Chandrapur habitual thief arrested : चंद्रपूर, २५ नोव्हेंबर (News34) – तो तब्बल पाच वर्षांपासून चोरी आणि घरफोडीच्या गुन्ह्यांतून पोलिसांना हवा होता. मात्र तो सतत हातातून निसटत होता. दरम्यान, या काळात त्याने मंदिर, चर्च आणि दीक्षाभूमीतील बौद्ध विहारातील दानपेट्या फोडल्या. परंतु मोटारसायकल चोरीच्या गुन्ह्याचा छडा लावत असताना स्थानिक गुन्हे शाखेच्या पथकाला हा अट्टल चोर अखेर गवसला.
स्थानिक गुन्हे शाखेने शहरातील वाढत्या मोटारसायकल चोरीच्या गुन्ह्यांचा छडा लावण्यासाठी मोहीम सुरू केली. यादरम्यान, पोलिसांनी महाकाली कॉलरी, चंद्रपूर येथील रहिवासी ३५ वर्षीय प्रतीक उर्फ राहुल वनराज झाडे (हल्ली मुक्काम – छोटा नागपूर) याला ताब्यात घेतले. चौकशीदरम्यान त्याने नागपूर आणि रामनगर पोलीस स्टेशनच्या हद्दीत विविध चोरीचे गुन्हे केल्याची कबुली दिली.
तपासात पुढे आले की, आरोपीवर अनेक गुन्हे दाखल असून तो पाच वर्षांपासून फरार होता. या दरम्यान, त्याने दादमहलमधील हनुमान मंदिर, जयंत टॉकीजजवळील चर्च, दीक्षाभूमीतील बौद्ध विहार आणि लक्ष्मीनारायण मंदिर येथील नगदी चोरी केली.
यासोबतच, नागपूर जिल्ह्यातील इमामवाडा आणि चंद्रपूर रामनगर पोलीस स्टेशनच्या हद्दीतून चार मोटारसायकली—होंडा ऍक्टिव्हा (MH34 AS 8353), होंडा शाईन (MH27 CK 7050), MH31 AS EX 2471, MH49 B 0358—आणि तीन मोबाईल असा एकूण ५ लाख ३० हजारांचा मुद्देमाल जप्त करण्यात आला.
ही कारवाई पोलीस अधीक्षक मुमक्का सुदर्शन, अपर पोलीस अधीक्षक ईश्वर कातकडे यांच्या मार्गदर्शनाखाली करण्यात आली. स्थानिक गुन्हे शाखेचे पोलीस निरीक्षक अमोल काचोरे यांच्या नेतृत्वात पोउपनि विनोद भुरले, सुनील गौरकार, सुभाष गोहोकर, सतीश अवथरे, रजनीकांत पुठ्ठावार, दीपक डोंगरे, इम्रान खान, हिरालाल गुप्ता, किशोर वाकाटे आणि शशांक बदामवार यांनी ही यशस्वी कारवाई केली.
Leave a Comment