चंद्रपूर:(Chandrapur Hookah Tobacco Seizure) चंद्रपूर शहरात अन्न व औषध प्रशासन आणि पोलिसांनी संयुक्त कारवाई करत प्रतिबंधित हुक्का शीशा व सुगंधित तंबाखूचा २३,४४० रुपयांचा साठा जप्त केला. या प्रकरणी १९ वर्षीय आरोपीला अटक करण्यात आली असून अन्न सुरक्षा कायदा आणि BNS अंतर्गत गंभीर गुन्हा दाखल करण्यात आला आहे.
सार्वजनिक आरोग्याला घातक ठरणाऱ्या प्रतिबंधित अमली आणि सुगंधित तंबाखूजन्य पदार्थांच्या तस्करीविरुद्ध चंद्रपूर शहर पोलीस आणि अन्न व औषध प्रशासनाने (FDA) महाकाली पोलीस चौकीसमोर एक मोठी संयुक्त कारवाई केली आहे. या धडक कारवाईत एका वाहनाची झडती घेऊन तब्बल २३ हजार ४४० रुपये किमतीचा प्रतिबंधित Hookah शीशा तंबाखू आणि सुगंधित तंबाखूचा साठा जप्त करण्यात आला असून, याप्रकरणी १९ वर्षीय तौफिक अब्दुल करीम त्यागी या आरोपीला अटक करण्यात आली आहे. या प्रकरणी चंद्रपूर शहर पोलीस ठाण्यात अन्न सुरक्षा आणि मानके अधिनियम २००६ सह भारतीय न्याय संहितेच्या (BNS) विविध गंभीर कलमांन्वये गुन्हा दाखल करण्यात आला आहे. (मूलमध्ये १९ किलो तंबाखू जप्त)
Chandrapur Hookah Tobacco Seizure प्रकरणात नेमके काय घडले?
मिळालेल्या सविस्तर माहितीनुसार, चंद्रपूर येथील अन्न व औषध प्रशासनाचे अन्न सुरक्षा अधिकारी कुणाल गोपाल मुळे (वय ३०) यांना मिळालेल्या गोपनीय माहितीच्या आधारे, २९ जून २०२६ रोजी रात्री १०:३० वाजताच्या सुमारास चंद्रपूर शहर पोलीस आणि एफडीएच्या संयुक्त पथकाने दक्षिण दिशेला सुमारे २ किमी अंतरावर असलेल्या महाकाली पोलीस चौकीसमोर नाकाबंदी करून तपासणी सुरू केली.
याच दरम्यान फुले चौक, बाबुपेठ येथील रहिवासी असलेला तौफिक अब्दुल करीम त्यागी (वय १९) हा त्याच्या टी.व्ही.एस. ज्युपिटर दुचाकी (क्रमांक MH34 BY-4144) वरून जात असताना पथकाने त्याला थांबवून वाहनाची कसून तपासणी केली. या तपासणीत वाहनाच्या डिक्कीत आणि सोबत मानवी आरोग्याला कमालीचा अपायकारक ठरणारा प्रतिबंधित सुगंधित तंबाखू आणि Hookah पार्लरमध्ये वापरल्या जाणाऱ्या शीशा तंबाखूचा मोठा साठा आढळून आला. पथकाने तात्काळ हा मुद्देमाल आणि वाहन जप्त करून आरोपीला चंद्रपूर शहर पोलीस ठाण्यात आणले.
जप्त करण्यात आलेल्या साठ्याची पाहणी केली असता, त्यामध्ये ‘होला Hookah शीशा तंबाखू’चे ४०० ग्रॅम वजनाचे २० पॅकेट (एकूण वजन २० किलो) ज्याची किंमत १६ हजार ४०० रुपये आहे आणि ‘ईगल हुक्का शिसा सुगंधित तंबाखू’चे प्रत्येकी ४०० ग्रॅम वजनाचे ११ पाकीट (एकूण वजन ४.४ किलो) ज्याची किंमत ७ हजार ४० रुपये आहे, असा एकूण २३ हजार ४४० रुपयांचा बेकायदेशीर अमली साठा जप्त करण्यात आला आहे. या सर्व पाकिटांवर ऑगस्ट २०२४ ची मॅन्युफॅक्चरिंग तारीख असून ती ‘झेन प्रॉडक्ट्स प्रायव्हेट लिमिटेड, अहमदाबाद, गुजरात’ येथील तयार झालेली आहेत. अन्न सुरक्षा अधिकाऱ्यांनी या पदार्थांचा वास घेऊन ते मानवी आरोग्यास घातक आणि कर्करोगाला निमंत्रण देणारे प्रतिबंधित अमली पदार्थ असल्याची खात्री केली व त्याचे रासायनिक विश्लेषणासाठी अनौपचारिक नमुने घेऊन संपूर्ण साठा जप्त केला.
महाराष्ट्र शासनाच्या सार्वजनिक आरोग्य विभागाच्या वतीने १६ जुलै २०२५ रोजी जारी करण्यात आलेल्या अधिसूचनेनुसार संपूर्ण राज्यात गुटखा, पान मसाला, खर्रा, सुगंधित तंबाखू आणि निकोटीनयुक्त घटकांच्या साठवणुकीवर व वाहतुकीवर एका वर्षासाठी पूर्णपणे बंदी घालण्यात आली आहे. हा आदेश लागू असतानाही, केवळ आर्थिक फायद्यासाठी आणि तरुणाईला अमली पदार्थांच्या आहारी ढकलण्यासाठी आरोपीने हा साठा बेकायदेशीरपणे वाहतूक केल्याचे समोर आले आहे. याप्रकरणी अन्न सुरक्षा अधिकारी कुणाल मुळे यांच्या लेखी तक्रारीवरून चंद्रपूर शहर पोलीस ठाण्याचे पोलीस निरीक्षक निशिकांत सुरेंद्र रामटेके यांनी गुन्हा नोंदवला आहे.
आरोपीविरुद्ध अन्न सुरक्षा व मानके कायदा २००६ च्या कलम २६(१), २६(२), २७(३), ३०(२) व कलम ५९ सह भारतीय न्याय संहिता (BNS) २०२३ च्या कलम १२३, २२३, २७४ आणि २७५ अन्वये गुन्हा (एफआयआर क्रमांक ०७३४) दाखल करण्यात आला असून, पोलीस उपनिरीक्षक दत्तात्रय भिकनदास कोलाटे यांच्याकडे या गुन्ह्याचा सखोल तपास सोपवण्यात आला आहे. जर आरोपीचा यापूर्वीही अशा गुन्ह्यांत सहभाग आढळल्यास त्याच्यावर ‘मकोका’ अंतर्गत कठोर कारवाई करण्याची शिफारस देखील अन्न व औषध प्रशासनाने केली आहे.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
