चंद्रपूर (ब्रम्हपुरी):(Bramhapuri Sword Threat) चंद्रपूर जिल्ह्यातील ब्रम्हपुरी तालुक्यातील उचली गावात कौटुंबिक वादातून एका पतीने पत्नी, मेहुणा आणि नातेवाईकांना तलवारीचा धाक दाखवत जीवे मारण्याची धमकी दिल्याची घटना समोर आली आहे. पोलिसांनी आरोपीविरुद्ध BNS आणि शस्त्र अधिनियमांतर्गत गुन्हा दाखल करून तलवार जप्त केली आहे. (मालमत्तेच्या वादात वडिलांवर जीवघेणा हल्ला, वडिलांचा मृत्यू)
चंद्रपूर जिल्ह्यातील ब्रम्हपुरी पोलीस ठाण्याच्या अंतर्गत येणाऱ्या उचली गावात कौटुंबिक वादातून एका पतीने आपल्याच पत्नीला, मेहुण्याला आणि नातेवाईकांना तलवारीचा धाक दाखवून शिवीगाळ करत जीवे मारण्याची धमकी दिल्याचा धक्कादायक प्रकार उघडकीस आला आहे. याप्रकरणी मेहुण्याने दिलेल्या तक्रारीवरून ब्रम्हपुरी पोलिसांनी आरोपी पतीविरुद्ध भारतीय न्याय संहिता आणि शस्त्र अधिनियमाच्या विविध कलमान्वये गुन्हा दाखल केला असून घटनास्थळावरून तलवार जप्त केली आहे.
Bramhapuri Sword Threat प्रकरणात नेमके काय घडले?
या संदर्भातील सविस्तर वृत्त असे की, फिर्यादी अजय लालाजी जगझापे (वय २४, व्यवसाय- इलेक्ट्रिक काम, रा. उचली, ता. ब्रम्हपुरी) यांची लहान बहीण शालू हिचे गावातीलच स्वप्निल रामकृष्ण ढोंगे (वय ३८, रा. उचली) याच्यासोबत प्रेमसंबंध जुळले होते. त्यानंतर १० सप्टेंबर २०२० रोजी त्यांनी ब्रम्हपुरी येथील संघभूमी खेड रोड येथे प्रेमविवाह केला होता व तेव्हापासून ती पतीसोबत उचली गावातच नांदत होती. मात्र, गेल्या काही दिवसांपासून त्यांच्यात कौटुंबिक कारणावरून सातत्याने वाद होत होते. २५ जून २०२६ रोजी देखील पती स्वप्निल याने शालू हिच्याशी तीव्र वाद घातल्यामुळे तिने कायदेशीर निवारण होण्यासाठी पोलीस ठाण्यातील कौटुंबिक निवारण केंद्रात पतीविरुद्ध तक्रार दाखल केली होती.
पोलीस ठाण्यात तक्रार दिल्यानंतर, २५ जून २०२६ रोजी सायंकाळी ५:०० वाजताच्या सुमारास शालू ढोंगे हिचे कपडे, औषधांच्या गोळ्या आणि आधार कार्ड आणण्यासाठी फिर्यादी अजय जगझापे, त्यांची बहीण शालू, मोठा भावोजी सुभाष मेश्राम आणि मेहुणा बंडू वाघमारे असे सर्वजण मिळून स्वप्निलच्या घरी गेले होते. त्या वेळी आरोपी स्वप्निल ढोंगे हा घरातच हजर होता. बहीण शालू घरात जाऊन आपले कपडे, औषधे आणि आधार कार्ड घेऊन जशी घराबाहेर आली, तसा आरोपी स्वप्निलचा पारा चढला. तो शालूला ‘तुला माझ्यासोबत राहायचे आहे किंवा नाही?’ असे म्हणून फिर्यादी व त्याच्या बहिणीला अश्लील शिवीगाळ करू लागला आणि त्यांना जीवे मारण्याची धमकी देऊ लागला. यावर शालूने ‘मला तुझ्यासोबत आता नांदायचे नाही’ असे स्पष्ट सांगून सर्वजण आपल्या गावाकडे निघण्यास निघाले.
हे ऐकताच आरोपी स्वप्निल ढोंगे घरात गेला आणि हातामध्ये एक लांब लोखंडी तलवार घेऊन बाहेर आला. त्याने पुन्हा एकदा तलवारीचा धाक दाखवून शालूला शिवीगाळ करत मारण्याची धमकी दिली. या वेळी फिर्यादी अजय जगझापे यांनी मध्यस्थी करत आरोपीला अटकाव केला आणि ‘माझ्या बहिणीला कसा मारतोस?’ असे विचारले असता, आरोपीने अजय यांनाही तलवारीने मारण्याची धमकी दिली. परिस्थितीचे गांभीर्य ओळखून अजय यांनी हिंमत दाखवली आणि आरोपी स्वप्निलच्या हातातील ती जुनी वापरती लोखंडी तलवार हिसकावून घेतली. ती तलवार सुरक्षिततेच्या दृष्टीने आपल्या घरी ठेवून अजय यांनी बहिणीसह थेट ब्रम्हपुरी पोलीस ठाणे गाठले.
फिर्यादी अजय लालाजी जगझापे यांनी दिलेल्या तोंडी रिपोर्टवरून ब्रम्हपुरी पोलिसांनी २५ जून २०२६ रोजी रात्री २१:४५ वाजता आरोपी स्वप्निल रामकृष्ण ढोंगे याच्याविरुद्ध शस्त्र अधिनियम, १९५९ चे कलम २५ व ४ आणि भारतीय न्याय संहिता (BNS), २०२३ चे कलम ३५२ (गुन्हेगारी बळाचा वापर) व ३५१(२) (गुन्हेगारी धमकी) अन्वये गुन्हा दाखल केला आहे. सदर प्रकरणाचा तपास पोलीस स्टेशनचे प्रभारी अधिकारी प्रमोद गोविंदराव बनबाळे यांच्या मार्गदर्शनाखाली पोलीस हवालदार राजेंद्रनाथ जतींद्र मंडल (बकल नंबर २७८) यांच्याकडे सोपवण्यात आला असून पोलीस पुढील कायदेशीर कारवाई करत आहेत.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
