पोंभूर्णा तालुक्यात वीज कोसळून शेतकऱ्याचा मृत्यू, ब्रम्हपुरीत आठ मजूर जखमी

चंद्रपूर: Chandrapur Lightning Strike मुळे जिल्ह्यात गुरुवारी दोन दुर्दैवी घटना घडल्या. पोंभूर्णा तालुक्यातील चेकठाणेवासना येथे वीज कोसळून ५५ वर्षीय शेतकरी केशव गुडी यांचा जागीच मृत्यू झाला. त्यांची पत्नी वैशाली गुडी गंभीर जखमी असून त्यांच्यावर जिल्हा सामान्य रुग्णालयात उपचार सुरू आहेत. दुसरीकडे ब्रम्हपुरी तालुक्यातील बरडकिन्ही शिवारात मिरची लागवड करताना वीज कोसळल्याने आठ मजूर जखमी झाले. या घटनांमुळे ग्रामीण भागात भीतीचे वातावरण पसरले आहे.

चंद्रपूर जिल्ह्यात गुरुवारी (१७ सप्टेंबर) अचानक बदललेल्या हवामानामुळे आणि वादळी पावसासह कोसळलेल्या विजेमुळे दोन वेगवेगळ्या दुर्दैवी घटना घडल्या. पोंभूर्णा तालुक्यातील चेकठाणेवासना येथे वीज कोसळून एका ५५ वर्षीय शेतकऱ्याचा जागीच मृत्यू झाला असून त्यांची पत्नी गंभीर जखमी झाली आहे. तर दुसऱ्या घटनेत, ब्रम्हपुरी तालुक्यातील बरडकिन्ही शेतशिवारात वीज पडल्याने मिरची लागवड करणाऱ्या आठ महिला व मजुरांना विजेचा तीव्र धक्का बसून ते जखमी झाले आहेत.

घरी परतताना काळाचा घाला; शेतकऱ्याचा अंत, पत्नी गंभीर

पोंभूर्णा तालुक्यातील चेकठाणेवासना येथील शेतकरी केशव डोनू गुडी (वय ५५) आणि त्यांच्या पत्नी वैशाली केशव गुडी (वय ४५) हे दाम्पत्य नेहमीप्रमाणे शेतातील दिवसभराचे काम आटोपून सायंकाळी ४ वाजताच्या सुमारास घराकडे परत येत होते. दरम्यान, ऋषी आलाम यांच्या शेताजवळ अचानक कडकडाटासह त्यांच्या अंगावर वीज कोसळली. या भीषण दुर्घटनेत केशव गुडी यांचा जागीच तडफडून मृत्यू झाला, तर वैशाली गुडी या गंभीर जखमी झाल्या. (हे हि वाचा – चंद्रपुरात मनपाचे फिरते विसर्जन कुंड)

घटनेची माहिती मिळताच परिसरातील गावकऱ्यांनी घटनास्थळी धाव घेत जखमी वैशाली यांना तातडीने पोंभूर्णा येथील ग्रामीण रुग्णालयात दाखल केले. मात्र, प्रकृती अत्यंत चिंताजनक असल्याने प्राथमिक उपचारानंतर त्यांना पुढील उपचारासाठी जिल्हा सामान्य रुग्णालय, चंद्रपूर येथे हलविण्यात आले आहे. या घटनेमुळे चेकठाणेवासना गावात तीव्र शोककळा पसरली आहे.

ब्रम्हपुरीत मिरची लागवड करताना वीज कोसळली; आठ जण जखमी

दुसरी घटना ब्रम्हपुरी तालुक्यातील बरडकिन्ही शेतशिवारात दुपारी २ वाजताच्या सुमारास घडली. मारुती ठाकरे यांच्या शेतात शेतमजूर मिरची लागवडीचे काम करत असताना अचानक ढगांच्या गडगडाटासह पाऊस सुरू झाला आणि त्याच वेळी शेतात वीज कोसळली.

या दुर्घटनेत मनीषा गोकुळदास ठाकरे (वय २२), जनाबाई मारुती तलमले (वय ६५), रामहरी मारुती तलमले (वय ४५), मनीषा रामहरी तलमले (वय ४०), शुभांगी सुभाष तलमले (वय ३५), सुभाष मारुती तलमले (वय ४०), मेघा राकेश शेंडे (वय २२) आणि कविता कमलाकर पाकडे (वय ४५) हे आठ जण जखमी झाले.

घटनेनंतर गावकऱ्यांनी तत्परता दाखवत सर्व जखमींना तातडीने आरमोरी (जि. गडचिरोली) येथील उपजिल्हा रुग्णालयात दाखल केले. यातील सात जणांवर आरमोरी येथे उपचार सुरू असून, गंभीर जखमी असलेल्या मनीषा गोकुळदास ठाकरे यांना पुढील उपचारासाठी ब्रम्हपुरी येथील खासगी रुग्णालयात हलविण्यात आले आहे.

एकाच दिवशी दोन तालुक्यांत वीज पडण्याच्या घटना घडल्याने जिल्ह्यातील ग्रामीण भागात व शेतकरी वर्गात भीतीचे सावट पसरले आहे.