१५ नगरसेवकांच्या पाठिंब्याने अडूर पुन्हा गटनेते

चंद्रपूर: काँग्रेस गटनेते पद या वादावर चंद्रपूर महापालिकेत अखेर निर्णय झाला आहे. विभागीय आयुक्तांनी ५ नोव्हेंबर २०२६ रोजी काढलेल्या आदेशानुसार, नगरसेवक राजेश अडूर यांना काँग्रेसचे गटनेते म्हणून मान्यता देण्यात आली. यापूर्वी या पदावर नोंदवलेले सुरेंद्र अडबाले यांचे नाव रद्द करण्यात आले आहे. काँग्रेसच्या २७ पैकी १५ नगरसेवकांनी सुनावणीत अडूर यांच्या बाजूने स्वाक्षरीला दुजोरा दिल्याचे आदेशात नमूद आहे. हा वाद गेल्या काही महिन्यांपासून सुरू होता. त्यात उच्च न्यायालयाच्या नागपूर खंडपीठाचाही संदर्भ आला आहे. (शिवानी वडेट्टीवार यांची आक्रमक भूमिका, अखेर गुन्हा दाखल, वाचा बातमी)

काँग्रेस गटनेते पद: आयुक्तांच्या आदेशात काय आहे?

महापालिकेतील काँग्रेस गटनेते पदावरून गेल्या अनेक महिन्यांपासून सुरू असलेल्या राजकीय वादाने अखेर एक महत्त्वपूर्ण वळण घेतले आहे. विभागीय आयुक्त आणि प्रादेशिक संचालकांनी ५ नोव्हेंबर २०२६ रोजी जारी केलेल्या अधिकृत आदेशानुसार, नगरसेवक राजेश मुरली अडूर यांना पुन्हा एकदा अधिकृतपणे काँग्रेसचे गटनेते पद म्हणून मान्यता देण्यात आली आहे. दरम्यान, यापूर्वी या पदावर नोंदणी झालेले सुरेंद्र विठ्ठलराव अडबाले यांचे नाव रद्द करण्यात आले असून, या प्रशासकीय निर्णयामुळे चंद्रपूरच्या राजकीय वर्तुळात खळबळ उडाली आहे.

१५ नगरसेवकांचा पाठिंबा आणि सुनावणी

या राजकीय घडामोडींमागील पार्श्वभूमी पाहता, १५ जानेवारी २०२६ रोजी झालेल्या महापालिका सार्वत्रिक निवडणुकीत काँग्रेसचे २७ नगरसेवक निवडून आले होते. त्यानंतर ६ फेब्रुवारी २०२६ रोजी राजेश अडूर यांची एकमताने पक्षाच्या गटनेतेपदी निवड करण्यात आली होती. मात्र, काही महिन्यांच्या अंतराने १६ जून २०२६ रोजी १६ नगरसेवकांनी एकत्र येत सुरेंद्र अडबाले यांच्या नावाचा प्रस्ताव प्रशासनाकडे सादर केला, ज्याची दखल घेत २१ जुलै २०२६ रोजी प्रशासनाने अडबाले यांच्या नावावर कांग्रेस गटनेते पद म्हणून नोंद केली होती. या निर्णयाविरोधात राजेश अडूर व त्यांच्या १० समर्थक नगरसेवकांनी मुंबई उच्च न्यायालयाच्या नागपूर खंडपीठात धाव घेतली होती.

न्यायालयात प्रकरण प्रलंबित असतानाच, २९ सप्टेंबर २०२६ रोजी राजेश अडूर यांनी आपल्या १५ समर्थक नगरसेवकांसह गटाचा नेता बदलण्याचा आणि पोटविधीत सुधारणा करण्याचा नवीन प्रस्ताव सादर केला. विभागीय आयुक्तांसमोर पार पडलेल्या प्रत्यक्ष सुनावणीत काँग्रेसच्या एकूण २७ पैकी १५ नगरसेवकांनी अडूर यांच्या बाजूने उभे राहत त्यांच्या स्वाक्षरीला स्पष्ट दुजोरा दिला. याच दरम्यान उच्च न्यायालयाने ३० ऑक्टोबर २०२६ रोजी या प्रकरणावर लवकरात लवकर निर्णय घेण्याचे निर्देश दिले होते. या सर्व कायदेशीर बाबी आणि १५ नगरसेवकांचे स्पष्ट बहुमत अडूर यांच्या पाठीशी असल्याच्या मुद्द्याचा आधार घेत, विभागीय आयुक्तांनी सुरेंद्र अडबाले यांची गटनेते पदावरील नियुक्ती अधिकृतपणे रद्द करत अखेर राजेश अडूर यांच्या नावावर शिक्कामोर्तब केले.

दरम्यान, या संपूर्ण राजकीय घडामोडींमुळे जिल्ह्यामधील काँग्रेसमधील अंतर्गत कलह पुन्हा एकदा चव्हाट्यावर आला आहे. काही दिवसांपूर्वीच ज्येष्ठ नेते तथा आमदार विजय वडेट्टीवार यांनी ‘पक्षीय मतभेद विसरून आता सर्वांनी एकत्र कामाला लागले पाहिजे आणि याची सुरुवात आपण चंद्रपूरपासून करणार आहोत,’ अशी सलोख्याची प्रतिक्रिया दिली होती. मात्र, या ताज्या आदेशानंतर काँग्रेसमधील वडेट्टीवार आणि धानोरकर गटातील जुना दुरावा अद्यापही कायम असल्याचे स्पष्ट चित्र या सत्तासंघर्षातून दिसून येत आहे.

या महत्त्वपूर्ण निर्णयाची तातडीने अंमलबजावणी करण्याचे निर्देश देत विभागीय सहआयुक्त रवींद्र भेलाई यांनी महापौर, जिल्हाधिकारी, महापालिका आयुक्त, राजेश अडूर आणि सुरेंद्र अडबाले यांच्यासह सर्व संबंधित विभागांना या आदेशाची प्रत पाठवली आहे.