चंद्रपूर जिल्ह्यातून चारा वाहतूक बंदी; शेतकरी व व्यापाऱ्यांवर काय परिणाम?

चंद्रपूर – चारा वाहतूक बंदी चंद्रपूर जिल्ह्यात लागू करण्यात आली आहे. जिल्हाधिकारी वसुमना पंत यांनी याबाबत आदेश जारी केला आहे. जिल्ह्याबाहेर किंवा राज्याबाहेर सुका व ओला चारा नेण्यास आणि विकण्यास मनाई करण्यात आली आहे. जिल्ह्यातील १२ तालुक्यांमध्ये ट्रीगर-१ दुष्काळ घोषित झाला आहे. भविष्यात चारा टंचाई होऊ नये, यासाठी ही प्रतिबंधात्मक उपाययोजना आहे. भारतीय नागरिक सुरक्षा संहिता, २०२३ च्या कलम १६३ अन्वये हा आदेश निघाला आहे. आदेश १ ऑक्टोबर २०२६ पासून पुढील आदेशापर्यंत लागू राहील. शासकीय योजनेतील वाहतुकीला सूट आहे. (बल्लारपूर मध्ये १ हजार घरकुलाचा प्रस्ताव)

चारा वाहतूक बंदी: कोणत्या कारणाने आदेश?

महाराष्ट्र शासनाच्या मदत व पुनर्वसन विभागाच्या शासन निर्णयानुसार चंद्रपूर जिल्ह्यातील 12 तालुक्यांमध्ये ट्रीगर-1 (प्रथम कळ) दुष्काळ घोषित करण्यात आला आहे. सद्यस्थितीत जिल्ह्यात उत्पादित होणारा चारा इतर जिल्ह्यांत तसेच सीमावर्ती भागातून राज्याबाहेर मोठ्या प्रमाणावर विक्रीसाठी पाठविला जाण्याची शक्यता आहे. त्यामुळे आगामी काळात जिल्ह्यात गंभीर चारा टंचाई निर्माण होऊन पशुधनाच्या जीवितास धोका निर्माण होण्याची तसेच त्यातून कायदा व सुव्यवस्थेचा प्रश्न उद्भवण्याची शक्यता लक्षात घेऊन जिल्हा प्रशासनाने प्रतिबंधात्मक उपाययोजना केली आहे.

जिल्हाधिकाऱ्यांनी जारी केलेल्या आदेशानुसार चंद्रपूर जिल्ह्याच्या महसुली हद्दीतून इतर कोणत्याही जिल्ह्यात किंवा राज्याबाहेर हिरवा चारा, कडबा, कोणत्याही प्रकारची कुट्टी, पेंढ, टीएमआर तसेच इतर सर्व प्रकारच्या पशुखाद्याची वाहतूक व विक्री करण्यास सक्त मनाई करण्यात आली आहे. तथापि, शासकीय योजनेंतर्गत करण्यात येणारी चारा वाहतूक तसेच पशुसंवर्धन विभाग किंवा जिल्हा प्रशासनाने अधिकृत मंजुरी दिलेल्या चारा वाहतुकीला या आदेशातून सूट राहणार आहे.

या आदेशाचे उल्लंघन करणारी व्यक्ती भारतीय न्याय संहिता, 2023 (बीएनएस) च्या कलम 223 अन्वये कायदेशीर कारवाईस पात्र राहील. सदर आदेश दि. 1 ऑक्टोबर 2026 पासून पुढील आदेश निर्गमित होईपर्यंत लागू राहणार आहे. जिल्ह्यातील पशुधनासाठी आवश्यक चाऱ्याची उपलब्धता अबाधित ठेवण्याच्या दृष्टीने नागरिक, शेतकरी, व्यापारी आणि चारा वाहतूकदारांनी या आदेशाचे काटेकोरपणे पालन करावे, असे आवाहन जिल्हा प्रशासनाच्या वतीने करण्यात आले आहे.