२४ तास स्वच्छतेचे कंत्राट; तरीही चंद्रपूर बसस्थानकात घाणीचे साम्राज्य! प्रवासी संतप्त

चंद्रपूर : Chandrapur Bus Stand Toilet ची गेल्या महिनाभरापासून अत्यंत बिकट दुरवस्था झाली आहे. बसस्थानकावरील स्वच्छतागृहातील अस्वच्छता आणि पसरलेल्या तीव्र दुर्गंधीमुळे प्रवाशांना मोठा त्रास सहन करावा लागत आहे. स्वच्छता राखण्याचे कंत्राट ‘स्मार्ट सर्विसेस’ या संस्थेला देण्यात आले आहे. तरीही प्रत्यक्ष स्वच्छतेकडे दुर्लक्ष होत असल्याचा आरोप प्रवासी करत आहेत. दररोज हजारो प्रवासी येथून ये-जा करतात. त्यामुळे बसस्थानक प्रशासनाने निष्काळजी कंत्राटदारावर तातडीने कारवाई करावी, अशी मागणी जोर धरत आहे. (हे हि वाचा – चंद्रपूर-मूल मार्गावर अपघात, महिला पोलीस कर्मचाऱ्याचा मृत्यू)

नियमानुसार बसस्थानकातील स्वच्छतागृह २४ तास स्वच्छ आणि वापरण्यायोग्य ठेवण्याची संपूर्ण जबाबदारी संबंधित कंत्राटदारावर सोपविण्यात आली आहे. मात्र, गेल्या महिन्याभरापासून येथे नियमित स्वच्छता केली जात नसल्याचे चित्र आहे. प्रवाशांनी दिलेल्या माहितीनुसार, कंत्राटदाराच्या कर्मचाऱ्यांकडून केवळ सकाळी एकदाच स्वच्छता केली जाते आणि त्यानंतर दिवसभर याकडे पूर्णपणे दुर्लक्ष होते. त्यामुळे अवघ्या काही तासांतच स्वच्छतागृहाची अवस्था बिकट होते. विशेषतः दुपारच्या सुमारास पाण्याची तीव्र टंचाई, साचलेली घाण आणि पसरणाऱ्या दुर्गंधीमुळे प्रवाशांना स्वच्छतागृहाचा वापर करणे अशक्यप्राय होऊन बसले आहे.

स्वच्छतागृह परिसरात पसरलेल्या तीव्र दुर्गंधीमुळे संपूर्ण बसस्थानकातील वातावरणावर विपरीत परिणाम होत असून महिला, ज्येष्ठ नागरिक आणि लहान मुलांसह प्रवास करणाऱ्या नागरिकांना याचा सर्वाधिक मानसिक व शारीरिक त्रास सहन करावा लागत आहे. २४ तास स्वच्छतेचे अधिकृत कंत्राट असताना कंत्राटदार नियमित स्वच्छता का करत नाही आणि या संपूर्ण प्रकाराकडे बसस्थानक प्रमुखांचे दुर्लक्ष का होत आहे, असा संतप्त प्रश्न आता प्रवाशांकडून उपस्थित केला जात आहे.

बसस्थानक हे दररोज हजारो प्रवाशांच्या वावराचे सार्वजनिक ठिकाण असल्याने तेथे स्वच्छता, मुबलक पाणी आणि आरोग्यदायी वातावरण उपलब्ध करून देणे ही प्रशासनाची प्राथमिक जबाबदारी आहे. त्यामुळे बसस्थानक प्रशासनाने तातडीने या समस्येची दखल घेऊन संबंधित कंत्राटदाराच्या कामाची पाहणी करावी, स्वच्छतागृहाची नियमित स्वच्छता व पुरेसा पाणीपुरवठा सुनिश्चित करावा आणि कंत्राटातील अटींचे उल्लंघन करत असल्याबद्दल संबंधित कंत्राटदारावर कठोर कारवाई करावी, अशी जोरदार मागणी प्रवाशांमधून केली जात आहे.