कोरपना/वनसडी – Vansadi Illegal Gambling प्रकरणी कोरपना तालुक्यात जोरदार चर्चा सुरू आहे. झेंडी-मुंडी, कटपत्ता आणि सट्टा असे अवैध धंदे पुन्हा सुरू झाल्याचा स्थानिकांचा आरोप आहे. धक्कादायक बाब म्हणजे, हा कथित प्रकार वनविभागाच्या शासकीय कार्यालयाजवळच सुरू असल्याचा दावा केला जात आहे. या दाव्यांची अद्याप अधिकृत पुष्टी झालेली नाही. संबंधित यंत्रणांनी चौकशी करणे गरजेचे आहे. (हे हि वाचा – घरफोडीच्या गुन्ह्यात गुन्हे शाखेने आंतरजिल्हा टोळीतील सदस्यांना केली अटक)
कोरपना तालुक्यातील वनसडी येथे अवैध धंद्यांनी पुन्हा डोके वर काढल्याची जोरदार चर्चा सुरू झाली आहे. झेंडी-मुंडी, कटपत्ता आणि सट्टा असा अवैध धंद्यांचा जणू ‘काटकोन त्रिकोण’च येथे तयार झाल्याचा स्थानिकांचा आरोप आहे. धक्कादायक बाब म्हणजे, हा कथित प्रकार वनविभागाच्या शासकीय कार्यालयाच्या परिसरात किंवा लगतच सुरू असल्याचा दावा केला जात आहे.
स्थानिकांकडून मिळालेल्या माहितीनुसार, वणीकडील एका टोळीशी संबंधित व्यक्ती आणि गडचांदूर परिसरातील काही व्यक्तींच्या माध्यमातून वनसडीत जुगाराचा अड्डा चालविला जात असल्याची चर्चा आहे. मात्र या दाव्यांची स्वतंत्र अधिकृत पुष्टी झालेली नसल्याने संबंधित यंत्रणांनी प्रत्यक्ष चौकशी करून वस्तुस्थिती स्पष्ट करणे गरजेचे आहे.
⭕महिलांना मनस्ताप; मग प्रशासनाचे लक्ष कुठे?
या कथित जुगार अड्ड्यामुळे सर्वाधिक त्रास परिसरातील महिलांना होत असल्याची तक्रार आहे. शेतशिवाराकडे जाणाऱ्या महिलांना या परिसरातून ये-जा करावी लागते. तेथे जुगारासाठी होणारी गर्दी आणि कथित अवैध हालचालींमुळे महिलांना अस्वस्थता व मनस्ताप सहन करावा लागत असल्याचे स्थानिकांचे म्हणणे आहे. शासकीय कार्यालयाचा परिसरच जर अवैध धंद्यांसाठी वापरला जात असेल, तर हा प्रकार नेमका कुणाच्या आशीर्वादाने सुरू आहे? वनविभागाच्या संबंधित अधिकाऱ्यांच्या निदर्शनास ही बाब आली आहे का? आली असेल तर कारवाई का झाली नाही? असे प्रश्न आता उपस्थित होत आहेत.
⭕पोलिसांची कारवाई झाली… तरी पुन्हा अड्डा सुरू कसा?
या परिसरातील अवैध धंद्यांवर यापूर्वी पोलिसांनी कारवाई केल्याचे स्थानिक सांगतात. मात्र त्यानंतरही पुन्हा हा कथित जुगार व्यवसाय जोमाने सुरू झाल्याची चर्चा असल्याने कारवाईचा धाक किती राहिला, हा प्रश्न निर्माण झाला आहे. स्थानिक चर्चेत ‘मयूर’ आणि ‘वणी गँग’ अशी नावे घेतली जात असली तरी, त्यांचा कथित अवैध व्यवसायाशी नेमका संबंध आहे का, हे पोलीस तपासातूनच स्पष्ट होणे आवश्यक आहे. एकदा कारवाई झाल्यानंतर पुन्हा त्याच परिसरात अवैध धंदा सुरू होत असेल तर प्रश्न केवळ जुगाराचा राहत नाही; या धंद्याला संरक्षण कोणाचे? माहिती असूनही दुर्लक्ष कोणाचे? आणि कारवाईनंतर पुन्हा दुकान थाटण्याची हिंमत येते कुठून? याचीही चौकशी होणे गरजेचे ठरते.
⭕कोरपन्यात चपराक… आता वनसडीचा नंबर कधी?
कोरपना परिसरातील सट्टापट्टीविरोधात पोलिसांनी तत्काळ कारवाई करून अवैध व्यावसायिकांचे धाबे दणाणल्याची चर्चा असताना, आता सर्वांच्या नजरा वनसडीकडे लागल्या आहेत.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
