सातारा तुकूम जंगलात पोटातील वासरासाठी गायीची वाघाशी झुंज

पोंभुर्णा: Pombhurna Tiger Attack प्रकरणी सातारा तुकूम परिसरातील जंगलात एक थरारक घटना घडली आहे. चरण्यासाठी गेलेल्या एका गर्भवती गायीवर वाघाने अचानक जीवघेणा हल्ला चढवला. पोटातील वासराच्या रक्षणासाठी या गायीने वाघाशी निकराचा लढा दिला. तिने मृत्यूच्या दाढेतून स्वतःची सुटका करून घेतली. (हे हि वाचा – जड वाहनांना चंद्रपुरात नो एंट्री, काय आहे नवा नियम?)

गंभीर जखमी अवस्थेत ती गावालगत पोहोचली. स्थानिक तरुण रोशन राठोड यांनी धाडस दाखवून गायीचा जीव वाचवला.

सातारा तुकूम परिसरातील घनदाट जंगलात एका गर्भवती गायीने स्वतःच्या आणि पोटातील वासराच्या रक्षणासाठी थेट वाघाशी दिलेली झुंज आणि त्यानंतर एका संवेदनशील तरुणाने दाखवलेले धाडस सध्या परिसरात चर्चेचा विषय ठरले आहे. वाघाच्या हल्ल्यात गंभीर जखमी झालेल्या या गायीला वेळेवर उपचार मिळवून देत जीवदान देण्यात आले आहे.

Pombhurna Tiger Attack: सातारा तुकूम जंगलातील थरारक वास्तव

सातारा तुकूमचा परिसर हा व्याघ्रप्रवण क्षेत्र म्हणून ओळखला जातो. जंगलात चरत असलेल्या एका गायीवर दबा धरून बसलेल्या पूर्ण वाढ झालेल्या वाघाने अचानक हल्ला चढवला. मात्र, गाय गाभण असल्याने तिने वासराच्या ओढीने आणि जिवाच्या आकांताने मृत्यूच्या दाढेतून सुटण्यासाठी वाघाचा जोरदार प्रतिकार केला.

या संघर्षात गाय गंभीर जखमी होऊन रक्तबंबाळ झाली, तरीही तिने हिंमत न हारता जंगलातून गावाच्या दिशेने धाव घेतली. जंगलात वाघाचा वावर असल्याने सुरुवातीला गावकरी आणि स्थानिक नागरिक भीतीपोटी जंगलाच्या दिशेने जाण्यास धजावत नव्हते. मात्र, परिस्थितीचे गांभीर्य ओळखून रोशन राठोड यांनी तातडीने पुढाकार घेतला. स्वतःचा जीव धोक्यात घालून ते गायीच्या शोधात पुढे गेले असता, गावालगत ती अत्यंत अशक्त आणि गंभीर जखमी अवस्थेत आढळून आली.

गायीला सुरक्षित स्थळी आणण्यासाठी जवळ कोणतेही साधन उपलब्ध नसताना, राठोड यांनी प्रसंगावधान राखत आपल्या गळ्यातील दुपट्ट्याने गायीला बांधले आणि सुरक्षित ठिकाणी आणले. त्यानंतर त्यांनी स्थानिक नागरिकांच्या मदतीने ‘प्यार फाउंडेशन, चंद्रपूर’ (Pyaar Foundation) च्या वन्यजीव व प्राणी रेस्क्यू पथकाशी संपर्क साधला.

माहिती मिळताच रेस्क्यू टीम घटनास्थळी दाखल झाली आणि त्यांनी गायीवर प्रथमोपचार करून पुढील उपचारासाठी दाखल केले. मोठ्या प्रमाणावर रक्तस्राव झाल्याने गायीची प्रकृती चिंताजनक असली, तरी तिने पोटातील जिवासाठी दिलेली झुंज सर्वांचेच हृदय पिळवटून टाकणारी ठरली. मुक्या प्राण्यावर ओढवलेल्या संकटात स्वतःचा जीव धोक्यात घालून धावून गेलेले रोशन राठोड यांच्या संवेदनशीलतेचे आणि धाडसाचे संपूर्ण तालुक्यात कौतुक होत असून, जखमी गाय व तिचे वासरू सुरक्षित राहावे यासाठी ग्रामस्थ प्रार्थना करत आहेत.