डायल 112 वर ‘4 जण मेले’ असा कॉल; पोलिस घटनास्थळी पोहोचताच उघड झाले धक्कादायक सत्य

चंद्रपूर: Shegaon Fake Call Case मुळे चंद्रपूर जिल्ह्यात खळबळ उडाली आहे. चिमूर तालुक्यातील सावरी बिडकर गावातील एका मद्यधुंद व्यक्तीने डायल 112 वर चार जण दारू पिऊन मृत पडल्याची खोटी माहिती देऊन पोलिसांची दिशाभूल केली. पोलिसांनी घटनास्थळी धाव घेत तपास केला असता माहिती खोटी असल्याचे उघड झाले. आरोपीकडून धारदार चाकू जप्त करण्यात आला असून त्याच्याविरुद्ध विविध कलमांखाली गुन्हा दाखल करण्यात आला आहे. (दारूसाठी पैसे दिले नाही, मुलाने गरम भाजी वडिलांच्या अंगावर टाकली)

चंद्रपूर जिल्ह्यातील शेगांव पोलीस ठाण्याच्या हद्दीत एक खळबळजनक आणि तितकीच धक्कादायक घटना समोर आली आहे । गावात ४ जण दारू पिऊन मरून पडल्याची खोटी माहिती ‘डायल ११२’ वर देऊन पोलिसांची दिशाभूल करणाऱ्या आणि सार्वजनिक रस्त्यावर धारदार चाकूसह लोकांवर चालून जाणाऱ्या एका अट्टल मद्यप्याला पोलिसांनी रंगेहात अटक केली आहे. किशोर निळकंठ खोब्रागडे (वय ३७ वर्षे, रा. सावरी बिडकर, ता. चिमूर) असे अटक करण्यात आलेल्या आरोपीचे नाव आहे.

Shegaon Fake Call Case मध्ये डायल 112 वर नेमका काय कॉल आला?

पोलिसांनी दिलेल्या माहितीनुसार, १४ जून २०२६ रोजी सकाळी नेहमीप्रमाणे पोलीस पथक कर्तव्य बजावत असताना, दुपारी १२:१२ वाजताच्या सुमारास पोलिसांच्या ‘डायल ११२’ या आपत्कालीन क्रमांकावर एक फोन आला. फोन करणाऱ्या किशोर खोब्रागडे याने “सावरी बिडकर गावात ४ लोक दारू पिऊन मरून पडले आहेत”, अशी धक्कादायक माहिती दिली. घटनेचे गांभीर्य ओळखून पोलिसांनी तात्काळ सावरी गावच्या पोलीस पाटलांशी संपर्क साधला, मात्र त्यांनी गावात अशी कोणतीही घटना घडली नसल्याचे स्पष्ट केले.

घटनास्थळी पोलिसांना पाहताच उघड झाले सत्य

माहितीची सत्यता तपासण्यासाठी शेगांव पोलीस ठाण्याचे पोलीस हवादार संतोष निशाद हे सहकारी पोलीस अंमलदार राहुल राऊत, प्रफुल कांबळे आणि चालक रामेश्वर भिसे यांच्यासह शासकीय वाहनाने तातडीने दुपारी १२:५५ वाजता सावरी गावातील सार्वजनिक रस्त्यावरील विहाराजवळ पोहोचले. तिथे पोहोचल्यावर पोलिसांना लोकांची मोठी गर्दी जमलेली दिसली.

गर्दीच्या मध्यभागी एक इसम तुफान दारू पिऊन येणाऱ्या-जाणाऱ्या नागरिकांना अश्लील शिवीगाळ करत, असभ्य वर्तन करून गोंधळ घालत होता । पोलिसांनी त्याला ताब्यात घेऊन चौकशी केली असता, त्यानेच तो खोटी माहिती देणारा ‘काॅलर’ किशोर खोब्रागडे असल्याचे कबूल केले आणि “गावात कोणीही मेले नाही, मी खोटी माहिती दिली”, असे पोलिसांना सांगितले.

कमरेला लपवला होता धारदार चाकू; जीवे मारण्याची देत होता धमकी

दारूच्या नशेत धुंद असलेला आरोपी किशोर खोब्रागडे पोलिसांचे ऐकण्याच्या मनस्थितीत नव्हता. “मी आज कोणाला तरी चाकूने खुपसून मारून टाकतो”, अशी जाहीर धमकी तो तिथल्या गर्दीला देत होता. परिस्थिती हाताबाहेर जात असल्याचे पाहून पोलीस हवालदार संतोष निशाद यांनी तात्काळ तिथल्या दोन स्थानिक नागरिकांना लेखी सूचना देऊन पंच म्हणून हजर राहायला सांगितले.

पंचांसमक्ष व पोलीस कर्मचाऱ्यांच्या मदतीने आरोपीची अंगझडती घेतली असता, त्याच्या कमरेला कपड्यात गुंडाळलेली एक लोखंडी वस्तू आढळली. ते कापड उघडून पाहिले असता, त्यामध्ये लोखंडी धारदार पाते असलेला चाकू मिळून आला. पोलिसांनी पंचांसमक्ष तो चाकू जप्त केला.

वैद्यकीय तपासणीत मद्यप्राशन केल्याचे उघड; गुन्हा दाखल

चाकू जप्त केल्यानंतर पोलिसांनी आरोपीला ताब्यात घेतले आणि त्याची वैद्यकीय तपासणी करण्यासाठी त्याला उपजिल्हा रुग्णालय, वरोरा येथे नेण्यात आले. तेथील वैद्यकीय अधिकाऱ्यांनी आरोपी किशोर खोब्रागडे हा पूर्णपणे दारूच्या अंमलाखाली (नशेत) असल्याचा लेखी अहवाल पोलिसांना दिला.

याप्रकरणी फिर्यादी पोलीस हवालदार संतोष निशाद यांच्या तक्रारीवरून शेगांव पोलिसांनी आरोपी किशोर खोब्रागडे विरुद्ध भारतीय हत्यार कायदा (शस्त्र अधिनियम, १९५९) कलम ४, २५ सह महाराष्ट्र दारूबंदी अधिनियम, १९४९ चे कलम ८५(१) अन्वये गुन्हा नोंदवला आहे.

तपासाची सद्यस्थिती: शेगांव पोलीस ठाण्याचे ठाणे प्रभारी अधिकारी योगेंद्रसिंह राजेंद्रसिंह यादव (पोलीस निरीक्षक) यांच्या मार्गदर्शनाखाली या गुन्ह्याची रीतसर नोंद करण्यात आली असून, पुढील तपासाची धुरा पोलीस उपनिरीक्षक सुमित ईश्वर कांबळे यांच्याकडे सोपवण्यात आली आहे.