वरोरा – (Warora Farm Equipment Theft) चंद्रपूर जिल्ह्यातील वरोरा पोलीस ठाण्याच्या हद्दीत येणाऱ्या पानवडाळा गावच्या शिवारात चोरट्यांनी शेतशिवाराला आपले लक्ष्य बनवले आहे. एकाच रात्री तब्बल सहा शेतकऱ्यांच्या शेतामधून लाखांची शेती अवजारे चोरून नेल्याची धक्कादायक घटना समोर आली आहे. या धाडसी चोरीच्या सत्रामुळे संपूर्ण वरोरा तालुक्यासह ग्रामीण भागात कृषी क्षेत्रात मोठी खळबळ उडाली असून शेतकरी वर्गामध्ये कमालीची चिंता निर्माण झाली आहे. अज्ञात चोरट्यांनी रात्रीच्या अंधाराचा फायदा घेऊन शेतातील महागडे लोखंडी साहित्य आणि बैलगाडीची लोखंडी चाके पद्धतशीरपणे लंपास केली आहेत. वरोरा पोलिसांनी घटनास्थळाचा पंचनामा केला आहे. (लग्न मंडपात माथेफिरू तरुणांचा राडा)
Warora Farm Equipment Theft: वरोरा पोलिसांत गुन्हा दाखल
चंद्रपूर जिल्ह्यातील वरोरा पोलीस ठाण्याच्या हद्दीत येणाऱ्या पानवडाळा गावच्या शिवारात चोरट्यांनी शेतशिवाराला आपले लक्ष्य बनवून एकाच रात्री तब्बल सहा शेतकऱ्यांच्या शेतामधून लाखांची शेती अवजारे चोरून नेल्याची धक्कादायक घटना समोर आली आहे. या धाडसी चोरीच्या सत्रामुळे संपूर्ण वरोरा तालुक्यासह ग्रामीण भागात कृषी क्षेत्रात मोठी खळबळ उडाली असून शेतकरी वर्गामध्ये कमालीची चिंता निर्माण झाली आहे. अज्ञात चोरट्यांनी रात्रीच्या अंधाराचा फायदा घेऊन शेतातील महागडे लोखंडी साहित्य, बैलगाडीची लोखंडी चाके आणि इतर इलेक्ट्रॉनिक उपकरणे पद्धतशीरपणे लंपास केली आहेत. या घटनेची माहिती मिळताच वरोरा पोलिसांनी घटनास्थळाचा पंचनामा करून अज्ञात चोरांचा शोध सुरू केला आहे.
पोलीस सूत्रांकडून मिळालेल्या अधिकृत माहितीनुसार, भद्रावती तालुक्यातील पानवडाळा येथील रहिवासी आणि व्यावसायिक शेतकरी सूर्यभान माणिकराम उताने (वय ४३ वर्षे) हे नेहमीप्रमाणे दिनांक ११ जुलै २०२६ रोजी आपल्या शेतात काम करण्यासाठी गेले होते. संध्याकाळी ६:३० वाजेच्या सुमारास शेताचे काम आटोपून ते घरी परत आले, तेव्हा त्यांच्या शेताच्या वॉलकंपाउंडचे लोखंडी गेट आणि शेतात ठेवलेली बैलगाडीची लोखंडी चाके जागेवर सुरक्षित होती.
मात्र, दुसऱ्या दिवशी म्हणजेच १२ जुलै २०२६ रोजी सकाळी ६:०० वाजताच्या सुमारास सूर्यभान उताने हे जनावरांना चारापाणी करण्यासाठी पुन्हा शेतात गेले असता, त्यांना शेताला लावलेले लोखंडी वॉलकंपाउंडचे मुख्य गेट आणि बैलगाडीची दोन्ही लोखंडी चाके गायब असल्याचे दिसून आले. चकित झालेल्या उताने यांनी तात्काळ आजूबाजूच्या शेतपरिसरात शोध घेण्यास सुरुवात केली.
या शोधमोहिमेदरम्यान त्यांना त्यांच्या शेताशेजारीच शेती करणारे इतर शेतकरी अनिल चिकटे, अतिश भोयार, निलेश डोहे, प्रमोद काळे आणि दादजी देठे यांच्याही शेतातील लोखंडी व कृषी अवजारे चोरीला गेल्याचे धक्कादायक वास्तव समजले. सूर्यभान उताने यांनी तातडीने या सर्व शेतकऱ्यांना फोन करून शेतात बोलावून घेतले, त्यानंतर सर्वांनी मिळून आपापल्या साहित्याची पाहणी केली असता मोठ्या चोरीचा प्रकार उघडकीस आला. यामध्ये फिर्यादी सूर्यभान उताने यांच्या शेतातून २० हजार रुपये किमतीची बैलगाडीची दोन लोखंडी चाके आणि ५ हजार रुपयांचे लोखंडी गेट असा एकूण २५ हजार रुपयांचा माल चोरीला गेला होता. शेजारील शेतकरी अनिल चिकटे यांच्या शेतातून २० हजार रुपये किमतीचे बैलगाडीचे लोखंडी चाक आणि १०० रुपयांची पाण्याची केटली असा एकूण २० हजार १०० रुपयांचा मुद्देमाल लंपास करण्यात आला.
चोरीचे हे सत्र एवढ्यावरच थांबले नाही, तर चोरट्यांनी अतिश विठ्ठल भोयार यांच्या शेतातून ५ हजार रुपयांचा स्प्रे पंप, ५ हजार रुपयांची झाडे कापण्याची कटर मशीन, १४ हजार रुपये किमतीचे १४ नग स्प्रींक्लर, ६ हजार रुपयांचे २ लोखंडी डवरे, ४ हजार रुपयांची लोखंडी पेरणी तिफन, ४ हजार रुपयांचे १ लोखंडी फन, १ हजार रुपयांची जुनी वापरती सायकल आणि ५०० रुपयांचे ४ लोखंडी डंबेल्स असा एकूण ३९ हजार ५०० रुपयांचा मोठा मुद्देमाल चोरून नेला.
तसेच निलेश पंढरी डोहे यांच्या शेतातून २० हजार रुपये किमतीची बैलगाडीची दोन लोखंडी चाके, प्रमोद बाबजी काळे यांच्या शेतातून २० हजार रुपयांची बैलगाडीची दोन लोखंडी चाके आणि दादजी नारायण देठे यांच्या शेतातूनही २० हजार रुपयांची बैलगाडीची दोन लोखंडी चाके अज्ञात चोरांनी लांबवली. अशा प्रकारे या टोळीने पानवडाळा गावातील एकूण ६ शेतकऱ्यांच्या शेतामधून १ लाख ४४ हजार ६०० रुपयांचे साहित्य लंपास केले.
आपल्या हक्काची शेतीची अवजारे चोरीला गेल्याचे स्पष्ट झाल्यानंतर सर्व शेतकऱ्यांनी वरोरा पोलीस ठाणे गाठले. फिर्यादी सूर्यभान माणिकराम उताने यांनी दिलेल्या तोंडी रिपोर्टच्या आधारे वरोरा पोलिसांनी गुन्हा नोंदवून घेतला आहे. वरोरा पोलीस स्टेशनचे पोलीस निरीक्षक ओमप्रकाश शामराव सोनटक्के यांच्या आदेशानुसार अज्ञात आरोपींविरुद्ध भारतीय न्याय संहिता (BNS) २०२३ च्या कलम ३०३(२) अन्वये अधिकृत गुन्हा दाखल करण्यात आला असून त्याचा प्रथम खबरी अहवाल क्रमांक ०८०३/२०२६ आहे. या गुन्ह्याचा पुढील तपास ठाणे अंमलदारांच्या मार्गदर्शनाखाली पोलीस हवालदार संतोष किसान पवार यांच्याकडे सोपवण्यात आला असून पोलीस संशयित चोरांचा आणि चोरीचा माल खरेदी करणाऱ्यांचा कसून शोध घेत आहेत.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
