Rajura suicide case । महिला, नेता व पोलिसांच्या जाचाला कंटाळून कुल्फी व्यावसायिकाचे आत्मदहन

Rajura suicide case : राजुरा – चंद्रपूर जिल्ह्यातील राजुरा येथील एका धक्कादायक घटनेत, गेल्या अनेक वर्षांपासून गडचांदूर रोड परिसरात कुल्फीचा व्यवसाय करणारे ४० वर्षीय व्यावसायिक राजू गराडी यांनी चंद्रपूर येथे स्वतःला पेटवून घेत आत्मदहन केले. या दुर्दैवी घटनेत उपचारादरम्यान त्यांचा मृत्यू झाला आहे. राजू गराडी हे मागील काही महिन्यांपासून तीव्र मानसिक तणावाखाली होते आणि त्यांच्या मृत्यूनंतर सोशल मीडियावर एक व्हिडिओ प्रचंड व्हायरल होत आहे, ज्यामुळे संपूर्ण परिसरात खळबळ उडाली आहे. (घरफोडी केली आणि मोबाईल घेतला, २१ वर्षीय तरुणाचा प्रताप)

मृत्यूपूर्वीच्या व्हिडिओत Rajura suicide case नेमके कोणते आरोप करण्यात आले?

या व्हायरल व्हिडिओमध्ये त्यांनी आत्महत्येसारखे टोकाचे पाऊल उचलण्यापूर्वी काही गंभीर आरोप केले आहेत. एका महिलेने आपल्यावर खोटे आणि विनाकारण आरोप करून त्रास दिल्याचा दावा त्यांनी यात केला असून, तिच्या सांगण्यावरून पोलिसांनी आपल्याविरुद्ध गुन्हा दाखल केल्याचे म्हटले आहे. एवढेच नाही तर एका स्थानिक राजकीय नेत्याने त्यांना दुकान बंद करण्याची धमकी देत शिवीगाळ केल्याचा उल्लेखही त्यांनी केला आहे. Rajura suicide case

घरातून दुचाकी चोरीला गेल्यानंतर पोलिसांनी कोणतीही ठोस कारवाई केली नाही, उलट कोणताही गुन्हा नसताना पोलीस वारंवार ठाण्यात बोलावून मानसिक छळ करत असल्याचा आरोपही त्यांनी मृत्यूपूर्वी केला. या अन्यायाविरोधात त्यांनी जिल्हा पोलीस अधीक्षकांकडे दोनदा लेखी तक्रार करूनही त्यांना न्याय मिळाला नाही.

अखेर खोट्या आरोपांना आणि सततच्या मानसिक त्रासाला कंटाळून जीवन जगण्याचा अर्थ उरला नसल्याने आपण हे पाऊल उचलत असल्याचे त्यांनी व्हिडिओत नमूद केले होते. उपचारादरम्यान त्यांचा मृत्यू झाल्यानंतर आता हा व्हिडिओ वेगाने पसरत असून, गराडी यांनी घेतलेल्या नावांवर पोलीस प्रशासन आता काय कारवाई करणार, याकडे सर्वांचे लक्ष लागले आहे.