Banned Nylon manja :चंद्रपूर १३ डिसेंबर २०२५ (News३४) – मानवी जीवितास धोकादायक असणाऱ्या प्रतिबंधित नायलॉन मांजाची विक्री करणाऱ्यावर चंद्रपूर पोलिसांचे कारवाई सत्र सुरु आहे. १२ डिसेंबर रोजी स्थानिक गुन्हे शाखा व रामनगर पोलिसांनी केलेल्या कारवाईत तब्बल ७७ हजारांचा नायलॉन मांजा जप्त करीत दोघांवर गुन्हा दाखल करण्यात आला आहे. (हे वाचा – स्थानिक गुन्हे शाखेच्या रडारवर नायलॉन मांजा, ५० हजारांचा मांजा जप्त)
स्थानिक गुन्हे शाखेच्या कारवाईत वरोरा शहरातील आझाद वॉर्ड मध्ये नायलॉन मांजाची विक्री सुरु असल्याची माहिती मिळाली, माहितीच्या आधारे गुन्हे शाखेने मानवी जीवितास व पर्यावरणास धोकादायक असलेला प्रतिबंधित नायलॉन मांजा ४५ मग चक्री किंमत ५४ हजारांचा मुद्देमाल जप्त करण्यात आला.
सदर नायलॉन मांजा विक्री करीता साठवून ठेवला होता, पोलिसांनी ४० वर्षीय गीता तुळशीराम पानघाटे यांच्यावर कलम २२३, २९२, ४९ व पर्यावरण संरक्षण अधिनियम ५, १५ अंतर्गत गुन्हे दाखल करण्यात आले.
दुसऱ्या कारवाईत चंद्रपूर शहरातील रामनगर मध्ये गुन्हे शोध पथकाने छापेमारी करीत एका जनरल स्टोर्स मध्ये विक्री करिता साठवून ठेवलेला मोनोकाईट फायटर, मोनोफिल गोल्ड व हिरो प्लस प्रतिबंधित नायलॉन मांजा किंमत २३ हजार ४०० जप्त करण्यात आला. Banned Nylon manja
या कारवाईत जनरल स्टोर्स चालक २५ वर्षीय गौरव हेमराज गोटेफोडे यांच्यावर विविध कलम अन्वये गुन्हा दाखल करण्यात आला. पोलिसांनी केलेल्या दोन्ही कारवाईत एकूण ७७ हजारांचा नायलॉन मांजा जप्त करण्यात आला.
सदरची यशस्वी कारवाई पोलीस अधीक्षक मुमक्का सुदर्शन, अपर पोलीस अधीक्षक ईश्वर कातकडे यांच्या मार्गदर्शनात गुन्हे शाखा पोलीस निरीक्षक अमोल काचोरे, रामनगर पोलीस निरीक्षक आसिफरजा शेख, सपोनि नरोटे, वाघमारे, उगले, पोउपनि सर्वेश बेलसरे यांनी केली.
