देहव्यवसाय प्रकरणानंतर वनिता बिअर बारचा परवाना कायमचा रद्द

चिमूर (चंद्रपूर): Chimur Beer Bar License Cancelled या प्रकरणामुळे चिमूर शहरात मोठी खळबळ उडाली आहे. बिअर बारच्या नावाखाली अवैध देहव्यवसाय सुरू असल्याचा आरोप सिद्ध झाल्यानंतर जिल्हाधिकारी वसुमना पंत यांनी वनिता बिअर बार अँड रेस्टॉरंटचा परवाना कायमस्वरूपी रद्द केला आहे. पोलिसांच्या छापेमारीनंतर झालेल्या चौकशीमध्ये गंभीर बाबी समोर आल्याने ही कठोर कारवाई करण्यात आली. (मैत्रिणीकडे जाते म्हणून घराबाहेर निघाली आणि परतलीच नाही)

बिअर बारच्या नावाखाली बेकायदेशीरपणे कुंटणखाना चालवून महिलांचे आर्थिक शोषण करणाऱ्या चिमूर येथील एका नामांकित बारवर जिल्हा प्रशासनाने अखेर सर्वात मोठी आणि कठोर कारवाई केली आहे. चिमूर पोलीस आणि पोलीस अधीक्षकांच्या सखोल प्रस्तावावरून चंद्रपूरच्या जिल्हाधिकारी श्रीमती वसुमना पंत यांनी आझाद वार्ड येथील वादग्रस्त ‘वनिता बिअर बार अँड रेस्टॉरंट’चा परवाना (अनुज्ञप्ती क्र. FL (III)-४४६) कायमस्वरूपी रद्द करण्याचे आदेश जारी केले आहेत. या धडक कारवाईमुळे जिल्ह्यातील अवैध व अनैतिक व्यवसाय चालवणाऱ्यांमध्ये तीव्र खळबळ उडाली असून, परिसरातील नागरिकांनी मात्र सुटकेचा श्वास टाकला आहे.

या प्रकरणाची पार्श्वभूमी अशी आहे की, आझाद वार्ड, चिमूर येथील ‘वनिता बिअर बार’ची संचालिका वनिता जगन रंगारी ही आपल्या बारच्या इमारतीमधील वरच्या माळ्यावर बाहेरील महिलांना पैशांचे आमिष दाखवून देहव्यवसायासाठी प्रवृत्त करत असल्याची अत्यंत गोपनीय माहिती चिमूर पोलिसांना मिळाली होती. ही संचालिका ग्राहकांकडून मोठी रक्कम वसूल करून पीडित महिलांना अत्यंत तुटपुंजी रक्कम द्यायची आणि उर्वरित मोठा हिस्सा स्वतःच्या स्वार्थासाठी ठेवून घेत महिलांचे शोषण करत होती. (चंद्रपूर जिल्ह्यात ३ अल्पवयीन मुले बेपत्ता)

Chimur Beer Bar License Cancelled प्रकरणात मोठी कारवाई

या माहितीची खातरजमा करण्यासाठी चिमूर पोलिसांनी १६ मे २०२६ रोजी या ठिकाणी बनावट ग्राहक पाठवून अचानक छापा टाकला. या छाप्यात बारच्या छताखाली देहविक्रीचा काळा व्यवसाय सुरू असल्याचे रंगेहाथ आढळून आले. पोलिसांनी तातडीने एका पीडित महिलेची या विळख्यातून मुक्तता केली. यानंतर महिला पोलीस उपनिरीक्षक दीप्ती मरकाम यांच्या तक्रारीवरून १६ मे २०२६ रोजीच चिमूर पोलीस ठाण्यात गुन्हा दाखल करण्यात आला. संचालिका वनिता रंगारीविरुद्ध भारतीय न्याय संहितेचे कलम १४३(२) आणि अनैतिक मानवी व्यापार प्रतिबंधक अधिनियम १९५६ (PITA Act) मधील विविध कलमांनुसार गुन्हा नोंदवून तिला अटक करण्यात आली, व सध्या ती चंद्रपूर कारागृहात न्यायालयीन कोठडीत आहे.

विशेष म्हणजे, हा बिअर बार अत्यंत दाट वस्तीत स्थित असून त्याच्या अगदी लगत तीन मशिदी आणि एक बुद्ध विहार अशी महत्त्वाची धार्मिक व प्रार्थना स्थळे आहेत. या कुंटणखान्यामुळे परिसरात ये-जा करणाऱ्या समाजकंटकांमुळे स्थानिक महिला, मुली आणि प्रतिष्ठित नागरिकांना जगणे कठीण झाले होते. नागरिकांनी हा बार बंद करण्यासाठी प्रशासनाकडे अनेकदा लेखी निवेदनेही दिली होती. पोलीस छाप्यात गुन्ह्याचे सबळ पुरावे मिळाल्यानंतर, कायदा व सुव्यवस्थेचा गंभीर प्रश्न लक्षात घेऊन चिमूरचे पोलीस निरीक्षक दिनेश त्रंबक लबडे यांनी उपविभागीय पोलीस अधिकारी दिनकर ठोसरे यांच्या मार्फत चंद्रपूरचे पोलीस अधीक्षक आयुष नोपाणी यांच्याकडे या बारचा परवाना रद्द करण्याचा सविस्तर प्रस्ताव पाठवला.

पोलीस अधीक्षकांनी हा प्रस्ताव जिल्हाधिकाऱ्यांकडे वर्ग केला. जिल्हाधिकारी श्रीमती वसुमना पंत यांनी या प्रकरणाचे गांभीर्य ओळखून राज्य उत्पादन शुल्क (अबकारी) विभागाकडून प्रत्यक्ष वस्तूस्थितीचा अहवाल मागवला. अबकारी विभागाचा अहवालही पोलिसांच्या दाव्याला पूरक ठरल्याने, अखेर जिल्हाधिकाऱ्यांनी १६ जून २०२६ रोजी वनिता बिअर बारचा परवाना कायमचा रद्द करण्याचा ऐतिहासिक आदेश पारित केला. पोलिसांच्या या यशस्वी पाठपुराव्यामुळे आणि प्रशासनाच्या कठोर भूमिकेमुळे परिसरातील नागरिकांनी दोन्ही विभागांचे जाहीर आभार मानले आहेत.