चंद्रपूर: Durgapur Gutkha Raid प्रकरणात चंद्रपूर जिल्ह्यातील दुर्गापूर पोलीस ठाणे आणि अन्न व औषध प्रशासनाने संयुक्त कारवाई करत समतानगर येथील घरातून प्रतिबंधित सुगंधित तंबाखू व पान मसाल्याचा साठा जप्त केला आहे. या प्रकरणी दोघांविरोधात गुन्हा दाखल करण्यात आला असून, अवैध गुटखा विक्री रॅकेटचा तपास सुरू आहे. कारवाईमुळे चंद्रपूर परिसरातील गुटखा माफियांमध्ये खळबळ उडाली आहे. (गोसीखुर्द प्रकल्पात कोट्यवधी रुपयांचा गैरव्यवहार, ७ जणांवर गुन्हे दाखल)
चंद्रपूर जिल्ह्यातील दुर्गापूर पोलीस ठाण्याच्या हद्दीत प्रतिबंधित सुगंधीत तंबाखू आणि पान मसाल्याच्या छुप्या साठ्यावर अन्न व औषध प्रशासनाने (FDA) पोलिसांनी संयुक्त छापा टाकून मोठी कारवाई केली आहे. समतानगर, उर्जानगर येथील एका घरातून अन्न सुरक्षा अधिकाऱ्यांनी ११ हजार ८६१ रुपये किमतीचा विविध कंपन्यांचा सुगंधीत तंबाखू व पान मसाल्याचा साठा जप्त केला असून, या प्रकरणी दोघा जणांविरुद्ध गंभीर गुन्हे दाखल करण्यात आले आहेत. या धडक कारवाईमुळे चंद्रपूर परिसरातील अवैध सुगंधित तंबाखू आणि गुटखा माफियांचे धाबे दणाणले आहेत.
Durgapur Gutkha Raid मध्ये FDA आणि पोलिसांची संयुक्त कारवाई
अन्न व औषध प्रशासनाचे अन्न सुरक्षा अधिकारी उमेश मार्तंड कापगते यांनी दिलेल्या लेखी फिर्यादीनुसार, महाराष्ट्र शासनाने सार्वजनिक आरोग्याच्या हितासाठी संपूर्ण राज्यात गुटखा, पान मसाला, सुगंधीत तंबाखू, खर्रा आणि निकोटीनयुक्त पदार्थांच्या उत्पादन, साठा, वितरण व विक्रीवर कायदेशीर बंदी घातली आहे. असे असतानाही दुर्गापूर पोलीस ठाण्याचे पोलीस उपनिरीक्षक नरेश बाबुराव उरकुडे यांना समतानगर येथील एका घरात हा प्रतिबंधित साठा विक्रीसाठी ठेवल्याची गोपनीय माहिती मिळाली होती. या माहितीच्या आधारे अन्न सुरक्षा अधिकारी कापगते, पोलीस पथक आणि पंच साक्षीदार नशीब जनार्धन नाकाडे यांनी समतानगर येथील रहिवासी आरोपी राहुल श्रीरंग वाव्हळे (वय ४१) याच्या घरावर छापा टाकला. घराची झडती घेतली असता पोलिसांना मानवी आरोग्यास अत्यंत घातक असलेल्या प्रतिबंधित मालाचा मोठा साठा आढळून आला.
या कारवाईत जप्त करण्यात आलेल्या मालामध्ये मिराज सुगंधित तंबाखूचे ३१४ पॅकेट, होला हुक्का शिशा तंबाखूचे ३ पॅकेट, ईगल हुक्का शिशा तंबाखूचे १ पॅकेट, राजश्री पान मसाल्याचे एकूण ५ पॅकेट्स, बहार पान मसाल्याचे १ पॅकेट, महारतन ३०७ सुगंधित तंबाखूचे २ पॅकेट आणि ॲक्शन प्रीमियम चेविंग तंबाखूचे तब्बल ७०० पॅकेट्स सापडले आहेत. या संपूर्ण जप्त साठ्याचे एकूण वजन सुमारे ८.८६७ किलोग्रॅम असून त्याची बाजारभावानुसार किंमत ११ हजार ८६१ रुपये एवढी आहे. आरोपी राहुल वाव्हळे याच्याकडे या प्रतिबंधित साठ्याबाबत कोणत्याही प्रकारची खरेदी बिले किंवा वैध कागदपत्रे आढळून आली नाहीत.
पोलीस आणि अन्न सुरक्षा अधिकाऱ्यांनी आरोपी राहुल वाव्हळे याच्याकडे या मालाच्या स्त्रोताबाबत सखोल चौकशी केली असता, त्याने हा संपूर्ण प्रतिबंधित माल चंद्रपूर येथील इंदिरानगर वॉर्डातील रहिवासी सचिन दमकोंडावार याच्याकडून खरेदी केल्याची कबुली दिली. मानवी आरोग्याला कमालीचा धोका निर्माण करणाऱ्या आणि कर्करोग, मुखरोग यांसारख्या गंभीर आजारांना कारणीभूत ठरणाऱ्या या प्रतिबंधित पदार्थांची जाणीवपूर्वक बेकायदेशीर विक्री व साठा केल्याप्रकरणी प्रशासनाने कठोर पावले उचलली आहेत.
या प्रकरणी अन्न सुरक्षा अधिकाऱ्यांच्या तक्रारीवरून दुर्गापूर पोलिसांनी मुख्य आरोपी राहुल श्रीरंग वाव्हळे आणि पुरवठादार सचिन दमकोंडावार या दोघांविरुद्ध अन्न सुरक्षा व मानके कायदा २००६ च्या कलम २६(१), २६(२)(i), २६(२)(iv), २७(३)(e), ३०(२)(a) तसेच भारतीय न्याय संहिता (BNS), २०२३ च्या कलम १२३, २२३, २७४, २७५ आणि ३(५) अन्वये गुन्हा दाखल केला आहे. शासनाच्या आदेशाचे उल्लंघन करून लोकांच्या जिवाशी खेळणाऱ्या या रॅकेटचा पुढील तपास दुर्गापूर पोलीस ठाण्याचे पोलीस उपनिरीक्षक नरेश बाबुराव उरकुडे करीत असून, या अवैध व्यवसायाशी संबंधित इतर दुवे शोधून काढण्याचे काम पोलीस करत आहेत.
