सावली : Jewellery Scam ची धक्कादायक घटना चंद्रपूर जिल्ह्यातील सावली येथे उघडकीस आली आहे. दागिने चमकवून देण्याचे आमिष दाखवत दोन अज्ञात भामट्यांनी एका 56 वर्षीय शेतकऱ्याची 50 हजार रुपये किमतीची सोन्याची अंगठी हातोहात लंपास केली. प्रथम चांदीची चैन स्वच्छ करून विश्वास संपादन करण्यात आला आणि नंतर सोन्याची अंगठी घेऊन आरोपी पसार झाले. या प्रकरणी सावली पोलिसांनी गुन्हा दाखल करून आरोपींचा शोध सुरू केला आहे. (वारस नोंद करण्यासाठी मागितली १० हजाराची लाच)
Jewellery Scam मध्ये शेतकऱ्याची फसवणूक कशी झाली?
दागिने चमकावून देण्याच्या बहाण्याने भामट्यांनी एका ज्येष्ठ शेतकऱ्याला गंडा घातल्याची खळबळजनक घटना सावली पोलीस ठाण्याच्या हद्दीत उघडकीस आली आहे. ‘तांबे, चांदी आणि सोन्याचे दागिने पावडर लावून चमकवून देतो’ असे आमिष दाखवून दोन अज्ञात भामट्यांनी ५६ वर्षीय शेतकऱ्याची ५० हजार रुपये किमतीची ४ ग्रॅमची सोन्याची अंगठी हातोहात लांबवली. याप्रकरणी सावली पोलिसांनी दोन अज्ञात आरोपींविरुद्ध गुन्हा दाखल केला आहे.
पोलीस सूत्रांकडून मिळालेल्या माहितीनुसार, सावली येथील पद्मावती नगरचे रहिवासी असलेले दीपक मारोती सुत्रपवार (वय ५६, व्यवसाय-शेती) हे ५ जून २०२६ रोजी सकाळी आपल्या घरी हजर होते. दरम्यान, सकाळी ११ वाजताच्या सुमारास त्यांच्या घरी दोन अनोळखी इसम आले. त्यांनी दीपक यांना गळ्यातील चांदीची चैन काळी पडल्याचे सांगून ती पावडरने चमकवून देण्याचे आमिष दाखवले. दीपक यांनी विश्वास ठेवून आपली चांदीची चैन दिली असता, भामट्यांनी ती समोरच स्वच्छ करून चमकवून दिली. त्यामुळे फिर्यादीचा त्यांच्यावर पूर्ण विश्वास बसला.
त्यानंतर दुपारी १ वाजताच्या सुमारास हे दोन्ही भामटे पांढऱ्या रंगाची अपाचे मोटार सायकल घेऊन पुन्हा दीपक सुत्रपवार यांच्या घरी आले. त्यादिवशी दीपक यांना एका लग्नासाठी नागपूरला जायचे असल्याने त्यांनी हातात ४ ग्रॅमची (बदाम छाप डिझाईनची) सोन्याची अंगठी घातली होती. भामट्यांनी ती अंगठीही चमकवून देतो असे सांगून हातात घेतली. अंगठी साफ करण्याचे नाटक करत असताना, त्यांनी फिर्यादीला ‘अंगठीसाठी गॅस सुरू करा’ असे सांगून आत पाठवले. दीपक गॅस सुरू करण्यासाठी स्वयंपाकघरात जाताच, दोन्ही भामटे ५० हजार रुपये किमतीची सोन्याची अंगठी घेऊन अपाचे गाडीने हायवेच्या दिशेने पसार झाले.
दीपक सुत्रपवार तातडीने नागपूरला लग्नासाठी गेल्याने त्यांनी ७ जून रोजी गावात परत आल्यावर सावली पोलीस ठाण्यात रीतसर तोंडी तक्रार दिली. फिर्यादीनुसार, चोरी करणाऱ्या दोन भामट्यांपैकी एक जण मध्यम लठ्ठ व गोऱ्या रंगाचा होता, तर दुसरा काळ्या-सावळ्या रंगाचा होता. या तक्रारीवरून सावली पोलिसांनी भारतीय न्याय संहिता (BNS), २०२३ च्या कलम ३(५) आणि ३१६(३) अंतर्गत गुन्हा नोंदवला आहे. पोलीस निरीक्षक प्रदीप पुल्लरवार यांच्या मार्गदर्शनात पोलीस उपनिरीक्षक सचिन विनायक मुसळे या गुन्ह्याचा पुढील तपास करत असून भामट्यांचा शोध सुरू आहे. या घटनेमुळे परिसरात एकच खळबळ उडाली असून, अपरिचित व्यक्तींवर विश्वास न ठेवण्याचे आवाहन पोलिसांनी केले आहे.
