तुमचे सोशल मीडिया अकाउंट धोक्यात! हॅकर्सची नवी युक्ती

चंद्रपूर : Cyber Scam Alert Chandrapur: चंद्रपुरात सोशल मीडिया युजर्सना लक्ष्य करून नव्या पद्धतीने फसवणूक केली जात आहे. फेसबुक आणि इंस्टाग्रामवर बनावट मेसेज पाठवून हॅकर्स खाती ताब्यात घेत आहेत. “तुम्ही कम्युनिटी स्टँडर्डचे उल्लंघन केले आहे” असे सांगून युजर्सना घाबरवले जात आहे. २४ तासांत खाते बंद होईल असा मेसेज पाठवला जातो. अनेक नागरिक या लिंकवर क्लिक करून स्वतःची वैयक्तिक माहिती गमावत आहेत. हॅकर्स अधिकृत Meta Support च्या नावाने बनावट नोटिसा पाठवत आहेत. (हे हि वाचा – ब्लॉगिंग मधून पैसे कमवायचे आहेत? जाणून घ्या)

सोशल मीडियाचा वापर करणाऱ्या नागरिकांना लक्ष्य करून सायबर गुन्हेगारांकडून नव्या पद्धतीने फसवणूक केली जात आहे. फेसबुक आणि इंस्टाग्रामवर “तुम्ही कम्युनिटी स्टँडर्डचे उल्लंघन केले आहे”, “तुमचे खाते २४ तासांत बंद होईल”, “ताबडतोब पासवर्ड बदला”, “तुमचे पेज डिलीट केले जाईल” अशा आशयाचे संदेश पाठवून वापरकर्त्यांना घाबरवले जात आहे. हे संदेश अधिकृत फेसबुक किंवा मेटाकडून आलेले नसतानाही अनेकजण त्यावर विश्वास ठेवून दिलेल्या लिंकवर क्लिक करतात आणि काही क्षणांतच त्यांचे खाते हॅकर्सच्या ताब्यात जाते.

सायबर तज्ज्ञांच्या मते, हा प्रकार फिशिंग म्हणून ओळखला जातो. यामध्ये हॅकर्स फेसबुक किंवा मेटाचे नाव, लोगो आणि अधिकृत वाटणारी भाषा वापरून बनावट वेबसाइट तयार करतात. वापरकर्ता त्या वेबसाइटवर लॉगिन करताच त्याचा यूजरनेम, पासवर्ड, OTP किंवा दोन-स्तरीय सुरक्षेचा (2FA) कोड थेट हॅकरकडे पोहोचतो. त्यानंतर खाते ताब्यात घेऊन त्याचा गैरवापर केला जातो. काही वेळा त्या खात्यावरून मित्रांना पैसे मागणारे संदेश पाठवले जातात, तर काही प्रकरणांमध्ये पेज किंवा व्यवसायाशी संबंधित महत्त्वाची माहितीही चोरीला जाते.

हॅकिंगपासून तुमचे सोशल मीडिया खाते कसे सुरक्षित ठेवावे?

सायबर गुन्हेगार आता केवळ ई-मेलवरच अवलंबून नसून मेसेंजर, व्हॉट्सअ‍ॅप, इंस्टाग्राम डायरेक्ट मेसेज आणि फेसबुक पेजवरही अशा बनावट नोटिसा पाठवत आहेत. “Meta Support”, “Facebook Security Team” किंवा “Account Quality” अशा नावांचा वापर करून संदेश अधिक विश्वासार्ह वाटेल, याची काळजी घेतली जाते. मात्र अधिकृत फेसबुक किंवा मेटा कोणत्याही अनोळखी लिंकवर जाऊन लॉगिन करण्यास किंवा मेसेंजरवरून पासवर्ड बदलण्यास सांगत नाही.

तज्ज्ञांच्या मते, अशा प्रकारच्या संदेशांमध्ये तातडीची भावना निर्माण केली जाते. “२४ तासांत खाते बंद होईल”, “तुमचे पेज हटवले जाईल” किंवा “तुमचे खाते कायमचे निलंबित होईल” अशा शब्दांचा वापर करून वापरकर्त्याला विचार न करता क्लिक करण्यास भाग पाडले जाते. हीच घाई हॅकर्ससाठी सर्वात मोठी संधी ठरते.

अशा फसवणुकीपासून बचाव करण्यासाठी कोणत्याही संशयास्पद लिंकवर क्लिक करू नये, फेसबुक किंवा इंस्टाग्राममध्ये नेहमी अधिकृत अॅप किंवा अधिकृत वेबसाइटवरूनच लॉगिन करावे, मजबूत आणि वेगळा पासवर्ड वापरावा तसेच दोन-स्तरीय सुरक्षा (Two-Factor Authentication) सुरू ठेवावी. कोणत्याही परिस्थितीत OTP किंवा सुरक्षा कोड इतर कोणालाही देऊ नये. वेळोवेळी खात्यातील Login Activity तपासून अनोळखी डिव्हाइस दिसल्यास तात्काळ लॉगआउट करावे आणि पासवर्ड बदलावा.

जर चुकून अशा बनावट लिंकवर माहिती भरली असेल, तर विलंब न करता फेसबुक, इंस्टाग्राम आणि संबंधित ई-मेलचा पासवर्ड बदलावा, सर्व डिव्हाइसवरून लॉगआउट करावे आणि दोन-स्तरीय सुरक्षा सुरू करावी. तसेच आपल्या खात्यावरून आलेल्या संशयास्पद संदेशांवर विश्वास ठेवू नये, अशी सूचना मित्र-नातेवाईकांनाही द्यावी.

सायबर सुरक्षातज्ज्ञांचे म्हणणे आहे की, आजच्या डिजिटल युगात हॅकर्स अत्याधुनिक तंत्रज्ञानाचा वापर करत असले तरी त्यांचे सर्वात प्रभावी शस्त्र म्हणजे वापरकर्त्याची घाई आणि निष्काळजीपणा. त्यामुळे कोणताही संदेश कितीही अधिकृत वाटत असला तरी त्याची खातरजमा केल्याशिवाय कोणत्याही लिंकवर क्लिक करू नये किंवा लॉगिनची माहिती भरू नये. काही क्षणांची सावधगिरी तुमचे सोशल मीडिया खाते, वैयक्तिक माहिती आणि आर्थिक नुकसान होण्यापासून वाचवू शकते.