नागभीड – चंद्रपूर जिल्ह्यातील नागभीड पोलीस ठाण्याच्या हद्दीत Nagbhid Sand Seizure अंतर्गत एक मोठी कारवाई करण्यात आली आहे. पोलिसांनी अवैध रेती उत्खनन आणि वाहतुकीविरोधात कारवाई करत सुमारे ३ लाख ६६ हजार रुपयांचा मुद्देमाल जप्त केला आहे. या कारवाईत रेतीने भरलेला ट्रॅक्टर आणि ट्रॉली पोलिसांनी ताब्यात घेतली आहे. इरव्वा-टेकरी मार्गावर पोलिसांनी हा सापळा रचला होता. या प्रकरणी चालकाविरुद्ध गुन्हा दाखल करण्यात आला आहे. (वरोरा मार्गावर भीषण अपघात, तरुणाचा मृत्यू)
चंद्रपूर जिल्ह्यातील नागभीड पोलीस ठाण्याच्या हद्दीत अवैध रेती उत्खनन आणि वाहतुकीविरोधात पोलिसांनी मोठी कारवाई करत सुमारे ३ लाख ६६ हजार रुपयांचा मुद्देमाल जप्त केला आहे. या कारवाईत रेतीने भरलेला ट्रॅक्टर, ट्रॉली आणि गौण खनिज असा मुद्देमाल ताब्यात घेण्यात आला असून, चालकाविरुद्ध भारतीय न्याय संहिता आणि महाराष्ट्र जमीन महसूल अधिनियमांतर्गत गुन्हा दाखल करण्यात आला आहे.
Nagbhid Sand Seizure चा संपूर्ण थरार
पोलीसांनी दिलेल्या माहितीनुसार, ९ जुलै रोजी नागभीड पोलीस ठाण्याचे पोलीस अंमलदार भारत माणिक घोळवे आणि त्यांच्या पथकातील कर्मचारी नियमित पेट्रोलिंगवर असताना त्यांना इरव्वा–टेकरी मार्गावर अवैधरित्या रेतीची वाहतूक होत असल्याची गोपनीय माहिती मिळाली. माहितीची खातरजमा करण्यासाठी पंचांना सोबत घेऊन पोलिसांनी सापळा रचला. इरव्वा गावापासून सुमारे ५०० मीटर अंतरावर संशयित ट्रॅक्टर येताना दिसताच पोलिसांनी वाहन अडवून तपासणी केली.
तपासणीदरम्यान एमएच-३४-बीव्ही-०३७२ क्रमांकाचा स्वराज कंपनीचा ट्रॅक्टर आणि विनाक्रमांकाची ट्रॉली रेतीने भरलेली असल्याचे आढळून आले. चालकाकडे रेती उत्खनन अथवा वाहतुकीसाठी आवश्यक असलेला कोणताही वैध शासकीय परवाना नसल्याचे स्पष्ट झाले. चौकशीत ही रेती बेलगाव नदीघाटातून आणल्याची माहिती चालकाने पोलिसांना दिली. त्यानंतर पंचांसमक्ष संपूर्ण मुद्देमाल जप्त करण्यात आला.
या कारवाईत अंदाजे ३ लाख रुपयांचा ट्रॅक्टर, ६० हजार रुपयांची ट्रॉली आणि सुमारे ६ हजार रुपयांची रेती, असा एकूण ३ लाख ६६ हजार रुपयांचा मुद्देमाल जप्त करण्यात आला. या प्रकरणात तारकेश शेषराव राऊत (वय २६, रा. बेलगाव, ता. ब्रह्मपुरी, जि. चंद्रपूर) याच्याविरुद्ध भारतीय न्याय संहिता, २०२३ च्या कलम ३०३(२) तसेच महाराष्ट्र जमीन महसूल अधिनियम, १९६६ च्या कलम ४८ अंतर्गत नागभीड पोलीस ठाण्यात गुन्हा दाखल करण्यात आला आहे.
या प्रकरणाचा पुढील तपास पोलीस हवालदार रामेश्वर माधव दोईफोडे यांच्याकडे सोपविण्यात आला असून, अवैध गौण खनिज उत्खनन आणि वाहतुकीविरोधात अशाच प्रकारच्या कारवाया पुढेही सुरू राहणार असल्याचा इशारा पोलिसांनी दिला आहे. जिल्ह्यात अवैध रेती तस्करी रोखण्यासाठी नागभीड पोलिसांनी केलेल्या या कारवाईमुळे रेती माफियांमध्ये खळबळ उडाली आहे.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
