गुन्हा करून सुटल्याचा समज, पण चंद्रपूर LCB ने दाखवला दम

चंद्रपूर: Sonapur Burglary Case मुळे चंद्रपूर जिल्ह्यात खळबळ उडाली आहे. गोंडपिपरी तालुक्यातील मौजा सोनापूर येथे झालेल्या घरफोडीच्या गुन्ह्याचा चंद्रपूर स्थानिक गुन्हे शाखा (LCB) आणि लाठी पोलिसांनी अवघ्या २४ तासांत छडा लावला. आधुनिक तांत्रिक विश्लेषणाच्या मदतीने पोलिसांनी आरोपीचा माग काढत थेट तेलंगणा राज्यातून त्याला अटक केली. या कारवाईत आरोपीकडून १,७८,२५० रुपयांचा मुद्देमाल जप्त करण्यात आला असून दोन घरफोडीचे गुन्हे उघडकीस आले आहेत. (४ लोक मेले, ११२ वर आला बनावट कॉल)

चंद्रपूर जिल्ह्यामध्ये गुन्हेगारांवर वचक निर्माण करणाऱ्या स्थानिक गुन्हे शाखेने (LCB) आणि लाठी पोलिसांनी संयुक्त कारवाई करत सोनापूर येथे झालेल्या घरफोडीच्या गुन्ह्याचा अवघ्या २४ तासांच्या आत यशस्वी छडा लावला आहे. १५ जून २०२६ रोजी पोलीस अधीक्षक कार्यालयाकडून प्रसिद्ध करण्यात आलेल्या अधिकृत वार्तापत्रानुसार, पोलिसांनी या कारवाईत थेट तेलंगणा राज्यातून आरोपीला ताब्यात घेतले असून त्याच्याकडून एकूण १,७८,२५० रुपयांचा मुद्देमाल जप्त करण्यात यश मिळवले आहे. आशिष जानकीराम चौधरी (वय २६ वर्षे, रा. सोनापूर देशपांडे, ता. गोंडपिपरी, जि. चंद्रपूर) असे अटक करण्यात आलेल्या सराईत आरोपीचे नाव आहे.

Sonapur Burglary Case मध्ये पोलिसांना आरोपीचा माग कसा लागला?

पोलीस सूत्रांकडून मिळालेल्या माहितीनुसार, उप पोलीस स्टेशन लाठी अंतर्गत येणाऱ्या मौजा सोनापूर येथे नुकतीच एक मोठी घरफोडीची घटना घडली होती. या गुन्ह्याचे गांभीर्य ओळखून चंद्रपूर स्थानिक गुन्हे शाखा आणि लाठी पोलिसांच्या पथकाने संयुक्तरित्या तपासाची चक्रे वेगाने फिरवली. तपासादरम्यान आधुनिक तांत्रिक विश्लेषणाचा (Technical Analysis) प्रभावी वापर करण्यात आला, ज्याच्या आधारे संशयित आरोपी आशिष चौधरी हा तेलंगणा राज्यात पळून गेल्याची खात्रीशीर माहिती पोलिसांना मिळाली. माहिती मिळताच चंद्रपूर पोलिसांनी तात्काळ एक विशेष पथक तेलंगणाकडे रवाना केले आणि गुन्हा घडल्यापासून अवघ्या २४ तासांच्या आत आरोपीला तेलंगणातून बेड्या ठोकून चंद्रपुरात आणले.

पोलीस कोठडीत आरोपी आशिष चौधरी याला विश्वासात घेऊन सखोल विचारपूस केली असता, त्याने दोन वेगवेगळ्या पोलीस ठाण्यांच्या हद्दीतील घरफोडीचे गुन्हे केल्याची कबुली दिली असून त्याचे दोन मोठे गुन्हे उघडकीस आले आहेत. यामध्ये लाठी पोलीस ठाण्यांतर्गत दाखल अपराध क्र. ४२/२६ कलम ३०५ (a), ३३१(४) BNS अन्वये नोंद असलेल्या घरफोडीच्या गुन्ह्यातील चोरीच्या रकमेपैकी १,६३,२५० रुपये नगदी जप्त करण्यात पोलिसांना यश आले आहे. इतकेच नव्हे तर चोरीच्या पैशांतून आरोपीने स्वतःसाठी खरेदी केलेले १५,००० रुपये किमतीचे २ नवीन मोबाईल फोन देखील पोलिसांनी हस्तगत केले आहेत. याशिवाय, गोंडपिपरी पोलीस स्टेशनच्या हद्दीतील अपराध क्र. २५२/२४ कलम ३०३(२) BNS अन्वये दाखल घरफोडीच्या गुन्ह्याचाही उलगडा झाला असून, या गुन्ह्यासाठी आरोपीने वापरलेली दुचाकी (बाईक) ही गोंडपिपरी पोलीस ठाण्याच्या हद्दीतूनच चोरली असल्याचे तपासात निष्पन्न झाले आहे.

आरोपीकडून दोन्ही गुन्ह्यांमधील १,७८,२५० रुपयांचा एकूण मुद्देमाल जप्त केल्यानंतर, त्याला पुढील कायदेशीर कारवाई आणि सखोल तपासासाठी लाठी पोलिसांच्या स्वाधीन करण्यात आले आहे. सदरची धडक आणि कौतुकास्पद कामगिरी चंद्रपूरचे पोलीस अधीक्षक श्री आयुष नोपानी आणि अपर पोलीस अधीक्षक श्री ईश्वर कातकडे यांच्या मार्गदर्शनाखाली पार पडली. या कारवाईचे नेतृत्व स्थानिक गुन्हे शाखा चंद्रपूरचे पोलीस निरीक्षक श्री अमोल काचोरे यांनी केले असून, पथकातील सपोनि श्री दीपक काँक्रेटवार, सपोनि श्री बलराम झाडोकार, स. फौ. स्वामीदास चालेकर, पोहवा अजय बागेसर, पो.अं. गोपीनाथ नरोटे, शेखर माथनकर, चापोअ ऋषभ बारसिंगे तसेच लाठी पोलीस ठाण्याचे पोहवा अशोक मंजुळकर यांनी या तपासात अत्यंत महत्त्वाची भूमिका बजावली आहे.