शेती साहित्य आणि गुन्ह्यात वाहतुकीसाठी वापरलेले चारचाकी वाहन, असा एकूण ९ लाख ५१ हजार ५०० रुपयांचा मुद्देमाल जप्त केला असून, या कारवाईमुळे जिल्हाभरातील शेतकऱ्यांनी सुटकेचा श्वास सोडला आहे. (एकाच रात्री ६ शेतात चोरी)

जिल्ह्यातील वरोरा, बल्लारपूर, गडचांदूर आणि राजुरा या ग्रामीण भागातील शेतशिवारातून मोठ्या प्रमाणावर शेती साहित्य व अवजारे चोरीला जात असल्याच्या तक्रारी वारंवार प्राप्त होत होत्या. या वाढत्या चोऱ्यांचा छडा लावण्यासाठी चंद्रपूर स्थानिक गुन्हे शाखेचे पथक कसून शोध घेत होते. दरम्यान, १४ जुलै २०२६ रोजी पोलिसांना कोसारा ते पडोली रोडवर संशयित हालचालींची गुप्त माहिती मिळाली.

या माहितीच्या आधारे स्थानिक गुन्हे शाखेच्या वरोरा आणि राजुरा उपविभागाच्या संयुक्त पथकाने तात्काळ पडोली रस्त्यावर नाकाबंदी केली. या नाकाबंदीदरम्यान पोलिसांनी संशयास्पद रित्या जाणाऱ्या एका महिंद्रा बुलेरो पिकअप वाहनाला अडवून त्याची झडती घेतली. यावेळी वाहनात चोरीचे शेती साहित्य आढळून आले. पोलिसांनी वाहनचालक शिवराज चिनकन वेलपुरी (वय ३९ वर्ष, रा. राजीव गांधी नगर, आझाद चौक, चंद्रपूर) याला ताब्यात घेऊन त्याची कसून चौकशी केली असता, त्याने आपल्या साथीदारांच्या मदतीने विविध तालुक्यांतून चोऱ्या केल्याची कबुली दिली.

पोलिसांनी केलेल्या या सखोल चौकशीत आणि तपासादरम्यान जिल्ह्यातील तब्बल पाच मोठे गुन्हे उघडकीस आणण्यात पोलिसांना यश आले आहे. यामध्ये वरोरा पोलीस ठाण्यातील गु.र.क्र. ८०३/२६, बल्लारपूर पोलीस ठाण्यातील गु.र.क्र. ६८८/२६, गडचांदूर पोलीस ठाण्यातील गु.र.क्र. ३४७/२६ व ३८६/२६ आणि राजुरा पोलीस ठाण्यातील गु.र.क्र. ६००/२६ अशा सर्व गुन्ह्यांचा समावेश असून, हे सर्व गुन्हे नवीन भारतीय न्याय संहितेच्या (BNS) कलम ३०३(२) अन्वये दाखल आहेत. या कारवाईत पोलिसांनी २ लाख ५१ हजार ५०० रुपये किमतीचे चोरीस गेलेले शेती साहित्य व अवजारे जप्त केली आहेत. तसेच गुन्ह्यात चोरीच्या मालाची वाहतूक करण्यासाठी वापरलेली ७ लाख रुपये किमतीची महिंद्रा बुलेरो गाडी (क्रमांक MH-34-CQ-1310) जप्त करण्यात आली असून, एकूण जप्त मुद्देमालाची किंमत ९ लाख ५१ हजार ५०० रुपये आहे.

या प्रकरणी स्थानिक गुन्हे शाखेने मुख्य आरोपी शिवराज चिनकन वेलपुरी याला अटक केली असली, तरी या गुन्ह्यातील त्याचे तीन साथीदार अद्याप फरार आहेत. यामध्ये भद्रावती येथील आकाश हरिदास बेले, गडचांदूर येथील राजू वीरशपा स्वामीशेट्टी आणि चंद्रपूरच्या इंदिरानगर येथील रवी दगडुजी गदाई यांचा समावेश असून पोलीस आता या फरार आरोपींचा कसून शोध घेत आहेत. स्थानिक गुन्हे शाखेच्या वरोरा व राजुरा उपविभागाच्या पथकाने एकत्रितपणे ही धडक आणि कौतुकास्पद कारवाई केली असून, अटक केलेल्या आरोपीकडून जिल्ह्यात झालेल्या आणखी काही चोऱ्यांचे गुन्हे उघडकीस येण्याची शक्यता वर्तवली जात आहे.