Thursday, April 25, 2024
Homeक्रीडाचंद्रपूर स्थानिक गुन्हे शाखेच्या कर्मचाऱ्याला घरफोडी प्रकरणी अटक

चंद्रपूर स्थानिक गुन्हे शाखेच्या कर्मचाऱ्याला घरफोडी प्रकरणी अटक

चंद्रपूर पोलीस विभागात खळबळ

- Advertisement -
- Advertisement -

News34 chandrapur

चंद्रपूर – चंद्रपूर जिल्ह्यातील गुन्हेगारीवर नियंत्रण ठेवण्याकरिता असलेला विभाग म्हणजे स्थानिक गुन्हे शाखा मात्र या विभागातील कर्मचारी स्वतः घरफोडी प्रकरणातील मुख्य आरोपी निघाल्याने जिल्हा पोलीस दलात चांगलीच खळबळ उडाली आहे.

 

शहरातील तुकूम भागात राहणाऱ्या इरफान शेख यांच्या घरी चोरी झाल्याची तक्रार 15 नोव्हेम्बरला रामनगर पोलीस स्टेशनमध्ये नोंदविण्यात आली होती.

 

इरफान शेख हे पत्नीसह 9 नोव्हेम्बरला हज ला गेले होते, या दरम्यान त्यांच्या घरी अज्ञातांने दाराचे कुलूप तोडत आत प्रवेश करीत अलमारीत ठेवलेले 12 हजार रुपये चोरून नेले.

 

रामनगर पोलीस ठाण्यात चोरीची तक्रार दाखल झाली, रामनगर पोलिसांच्या गुन्हे शोध पथकाने तपास सुरू केला, परिसरातील सीसीटीव्ही फुटेज तपासले, सदर प्रकरणी पोलिसांनी सर्व बाबी तपासत 4 दिवसांनी स्थानिक गुन्हे शाखेचे पोलीस कर्मचारी नरेश डाहूले यांना रामनगर पोलिसांनी अटक केली. विशेष बाब म्हणजे शेख हे डाहूले यांच्या घराशेजारी राहत होते, ते हज ला गेले ही बाब डाहूले यांना माहिती होती.

 

नरेश डाहूले यांना न्यायालयात हजर केले असता त्यांना 14 दिवसांची न्यायालयीन कोठडी सुनावण्यात आली.

 

मिळालेल्या माहिती नुसार आरोपी पोलीस कर्मचारी नरेश डाहूले यांनी याआधी सुद्धा 2 ते 3 घरफोडी केल्याचा संशय आहे त्याबाबत पोलीस तपास करीत आहे.

 

चंद्रपूर जिल्ह्यात दिवाळीनिमित्त पोलिसांच्या मोहिमेची चर्चा..

दिवाळीचा सण साजरा करण्यासाठी अनेक नागरिक आपल्या गावी जातात, मात्र गावी गेल्यावर याबाबत स्थानिक पोलीस स्टेशनमध्ये माहिती द्या अशी जनजागृती चंद्रपूर पोलीस विभागाने केली, मात्र या जनजागृतीचा पोलिसरूपी चोराने स्वतःचा फायदा करवून घेतला, रामनगर पोलीस स्टेशनच्या हद्दीत डाहूले यांनी घरफोडी करीत पोलिसांच्या मोहिमेचा फज्जा उडविला.

 

पोलिसांना आधीच डाहूले यांचा सुगावा?

सूत्रांच्या माहितीनुसार डाहूले यांच्या गुन्हेगारीबाबत पोलिसांना सुगावा लागला होता, हे धंदे बंद करा अशी चेतावणी सुद्धा त्यांना देण्यात आली होती, मात्र दिवसा पोलीस व रात्री चोर अशी भूमिका डाहूले पार पाडत राहिले.

 

स्थानिक गुन्हे शाखा झाली अनियंत्रित?

वर्षभरापासून जिल्ह्यातील गुन्हेगारीने डोके वर काढले आहे, गोळीबार, हत्या, तंबाखू तस्करी, सट्टेबाजी, कोळसा तस्करी, घरफोडी या गुन्ह्यात सतत वाढ होत आहे, विशेष म्हणजे वर्षभरापूर्वी पडोली येथील स्टेट बँक ऑफ इंडियाच्या शाखेतील दरोडा प्रकरणातील स्थानिक आरोपी वगळता मुख्य आरोपीना अजूनही अटक करण्यात आली नाही. अश्यातच आता पोलीस कर्मचारी स्वतः गुन्हे करू लागले असल्याने नागरिक सुरक्षित कसे राहणार हा मोठा प्रश्न आहे.

 

चंद्रपूर पोलीस विभाग नॉट रिचेबल

पोलीस दलातील कर्मचारी गुन्ह्यात मुख्य आरोपी असल्याने पोलीस विभागावर नामुष्की ओढावली आहे, या प्रकरणाची माहिती घेण्यासाठी वरिष्ठ अधिकाऱ्याना संपर्क साधण्याचा प्रयत्न करण्यात आला मात्र अनेकांनी उत्तर देण्याचे टाळले.

 

आरोपीची पोलीस कोठडी का नाही?

लहान गुन्ह्यात पोलीस विभाग आरोपीची पोलीस कोठडी मागतात मात्र या गंभीर गुन्ह्यात आरोपी पोलीस कर्मचारी नरेश डाहूले यांची पोलीस कोठडी का मागण्यात आली नाही? डिपार्टमेंट च्या माणसाला वाचविण्याचा तर प्रयत्न नाही ना अशी चर्चा आता जनमानसात रंगली आहे.

RELATED ARTICLES

Recent News

Most Popular

error: Content is protected !!