नाना पाटेकर यांच्या निधनावर खासदार धानोरकर, आमदार मुनगंटीवार यांनी दिली श्रद्धांजली

चंद्रपूर: नाना पाटेकर निधन झाल्याची बातमी समजताच चंद्रपूर जिल्ह्यातून शोकभावना व्यक्त होत आहेत. ज्येष्ठ अभिनेते आणि सामाजिक कार्यकर्ते नाना पाटेकर यांचे गुरुवारी, ८ ऑक्टोबर रोजी वयाच्या ७५ व्या वर्षी गोव्यात हृदयविकाराच्या तीव्र झटक्याने निधन झाले. खासदार प्रतिभा धानोरकर आणि आमदार सुधीर मुनगंटीवार यांनी त्यांना भावपूर्ण श्रद्धांजली अर्पण केली. राष्ट्रीय पुरस्कार, पद्मश्री सन्मान आणि ‘नाम फाउंडेशन’चे शेतकरी-हिताचे कार्य यांची दोन्ही नेत्यांनी आठवण केली. त्यांच्या जाण्याने मराठी व हिंदी चित्रपटसृष्टीत मोठी पोकळी निर्माण झाली आहे. (१६ ऑक्टोबरपासून चंद्रपुरात पाणी कपात, वाचा बातमी )

“बळीराजाचा खरा मार्गदर्शक आणि कलेचा आदर्श हरपला” – खासदार प्रतिभा धानोरकर

नाना पाटेकर यांच्या निधनावर शोक व्यक्त करताना खासदार प्रतिभा धानोरकर म्हणाल्या, “आज शब्द अपुरे पडत आहेत आणि मन सुन्न झाले आहे. आपल्या समृद्ध अभिनयाने देशपातळीवर राष्ट्रीय पुरस्काराची मोहर उमटवणारा एक महान कलाकार, आणि दुसरीकडे दुष्काळाच्या होरपळीत होरपळणाऱ्या महाराष्ट्राला ‘नाम फाउंडेशन’च्या जलसंधारणाच्या चळवळीतून आशेचा किरण दाखवणारा बळीराजाचा खरा कैवारी आज आपल्यातून निघून गेला.”

पुढे बोलताना त्या म्हणाल्या, “जेव्हा जेव्हा महाराष्ट्र संकटात सापडला, दुष्काळाची सावली गढूळ झाली, तेव्हा त्यांनी केवळ अश्रू पुसले नाहीत तर मातीशी नातं सांगत प्रत्यक्ष कामाचा डोंगर उभा केला. कलेच्या क्षेत्रात यशाचे सर्वोच्च शिखर गाठूनही त्यांचे पाय कायम जमिनीवर आणि मन सामान्य माणसाच्या दुःखाशी जोडलेले राहिले. असा ‘देवमाणूस’ होणे पुन्हा शक्य नाही. त्यांच्या जाण्याने निर्माण झालेली पोकळी कधीही भरून येणारी नाही. ईश्वर त्यांच्या आत्म्याला चिरशांती देवो आणि या अथांग दुःखातून सावरण्याची ताकद त्यांच्या कुटुंबीयांना, सहकाऱ्यांना व जगभरातील चाहत्यांना देवो.”

“भारतीय अभिनयाच्या इतिहासातील एका अजरामर अध्यायाचा अंत” – आ. सुधीर मुनगंटीवार

आमदार सुधीर मुनगंटीवार यांनी आपल्या शोकसंदेशात म्हटले की, “नाना पाटेकर हे केवळ स्वतःची स्वतंत्र अभिनयशैली निर्माण करणारे विलक्षण कलावंत नव्हते, तर आपल्या प्रत्येक भूमिकेतून समाजमनाला भिडणारे आणि प्रसंगी आपल्या खास शैलीने रसिकांना खळखळून हसविणारे संवेदनशील व्यक्तिमत्त्व होते. त्यांच्या निधनाने मराठी आणि हिंदी चित्रपटसृष्टीतील एका अजरामर अभिनयपर्वावर जणू पडदा पडला आहे.”

नाना पाटेकर यांनी ‘परिंदा’, ‘क्रांतिवीर’ आणि ‘अग्निसाक्षी’ या चित्रपटांतील उत्कृष्ट अभिनयासाठी राष्ट्रीय पुरस्कार मिळवले, तर २०१३ मध्ये त्यांना पद्मश्रीने सन्मानित करण्यात आले. ‘यशवंत’, ‘अब तक छप्पन’, ‘राजनीति’, ‘नटसम्राट’ आणि ‘वेलकम’सारख्या असंख्य चित्रपट व नाटकांतून त्यांनी बहुआयामी अभिनयाची छाप पाडली.

त्यांच्या योगदानाचा गौरव करताना आ. मुनगंटीवार म्हणाले, “त्यांचा अभिनय म्हणजे केवळ संवादफेक नव्हती; तो भावनांचा उद्रेक आणि वास्तवाचा आरसा होता. आवाजातील भारदस्तपणा, संवादातील धार आणि व्यक्तिरेखेत पूर्णपणे विलीन होण्याच्या लकबीमुळे त्यांच्या भूमिका अजरामर झाल्या. अभिनयासोबतच ‘नाम फाउंडेशन’च्या माध्यमातून शेतकरी, दुष्काळग्रस्त आणि ग्रामीण भागातील गरजूंसाठी त्यांनी केलेले कार्य त्यांच्या मनातील माणुसकीचे दर्शन घडवणारे आहे. नाना पाटेकर हे नाव आता भारतीय अभिनयाच्या इतिहासातील एक अजरामर अध्याय आहे. या महान कलावंताच्या स्मृतींना माझे विनम्र अभिवादन.”