चंद्रपूर: चंद्रपूर बँक खात्यांचा गैरवापर प्रकरणात पैशांचे आमिष दाखवून तरुणाचे बँक खाते, एटीएम कार्ड आणि सिमकार्ड ताब्यात घेतल्याची तक्रार दाखल झाली आहे. याप्रकरणी चंद्रपूर शहर पोलीस ठाण्यात योगेश मिरानी याच्याविरुद्ध गुन्हा नोंदवण्यात आला आहे. तक्रारदार किशोर भावे (वय २४) यांच्या तक्रारीनुसार, त्यांच्या नावाने उघडलेल्या खात्यांमधून संशयास्पद व्यवहार झाले. पोलीस पुढील तपास करीत आहेत. (चंद्रपुरात २ युवकांनी अजगराला केले ठार, वाचा बातमी)
चंद्रपूर बँक खात्यांचा गैरवापर: प्रकरण नेमके काय आहे?
पैशांची निकड आणि आर्थिक अडचणीचा फायदा घेत तरुणाला आमिषाच्या जाळ्यात ओढून त्याच्या नावाचे बँक खाते, एटीएम कार्ड आणि सिमकार्ड ताब्यात घेत मोठे आर्थिक व्यवहार करून फसवणूक केल्याचा धक्कादायक प्रकार चंद्रपूर शहरात उघडकीस आला आहे. या प्रकरणी चंद्रपूर शहर पोलीस ठाण्यात योगेश मिरानी (रा. छत्रपती नगर गुरुद्वार वैष्णवी, पॅलेस प्लॉट नं. ४, तुकुम, चंद्रपूर) याच्याविरुद्ध भारतीय न्याय संहिता आणि माहिती तंत्रज्ञान अधिनियमाच्या विविध कलमान्वये गुन्हा दाखल करण्यात आला आहे. (चंद्रपूर बँक खात्यांचा गैरवापर)
तक्रारदार किशोर गरीबदास भावे (वय २४, मूळ रा. चांदापूर, पोस्ट फिस्कुटी, ता. मूल, जि. चंद्रपूर; सध्या रा. फुटाणानगर, डीआरसी हेल्थ क्लबमागे, अकील शेख यांच्या घरी भाड्याने, चंद्रपूर) हे गेल्या दीड वर्षापासून पडोली येथील शर्मा चौकातील नेक्सा शोरूमजवळ असलेल्या फ्लिपकार्ट डिलिव्हरी आउटलेटमध्ये डिलिव्हरी बॉय म्हणून काम करतात. सात-आठ महिन्यांपूर्वी त्यांच्यासोबत काम करणारा लखन भोयर (रा. चंद्रपूर) याच्याशी त्यांची ओळख झाली होती. कामादरम्यान एके दिवशी गांधी चौकात भेट झाली असता, पैशांची अडचण असल्यास ओळखीच्या व्यक्तीला स्वतःचे खाते उघडून वापरण्यास दिल्यास चांगले पैसे मिळतील, असे लखनने किशोर यांना सांगितले.
दुसऱ्या दिवशी लखनने किशोर यांची गांधी चौकात योगेश मिरानी याच्याशी ओळख करून दिली. खाते वापरण्यास दिल्यास पाच हजार रुपये आणि खाते उघडण्याचा खर्च देण्याचे आमिष योगेशने दाखवले. आर्थिक गरजेपोटी किशोर यास तयार झाले. (चंद्रपूर बँक खात्यांचा गैरवापर)
एअरटेल पेमेंट बँकेच्या कार्ड आणि सिमकार्डचाही गैरवापर, चंद्रपूर बँक खात्यांचा गैरवापर
मार्च २०२६ मध्ये किशोर आणि योगेश हे दोघे मूल येथील महाराष्ट्र ग्रामीण बँकेत गेले आणि किशोर यांच्या कागदपत्रांच्या आधारे खाते उघडण्यात आले. पासबुक आणि एटीएम मिळाल्यानंतर ते दोघे गांधी चौकात परत आले. तिथे किशोर यांनी महाराष्ट्र ग्रामीण बँकेचे पासबुक, एटीएम तसेच नवे घेतलेले जिओ कंपनीचे सिमकार्ड योगेशच्या ताब्यात दिले. त्या बदल्यात योगेशने त्यांना तात्काळ ३ हजार ५०० रुपये दिले. त्यानंतर जुलै महिन्याच्या सुमारास किशोर यांना मूल येथील महाराष्ट्र ग्रामीण बँकेतून फोन आला आणि खात्यात सुमारे एक लाख ते १५ लाख रुपयांपर्यंतचे व्यवहार झाल्याचे सांगून बँकेत बोलावण्यात आले. बँक व्यवस्थापकाशी विचारणा केल्यानंतर खात्यात संशयास्पद व फसवणुकीचे व्यवहार सुरू असल्याचे स्पष्ट झाले. त्यानंतर किशोर यांनी संबंधित खाते व एटीएम बंद करण्यास सांगितले.
मात्र, ऑगस्ट महिन्यात पुन्हा पैशांची गरज भासल्याने किशोर हे कागदपत्रे घेऊन गांधी चौकात योगेश मिरानी याला भेटले. योगेश त्यांना यश मोबाईल शॉपमध्ये घेऊन गेला आणि त्यांच्या कागदपत्रांवरून व तपशिलावरून एअरटेल पेमेंट बँकेचे एटीएमसदृश कार्ड, पासबुक व सिमकार्ड तयार करून घेतले. दोन दिवसांत पैसे देण्याचे सांगून योगेशने हे सर्व साहित्य स्वतःकडे ठेवून घेतले. बरेच दिवस पैसे न मिळाल्याने विचारणा केली असता तो ‘उद्या देतो, नंतर देतो’ अशी टाळाटाळ करू लागला. पुढे काही दिवसांतच एअरटेल पेमेंट बँकेच्या कार्ड, पासबुक आणि सिमकार्डचाही गैरवापर होत असल्याचे किशोर यांच्या लक्षात आले. त्याबाबत विचारणा केल्यावर योगेशने ‘तुझे खाते मी दुसऱ्याला वापरण्यास दिले असून त्यांच्याकडून पैसे आल्यावर देतो’ असे उत्तर दिले. (चंद्रपूर बँक खात्यांचा गैरवापर)
महाराष्ट्र ग्रामीण बँक आणि एअरटेल पेमेंट बँकेच्या खात्यांचा गैरवापर करून आपली फसवणूक केल्याचे तसेच इतरांनाही पैशांचे आमिष दाखवून अशाच प्रकारे खाती उघडण्यास भाग पाडून फसवणूक केल्याचे स्पष्ट झाल्यानंतर किशोर भावे यांनी २० नोव्हेंबर २०२६ रोजी दुपारी चंद्रपूर शहर पोलीस ठाण्यात तोंडी तक्रार नोंदवली. या तक्रारीवरून पोलिसांनी योगेश मिरानीविरुद्ध भारतीय न्याय संहितेच्या कलम ३१८(४), ३१९(२), ३१६(२) सह माहिती तंत्रज्ञान अधिनियम २००० च्या कलम ६६(क) व ६६(ड) अन्वये गुन्हा नोंदवला आहे. या प्रकरणाचा पुढील तपास पोलीस निरीक्षक श्याम गोविंदराव गव्हाणे यांच्या मार्गदर्शनाखाली सुरू आहे.
📢 NEWS34 WhatsApp Channel
ताज्या बातम्या सर्वात आधी मिळवण्यासाठी आमच्या WhatsApp Channel ला Follow करा.
✅ Follow Now







3 thoughts on “चंद्रपूर बँक खात्यांचा गैरवापर: पैशांचे आमिष दाखवून तरुणाची फसवणूक”