चंद्रपूर: (Chandrapur Ganeshotsav Rules) अंतर्गत चंद्रपूर जिल्हा पोलीस दलाने अत्यंत कडक पावले उचलली आहेत. आगामी सार्वजनिक गणेशोत्सवाच्या पार्श्वभूमीवर पोलीस अधीक्षक आयुष नोपानी यांच्या उपस्थितीत झालेल्या आढावा बैठकीत जिल्ह्यात डीजे वाजवण्यावर पूर्ण बंदी घालण्यात आली आहे. (तेलंगणा राज्यात भीषण अपघात, चंद्रपुरातील चौघांचा मृत्यू)
आगामी सार्वजनिक गणेशोत्सव शांततापूर्ण, सुरक्षित आणि शिस्तबद्ध वातावरणात साजरा करण्यासाठी चंद्रपूर जिल्हा पोलीस दल आणि जिल्हा प्रशासनाने आत्तापासूनच कंबर कसली आहे. या पार्श्वभूमीवर पोलीस मुख्यालय, चंद्रपूर येथील ड्रिल शेडमध्ये आज सायंकाळी एक महत्त्वपूर्ण आढावा व नियोजन बैठक पार पडली. चंद्रपूरचे पोलीस अधीक्षक आयुष नोपानी यांच्या अध्यक्षतेखाली झालेल्या या बैठकीत यंदाच्या गणेशोत्सवात सर्वोच्च न्यायालय आणि शासनाच्या ध्वनी प्रदूषण नियमांचे पालन करण्यासाठी संपूर्ण जिल्ह्यात ‘डीजे’ (DJ) वाजवण्यावर पूर्णपणे बंदी घालण्याचा अत्यंत मोठा निर्णय घेण्यात आला आहे. या आदेशाची जिल्ह्यात अतिशय प्रभावीपणे अंमलबजावणी करण्यात येणार असून, नियमांचे उल्लंघन करणाऱ्यांवर कडक कायदेशीर कारवाईचा बडगा उगारला जाईल, असा स्पष्ट इशारा पोलीस प्रशासनाने दिला आहे.
Chandrapur Ganeshotsav Rules: आगामी सणांच्या पार्श्वभूमीवर पोलिसांचे कडक नियोजन
या महत्त्वपूर्ण नियोजन बैठकीला चंद्रपूर महानगरपालिकेचे आयुक्त अकनूरी नरेश, अप्पर पोलीस अधीक्षक ईश्वर कातकडे, उपविभागीय पोलीस अधिकारी प्रमोद चौगुले यांच्यासह महानगरपालिका व विविध शासकीय विभागांचे वरिष्ठ अधिकारी प्रामुख्याने उपस्थित होते. तसेच जिल्ह्यातील विविध गणेश मंडळांचे प्रतिनिधी, मूर्तिकार, डीजे चालक-मालक आणि पोलीस अधिकारी व कर्मचारी मिळून सुमारे २०० ते २५० नागरिक या बैठकीला हजर होते. बैठकीदरम्यान कायदा व सुव्यवस्था अबाधित राखण्यासाठी सर्व गणेश मंडळांना मंडप परिसरात अनिवार्यपणे सीसीटीव्ही (CCTV) कॅमेरे लावण्याचे निर्देश देण्यात आले आहेत. सुरक्षेच्या कारणास्तव विसर्जन मिरवणुकीतील वाहनांवर लहान मुलांना बसवण्यास सक्त मनाई करण्यात आली असून, संभाव्य अपघात टाळण्यासाठी प्रत्येक मंडळाने आपापल्या पातळीवर समन्वय समिती स्थापन करून स्वयंसेवकांची नियुक्ती करावी, अशा सूचना अधिकाऱ्यांनी दिल्या आहेत.
पोलीस अधीक्षक आयुष नोपानी यांनी बैठकीत बोलताना स्पष्ट केले की, यंदाच्या महोत्सवात ‘डीजे’ संस्कृतीला फाटा देऊन पारंपरिक वाद्यांचा वापर वाढवण्यावर विशेष भर दिला जावा, जेणेकरून आपल्या मूळ संस्कृतीचे जतन होईल. यासोबतच जिल्ह्यातील सर्व गणेश मंडळांनी प्रशासनातर्फे आयोजित करण्यात येणाऱ्या ‘आदर्श गणेश मंडळ स्पर्धेत’ उत्स्फूर्तपणे सहभागी होऊन शिस्तीचे दर्शन घडवावे, असे आवाहनही त्यांनी केले. जिल्हा प्रशासन व चंद्रपूर जिल्हा पोलीस दलाच्या वतीने गणेशोत्सवासाठी आवश्यक ती सर्व तयारी पूर्ण करण्यात येत असून, नागरिकांनी आणि गणेश मंडळांनी प्रशासनाने दिलेल्या सर्व नियमांचे व सूचनांचे तंतोतंत पालन करावे आणि आगामी उत्सव शांततेत व उत्साहात साजरा करून पोलिसांना सहकार्य करावे, असे आवाहन चंद्रपूर जिल्हा पोलिसांतर्फे करण्यात आले आहे.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
