भद्रावती – Bus Stand Crime प्रकरणामुळे भद्रावती शहरात खळबळ उडाली आहे. बस स्टॉपवरील गर्दीचा फायदा घेत अज्ञात चोरट्याने महिला डॉक्टरच्या बॅगेतील २२ हजार रुपयांची रोकड, एटीएम कार्ड, क्रेडिट कार्ड, ओळखपत्रे आणि इतर महत्त्वाची कागदपत्रे असलेली पर्स चोरी केली. या घटनेनंतर भद्रावती पोलिसांनी अज्ञात आरोपीविरुद्ध गुन्हा दाखल करून तपास सुरू केला आहे. (वाढदिवसाला गेलेल्या कुटुंबाच्या घरी दरोडा)
भद्रावती येथे बस स्टॉप वर गर्दीचा फायदा घेत महिला डॉक्टरची २२ हजार रुपयांच्या रोख रकमेसह सोन्या-चांदीचे आणि महत्त्वाचे दस्तऐवज असलेली पर्स अज्ञात चोराने लांबवल्याची घटना समोर आली आहे . या प्रकरणी भद्रावती पोलीस ठाण्यात १६ जून २०२६ रोजी रीतसर पोलीस तक्रार दाखल करण्यात आली आहे.
Bus Stand Crime मुळे भद्रावतीत खळबळ
मिळालेल्या माहितीनुसार, भद्रावती येथील रजवाडा टाऊनशिपमध्ये राहणाऱ्या ५६ वर्षीय होमिओपॅथिक डॉक्टर सौ. ममता योगेश सारडा या आपल्या कुटुंबासह वास्तव्यास आहेत. ११ जून २०२६ रोजी दुपारी ३:४० वाजताच्या सुमारास त्या आपले पती योगेश सारडा यांच्यासोबत नातेवाईकांच्या अस्थी विसर्जनासाठी हरिद्वार येथे जाण्याकरिता नागपूरला निघाल्या होत्या. नागपूरला जाण्यासाठी त्या भद्रावती बस स्टॉपवर आल्या आणि बसची वाट पाहत उभ्या राहिल्या. यादरम्यान चंद्रपूरकडून नागपूरच्या दिशेने जाणाऱ्या दोन बसेस तेथे आल्या, मात्र दोन्ही बसेस प्रवाशांनी प्रचंड भरलेल्या होत्या. बसमध्ये मोठी गर्दी असल्याने त्यांनी त्या दोन्ही बसेस सोडून दिल्या आणि त्या बस स्टॉपवरील चौकशी कार्यालयाजवळ (Inquiry Office) आल्या.
चौकशी कार्यालयाजवळ आल्यावर ममता सारडा यांच्या अचानक लक्षात आले की त्यांच्या खांद्याला अडकवलेल्या बॅगची चेन खुली होती. त्यांनी तातडीने बॅगची तपासणी केली असता, त्यातील गुलाबी रंगाची छोटी पर्स गायब असल्याचे त्यांच्या निदर्शनास आले. बस पकडण्याच्या गडबडीत आणि गर्दीचा फायदा घेऊन अज्ञात चोराने त्यांच्या खांद्यावरील बॅगची चेन उघडून आतील पर्स चोरून नेली होती.
चोरीला गेलेल्या या पर्समध्ये २२ हजार रुपयांची रोकड, तीन एटीएम कार्ड, एक क्रेडिट कार्ड, दोन इलेक्शन कार्डे, पॅन कार्ड, ड्रायव्हिंग लायसन्स, दोन सीजीएचएस कार्डे, पेन्शनर आयडी कार्ड, डॉक्टर आयडी कार्ड आणि होमिओपॅथिक कौन्सिल कार्ड असे अत्यंत महत्त्वाचे दस्तऐवज व ओळखपत्रे होती. अस्थी विसर्जनाच्या धार्मिक विधीसाठी तातडीने हरिद्वारला जाणे अनिवार्य असल्याने, डॉक्टर ममता सारडा या प्रवास पूर्ण करून १६ जून २०२६ रोजी भद्रावती येथे परतल्या आणि त्यांनी थेट पोलीस स्टेशन गाठून या चोरीची तोंडी तक्रार नोंदवली.
या तक्रारीच्या आधारे भद्रावती पोलिसांनी १६ जून २०२६ रोजी अज्ञात आरोपीविरुद्ध भारतीय न्याय संहिता (BNS), २०२३ च्या कलम ३०३(२) अन्वये गुन्हा दाखल केला आहे. या घटनेचा पुढील सखोल तपास पोलीस निरीक्षक वीरेंद्र देवराव केदारे यांच्या मार्गदर्शनाखाली पोलीस हवादार राहुल भोयर करत आहेत. बसस्थानकावरील गर्दीच्या ठिकाणी प्रवाशांनी आपल्या दागिन्यांची आणि पैशांची काळजी घ्यावी, असे आवाहनही या घटनेच्या पार्श्वभूमीवर पोलिसांकडून करण्यात येत आहे.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
