चंद्रपूरच्या बाबूपेठमध्ये उघड्यावर सुरू असलेल्या जुगार अड्ड्यावर रामनगर पोलिसांचा छापा

चंद्रपूर: Babupeth Gambling Raid प्रकरणात चंद्रपूरच्या बाबूपेठ परिसरात रामनगर पोलिसांनी उघड्यावर सुरू असलेल्या जुगार अड्ड्यावर छापा टाकून सहा जणांना ताब्यात घेतले. पोलिसांनी रोख रक्कम आणि ताशपत्ते असा एकूण २,६१० रुपयांचा मुद्देमाल जप्त केला. गुप्त माहितीच्या आधारे ही कारवाई करण्यात आली. सर्व आरोपींविरुद्ध महाराष्ट्र जुगार प्रतिबंधक कायद्यांतर्गत गुन्हा दाखल करण्यात आला असून पुढील तपास पोलीस उपनिरीक्षक कृष्णा दराडे करत आहेत. (हे हि वाचा – मुक्ताई धबधब्याकडे जाताना अपघात, एकाचा मृत्यू)

बाबूपेठमध्ये उघड्यावर सुरू असलेल्या जुगार अड्ड्यावर पोलिसांचा छापा

मिळालेल्या सविस्तर माहितीनुसार, २ ऑगस्ट २०२६ रोजी रामनगर पोलीस ठाण्याचे पोलीस अंमलदार जितेंद्र वासुदेव आकरे आणि त्यांचे सहकारी पोलीस उपनिरीक्षक कृष्णा दराडे यांच्यासह पोलीस कर्मचाऱ्यांचे पथक अवैध धंद्यांवर कारवाई करण्यासाठी गस्त घालत होते. गस्तीदरम्यान बाबूपेठ येथील योगेंद्र बग्याप यांच्या घराच्या शेजारी, सार्वजनिक ठिकाणी काही इसम ५२ ताशपत्त्यांवर पैशांची बाजी लावून ‘कट पत्त्यांचा’ हार-जीतचा जुगार खेळत असल्याची पक्की माहिती खबऱ्यामार्फत पोलिसांना मिळाली.

माहितीची शहानिशा करण्यासाठी पोलिसांनी लागलीच स्वतंत्र पंचांना पाचारण केले आणि घटनास्थळी छापा टाकला. पोलिसांना पाहून जुगार खेळणाऱ्यांमध्ये पळापळ झाली, मात्र सतर्क पथकाने ६ जणांना जागीच ताब्यात घेतले. पकडण्यात आलेल्या आरोपींमध्ये प्रफुल ज्ञानबा भागवत (वय ३६, रा. साईबाबा मंदिराजवळ, जुनोना रोड), विशाल बंडूजी सेलोटे (वय ३४, रा. आंबेडकर नगर), कैलास चंद्रभान मेश्राम (वय ४८, रा. साईबाबा मंदिराजवळ), राजेश दिवाकर जंगटे (वय ३८, रा. हिंगलाज भवानी मंदिराजवळ), सुदर्शन सिताराम महातव (वय ४७, रा. टावर टेकडी) आणि संजु विजय शेट्टी (वय ४३, रा. टावर टेकडी, सर्व रा. बाबूपेठ, चंद्रपूर) यांचा समावेश आहे.

घटनास्थळावर पंचनामा करून पोलिसांनी आरोपींच्या अंगझडतीत मिळालेले १,५०० रुपये रोख, डावावर लावलेले १,०९० रुपये रोख आणि जुगाराचे ताश पत्ते असा एकूण २,६१० रुपयांचा मुद्देमाल जप्त केला. या प्रकरणी पोलीस अंमलदार जितेंद्र आकरे यांच्या तक्रारीवरून रामनगर पोलीस ठाण्यात सर्व आरोपींविरुद्ध महाराष्ट्र जुगार प्रतिबंधक कायद्याच्या कलम १२(अ) अन्वये गुन्हा नोंदवण्यात आला असून पुढील तपास पोलीस उपनिरीक्षक कृष्णा दराडे करत आहेत.