सिंदेवाही (चंद्रपूर): सिंदेवाही मोहफूल दारू निर्मिती आणि विक्रीविरोधात पोलिसांनी जाटलापूर रोड परिसरात धडक कारवाई केली आहे. पोलिसांनी दिलेल्या माहितीनुसार, या कारवाईत १,००,८०० रुपयांचा मुद्देमाल हस्तगत करण्यात आला. आरोपी निखिल बांबोळे याच्या कच्च्या घरातून १२ ड्रम मोहफूल सडवा आणि तयार दारू सापडली. हा मुद्देमाल पंचांच्या साक्षीने जागेवरच नष्ट करण्यात आला. आरोपीवर महाराष्ट्र दारूबंदी कायद्यान्वये गुन्हा दाखल झाला आहे. (चंद्रपुरात बँक खात्याचा सायबर गुन्ह्यासाठी वापर, गुन्हा दाखल, वाचा बातमी)
जाटलापूर रोडवरील घरावर पोलिसांची धाड, सिंदेवाही मोहफूल दारू
तालुक्यातील जाटलापूर रोड परिसरात अवैधपणे मोहफूल सडवा दारू तयार करून तिची विक्री करणाऱ्या एका आरोपीविरोधात सिंदेवाही पोलिसांनी धडक कारवाई करत सुमारे एक लाख आठशे रुपयांचा मुद्देमाल हस्तगत केला आहे. या कारवाईत दारू निर्मितीसाठी वापरण्यात येणारे साहित्य आणि कच्चा माल पंचांच्या समक्ष जागेवरच नष्ट करण्यात आला असून संबंधित आरोपीविरुद्ध महाराष्ट्र दारूबंदी कायद्यान्वये गुन्हा दाखल करण्यात आला आहे.
पोलिसांकडून मिळालेल्या माहितीनुसार, २१ नोव्हेंबर २०२६ रोजी दुपारी ३ वाजेच्या सुमारास सिंदेवाही पोलिसांना एका विश्वासार्ह खबऱ्यामार्फत खात्रीशीर माहिती मिळाली की, आंबेडकर चौक, सिंदेवाही येथील रहिवासी निखिल बांबोळे हा जाटलापूर रोडवरील स्वतःच्या मालकीच्या कच्च्या घरात गुप्तपणे मोहफूल सडवा दारू गाळत असून तिची विक्री करत आहे. माहितीची सत्यता पडताळण्यासाठी पोलिसांनी तात्काळ हालचाली करत दोन पंचांच्या उपस्थितीत आणि पोलीस पथकासह जाटलापूर रोडवरील संबंधित कच्च्या घरावर धाड टाकली.
घटनास्थळाची झडती घेतली असता घरातील दोन वेगवेगळ्या खोल्यांमध्ये मोहफूल सडवा दारू तयार करण्यासाठी मोहफुलांनी भरलेले एकूण १२ नग ड्रम आढळून आले. याशिवाय दारू गाळण्यासाठी लागणारे इतर विविध साहित्य तसेच तयार मोहा दारू असा एकूण १,००,८०० रुपये किमतीचा मुद्देमाल तेथे सापडला. कायदेशीर प्रक्रिया पूर्ण करत पोलिसांनी हा मुद्देमाल जप्त केला आणि पुढील धोका टाळण्यासाठी तो जागेवरच पंचांच्या साक्षीने नष्ट केला. या प्रकरणी आरोपी निखिल बांबोळे याच्याविरुद्ध सिंदेवाही पोलीस ठाण्यात अपराध क्रमांक ६४६/२६ अन्वये महाराष्ट्र दारूबंदी कायद्याच्या कलम ६५ (ई) व (फ) नुसार गुन्हा नोंदवण्यात आला आहे.
जिल्ह्यातील अवैध दारू विक्री व निर्मितीविरोधात सुरू असलेल्या मोहिमेचाच एक भाग म्हणून ही कारवाई पार पडली. चंद्रपूरचे पोलीस अधीक्षक श्री. आयुष नोपाणी यांच्या आदेशानुसार, अपर पोलीस अधीक्षक श्री. ईश्वर कातकडे आणि उपविभागीय पोलीस अधिकारी श्री. साहिल झरकर यांच्या मार्गदर्शनाखाली सिंदेवाही पोलीस ठाण्याच्या पोलीस निरीक्षक लता वाडीवे यांच्या नेतृत्वात हे पथक कार्यरत होते. या यशस्वी मोहिमेत नापोशी चिमाजी देवकते, नापोशी नारायण येगेवार, पोहवा सुधीर पराते, पोहवा श्वेता, पोअं जफर, पोअं शुभम, चापोअं ब्रिजेश निर्मल आणि चंचल यांनी महत्त्वाची भूमिका बजावली. या कारवाईमुळे परिसरातील अवैध दारू व्यावसायिकांमध्ये खळबळ उडाली असून पुढील तपास सिंदेवाही पोलीस करत आहेत.
📢 NEWS34 WhatsApp Channel
ताज्या बातम्या सर्वात आधी मिळवण्यासाठी आमच्या WhatsApp Channel ला Follow करा.
✅ Follow Now






