चंद्रपूर – Chandrapur Sagwan Wood वस्तूंचे फिरते विक्री केंद्र आज चंद्रपूरमध्ये सुरू करण्यात आले आहे. या केंद्राचे उद्घाटन जिल्हाधिकारी वसुमना पंत यांच्या हस्ते पार पडले. माविम आणि एफडीसीएम यांनी संयुक्तपणे या अभिनव उपक्रमाची सुरुवात केली आहे. महिलांना रोजगार आणि त्यांच्या उत्पादनांना हक्काची बाजारपेठ मिळवून देणे हा मुख्य उद्देश आहे. (हे हि वाचा – ५० एकरात मेडिकल हब)
जिल्ह्यातील वनसंपदेचा योग्य वापर करून महिलांच्या कौशल्याला व्यावसायिक स्वरूप दिले जात आहे. सागवान लाकडापासून बनवलेल्या दर्जेदार आणि आकर्षक वस्तू येथे विक्रीसाठी उपलब्ध आहेत.
जिल्हाधिकारी वसुमना पंत यांच्या हस्ते विक्री केंद्राचे उद्घाटन
चंद्रपूर जिल्ह्यातील प्रसिद्ध सागवान वनसंपदा आणि महिलांचे कौशल्य यांची सांगड घालून महिलांना रोजगार व त्यांच्या उत्पादनांना हक्काची बाजारपेठ उपलब्ध करून देण्याच्या उद्देशाने महिला आर्थिक विकास महामंडळ (माविम) आणि महाराष्ट्र वन विकास महामंडळ (एफडीसीएम) यांच्या संयुक्त विद्यमाने सागवान लाकडापासून निर्मित विविध वस्तूंचे फिरते विक्री केंद्र सुरू करण्यात आले आहे. या विक्री केंद्राचे उद्घाटन जिल्हाधिकारी वसुमना पंत यांच्या हस्ते आज करण्यात आले.
यावेळी महाराष्ट्र वन विकास महामंडळाच्या प्रादेशिक व्यवस्थापक दिव्य भारती, विभागीय व्यवस्थापक गणेश मोटकर, सहायक विभागीय व्यवस्थापक रुपेश पाटील, वन संरक्षण अधिकारी संभाजी कोंडेवार, महिला आर्थिक विकास महामंडळाचे जिल्हा समन्वय अधिकारी प्रदीप काठोळे, जिल्हा प्रकल्प सल्लागार भूषण मुंजेकर, नरेंद्र बनकर, अमित चवरे, खुशिया लोकसंचालित साधन केंद्राच्या अध्यक्षा सुनिता गणफाडे, व्यवस्थापक शारदा हुसे आदी उपस्थित होते.
Chandrapur Sagwan Wood: महिलांच्या कौशल्याला मिळाली योग्य दिशा
चंद्रपूर जिल्ह्याच्या दर्जेदार सागवानाची ओळख अधिक व्यापक करणे आणि त्याचवेळी महिलांना रोजगार व विपणनाच्या संधी उपलब्ध करून देणे, हा या अभिनव उपक्रमाचा प्रमुख उद्देश आहे. जिल्ह्यातील वनसंपदेचा योग्य वापर करून महिलांच्या कौशल्याला व्यावसायिक स्वरूप देण्याचा प्रयत्न माविम आणि एफडीसीएमच्या माध्यमातून करण्यात येत आहे.
फिरत्या विक्री केंद्रात शोभेच्या वस्तू आणि मोमेंटो उपलब्ध
या फिरत्या विक्री केंद्रात सागवान लाकडापासून तयार करण्यात आलेल्या आकर्षक मूर्ती, विविध प्रकारचे फर्निचर, खुर्च्या, टेबल, दरवाजे, कटिंग बोर्ड, मोमेंटो, नेमप्लेट, शोभेच्या वस्तू तसेच विविध कलाकुसरीच्या वस्तू विक्रीसाठी उपलब्ध आहेत. उत्तम दर्जाचे सागवान लाकूड, आकर्षक डिझाईन आणि महिलांच्या कौशल्यातून साकारलेल्या कलाकुसरीमुळे या उत्पादनांना विशेष वैशिष्ट्य प्राप्त झाले आहे.
नागरिकांनी वस्तू खरेदी करून महिलांना प्रोत्साहन देण्याचे आवाहन
या उपक्रमामुळे महिलांच्या कौशल्याला बाजारपेठ मिळण्यासोबतच स्थानिक स्तरावर रोजगारनिर्मिती, कौशल्य विकास आणि महिला बचत गटांच्या लघुउद्योगांना चालना मिळणार आहे. नागरिकांनी आपल्या गरजेनुसार सागवान लाकडापासून तयार केलेल्या दर्जेदार वस्तू खरेदी करून महिला उद्योजकांना प्रोत्साहन द्यावे, असे आवाहन करण्यात आले आहे.
या उत्पादनांबाबत अधिक माहितीसाठी महिला आर्थिक विकास महामंडळ संचालित खुशिया लोकसंचालित साधन केंद्र, चंद्रपूर येथे संपर्क साधता येईल.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
