रयतवारीतील होलसेल दुकानावर पोलिसांचा छापा, प्रतिबंधित परदेशी सिगारेटचा साठा जप्त

चंद्रपूर: Chandrapur Cigarette Raid प्रकरणामुळे चंद्रपूर शहरात अवैध तंबाखू विक्रेत्यांमध्ये खळबळ उडाली आहे. रामनगर पोलीस ठाण्याच्या हद्दीतील रयतवारी परिसरात गुन्हे अन्वेषण विभागाने एका होलसेल किराणा दुकानावर छापा टाकून प्रतिबंधित परदेशी बनावटीच्या सिगारेटचा मोठा साठा जप्त केला. या कारवाईदरम्यान पोलिसांनी सुमारे 14 हजार 440 रुपयांचा मुद्देमाल जप्त केला असून संबंधित व्यापाऱ्याविरुद्ध कोटपा कायद्यानुसार गुन्हा दाखल करण्यात आला आहे. (रामनगर हद्दीत चैन स्नॅचिंग)

चंद्रपूर येथील रामनगर पोलीस ठाण्याच्या हद्दीत गुन्हे अन्वेषण विभागाने रयतवारी परिसरात एका होलसेल किराणा दुकानावर धडक कारवाई केली आहे . या छाप्यात भारत सरकारने प्रतिबंधित केलेल्या परदेशी बनावटीच्या आणि कोणत्याही प्रकारचा वैधानिक इशारा नसलेल्या सिगारेटचा मोठा साठा जप्त करण्यात आला असून, एका व्यापाऱ्याविरुद्ध गुन्हा दाखल करण्यात आला आहे . या कारवाईमुळे शहरातील अवैध तंबाखूजन्य पदार्थांची विक्री करणाऱ्या वर्तुळात मोठी खळबळ उडाली आहे.

Chandrapur Cigarette Raid मध्ये नेमकी काय कारवाई झाली?

रामनगर पोलीस ठाण्याचे पोलीस उपनिरीक्षक कृष्णा प्रल्हाद दराडे यांनी दिलेल्या लेखी फिर्यादीनुसार, सोमवार, ८ जून २०२६ रोजी रात्री गुन्हे अन्वेषण विभागाचे पथक पोलीस निरीक्षक (मॅडम) यांच्या आदेशाने शहरातील अवैध धंदे आणि प्रतिबंधित तंबाखू विक्रीवर कारवाई करण्यासाठी पेट्रोलिंग करत होते . बंगाली कॅम्प परिसरात गस्त घालत असताना, रयतवारी येथील एक किराणा व्यावसायिक आपल्या दुकानातून प्रतिबंधित परदेशी सिगारेटची छुप्या पद्धतीने विक्री करत असल्याची खात्रीशीर माहिती गुप्त बातमीदाराकडून मिळाली . या माहितीच्या आधारे पोलिसांनी तात्काळ दोन पंचांना बोलावून घेऊन कायदेशीर प्रक्रियेसाठी तयार केले आणि वरिष्ठ पोलीस अधिकाऱ्यांना खबरेबाबत अवगत करून रयतवारी येथील संबंधित दुकानावर रात्री पावणे नऊ वाजेच्या सुमारास छापा टाकला .

पोलिसांचे पथक रयतवारी येथील ‘डीकेजी ट्रेडिंग कंपनी’ नावाच्या होलसेल किराणा दुकानात पोहोचले असता, तिथे उपस्थित असलेल्या व्यक्तीने आपले नाव गणेश गुरुप्रसाद गुप्ता (वय ३७, रा. रयतवारी कॉलरी, दुर्गा मंदिर जवळ, चंद्रपूर) असे सांगितले . पोलिसांनी त्याला कारवाईचा उद्देश सांगून पंचांसमक्ष दुकानाच्या काउंटरखाली तपासणी केली असता, तिथे एका पुठ्ठ्याच्या खोक्यात परदेशी बनावटीच्या सिगारेटचे पाकीट आणि बॉक्स आढळून आले . या सिगारेटच्या पाकिटांवर भारत सरकारच्या आरोग्य व कुटुंब कल्याण मंत्रालयाने अनिवार्य केलेला कोणताही लेखी किंवा चित्रित वैधानिक इशारा नव्हता, तसेच उत्पादनाची मुदत आणि सुरक्षा चिन्हांचाही अभाव होता .

या छाप्यात पोलिसांनी एकूण १४ हजार ४४० रुपये किमतीचा मुद्देमाल जप्त केला आहे . यामध्ये ३८० रुपये प्रति पाकीट किमतीचे कोरिया बनावटीचे ‘ESSE SPECIAL GOLD’ चे १८ नग सिगारेट पाकीट (एकूण किंमत ६,८४० रुपये), २०० रुपये प्रति पाकीट किमतीचे इंडोनेशिया बनावटीचे ‘DJARUM BLACK CLOVE’ चे ३६ नग सिगारेट पाकीट (एकूण किंमत ७,२०० रुपये), आणि ५० रुपये प्रति पाकीट किमतीचे ‘A 10s’ कंपनीचे ८ नग प्रतिबंधित सिगारेट पाकीट (एकूण किंमत ४०० रुपये) जप्त करण्यात आले . या प्रतिबंधित सिगारेटच्या खरेदीबाबत आरोपी गणेश गुप्ता याच्याकडे कोणतेही वैध बिल किंवा कागदपत्रे नव्हती . आंतरराष्ट्रीय चेंबर ऑफ कॉमर्सच्या इशाऱ्यांनुसार, अशा बनावट व गुपचूप आयात केलेल्या सिगारेट्समध्ये आरोग्याला कमालीचे घातक असणारे घटक असल्याने पोलिसांनी जप्त साठ्यातून रासायनिक परीक्षणासाठी (CA) नमुने गोळा केले आहेत .

देशांतर्गत कर अथवा आयात शुल्क न भरता केवळ स्वतःच्या आर्थिक फायद्यासाठी परदेशातून तस्करी केलेल्या आणि कायदेशीर इशाऱ्यांशिवाय या प्रतिबंधित सिगारेटचा साठा करून विक्री केल्याप्रकरणी आरोपीविरुद्ध गुन्हा नोंदवण्यात आला आहे . रामनगर पोलिसांनी फिर्यादीवरून आरोपी गणेश गुरुप्रसाद गुप्ता याच्याविरुद्ध ‘सिगारेट आणि इतर तंबाखू उत्पादने अधिनियम (कोटपा), २००३’ च्या कलम ३(ओ), ७ आणि २० अन्वये गुन्हा दाखल केला आहे . या प्रकरणाची रीतसर नोंद ठाणे प्रभारी अधिकारी तथा पोलीस निरीक्षक प्रभावती त्र्यंबक एकुरके यांनी केली असून, पोलीस शिपाई बाबा रामभाऊ नैताम यांच्याकडे या गुन्ह्याचा पुढील सखोल तपास सोपवण्यात आला आहे .