चंद्रपुरात पोलिसांचा “सुरक्षा मंत्र”; विद्यार्थ्यांच्या रक्षणासाठी नवीन उपक्रम सुरू!

चंद्रपूर – Chandrapur Police Suraksha Mantra पुस्तिकेचा नुकताच भव्य शुभारंभ झाला आहे. चंद्रपूर पोलीस दलाने हा अत्यंत स्तुत्य उपक्रम राबवला आहे. नागपूर परिक्षेत्राचे विशेष पोलीस महानिरीक्षक संदीप पाटील यांच्या हस्ते या पुस्तिकेचे विमोचन करण्यात आले. शालेय विद्यार्थ्यांना विविध धोक्यांपासून सावध ठेवणे हा यामागचा मुख्य उद्देश आहे. (चंद्रपूर जिल्ह्यात अतिक्रमण धारकांना पट्ट्याचे वाटप सुरु)

चंद्रपूर जिल्ह्यातील शालेय विद्यार्थ्यांना विविध सामाजिक, कायदेशीर, ऑनलाईन फसवणूक तसेच मानसिक ताण-तणावाच्या संकटांपासून सावध ठेवण्यासाठी आणि त्यांच्यात सुरक्षिततेबाबत जनजागृती निर्माण करण्यासाठी चंद्रपूर पोलीस दलाने एक महत्त्वपूर्ण पाऊल उचलले आहे. पोलीस अधीक्षक, चंद्रपूर यांच्या संकल्पनेतून विशेषरीत्या तयार करण्यात आलेल्या “सुरक्षा मंत्र” या मार्गदर्शन पुस्तिकेचा नागपूर परिक्षेत्राचे विशेष पोलीस महानिरीक्षक श्री. संदीप पाटील यांच्या शुभहस्ते नुकताच भव्य शुभारंभ करण्यात आला आहे. “आधुनिक जगात एक पाऊल पुढे” या ध्येयाने प्रेरित होऊन तयार करण्यात आलेली ही डिजिटल व मुद्रित पुस्तिका विद्यार्थी, पालक आणि शिक्षकांसाठी अत्यंत अनमोल आणि व्यावहारिक मार्गदर्शक ठरणार आहे.

Chandrapur Police Suraksha Mantra उपक्रमाचा मुख्य उद्देश

विद्यार्थ्यांच्या सुरक्षेचा सर्वांगीण विचार करून तयार करण्यात आलेल्या या ‘सुरक्षा मंत्र’ पुस्तिकेत अनेक महत्त्वाच्या विषयांचा समावेश करण्यात आला आहे. यामध्ये बालकांना ‘चांगला स्पर्श व वाईट स्पर्श’ (Good Touch & Bad Touch) यातील फरक अत्यंत सोप्या भाषेत समजावून सांगण्यासोबतच लैंगिक अपराधांपासून बालकांचे संरक्षण करणाऱ्या पोक्सो (POCSO) कायद्याची बालसुलभ माहिती देण्यात आली आहे.

पुस्तिकेत ई-बुक स्वरूपात QR कोड्स

याशिवाय वाढत्या डिजिटल युगातील सायबर धोके, ऑनलाईन छळ, फोटो मॉर्फिंग आणि सायबर आर्थिक फसवणुकीपासून सुरक्षित राहण्याचे उपाय सुचवण्यात आले आहेत. तसेच अमली पदार्थांच्या दुष्परिणामांविषयी जनजागृती, परीक्षेचा ताण, मानसिक आरोग्य व्यवस्थापन आणि वाहतूक नियमांचे पालन करून रस्ते अपघात रोखण्याबाबतही यात सविस्तर मार्गदर्शन करण्यात आले आहे. युजर्सच्या सोयीसाठी या पुस्तिकेत ई-बुक स्वरूपात QR कोड्सचाही समावेश करण्यात आला आहे.

पुस्तिका शिक्षक व पालकांना दिशादर्शक

या उपक्रमामुळे विद्यार्थ्यांना स्वतःच्या अधिकारांची जाणीव होऊन अनुचित प्रकार घडल्यास निर्भयपणे आवाज उठवण्याचा आत्मविश्वास मिळणार आहे. सोबतच संवेदनशील विषयांवर मुलांशी कसा संवाद साधावा, यासाठी ही पुस्तिका शिक्षक व पालकांना दिशादर्शक ठरेल. आणीबाणीच्या प्रसंगी तातडीने मदत मिळवण्यासाठी चंद्रपूर पोलीस दलाने डायल ११२ (DIAL 112), दामिनी पथक (7741098112), चाइल्डलाईन (1098) आणि सायबर हेल्पलाइन (1930) हे आपत्कालीन क्रमांक जारी केले असून या उपक्रमामुळे पोलीस आणि नागरिकांमधील विश्वासाचे नाते अधिक दृढ होईल, असा विश्वास व्यक्त करण्यात आला आहे.