वरोरा नाका चौकात बसमधून ६१ हजारांची विदेशी दारू जप्त; तीन महिलांना अटक

चंद्रपूर – चंद्रपूर विदेशी दारू तस्करीवर स्थानिक गुन्हे शाखेने कारवाई केली आहे. वरोरा नाका चौकात नागपूरहून आलेल्या खासगी बसची झडती घेण्यात आली. पोलिसांनी सांगितल्यानुसार, तीन महिलांच्या बॅगांमध्ये ६१ हजार ८२० रुपयांची दारू आढळली. पोलिसांनी जबलपूर (मध्य प्रदेश) येथील तिघींना ताब्यात घेतले आहे. त्यांच्याविरुद्ध महाराष्ट्र दारूबंदी कायद्याच्या कलम ६५(अ) आणि ८३ अन्वये गुन्हा दाखल झाला आहे. एक संशयित पोलिसांना हवा आहे. रामनगर पोलीस पुढील तपास करीत आहेत. (वरोऱ्यात १ हजार ९२९ दारूच्या बाटल्या जप्त, वाचा बातमी)

चंद्रपूर विदेशी दारू जप्ती: वरोरा नाका चौकात सापळा

चंद्रपूर शहरात अवैध दारू तस्करीचे एक मोठे रॅकेट स्थानिक गुन्हे शाखेने उघडकीस आणले आहे. नागपूरवरून खासगी बसने चंद्रपुरात विदेशी दारूचा मोठा साठा घेऊन येणाऱ्या मध्य प्रदेशातील तीन महिला तस्करांना पोलिसांनी रंगेहात जेरबंद केले आहे. वरोरा नाका चौकात सापळा रचून ही धडक कारवाई करण्यात आली असून, पोलिसांनी ६१ हजार ८२० रुपयांचा विदेशी दारूचा साठा जप्त केला आहे.

बसमधील बॅगांमध्ये दारूच्या २८० हून अधिक बाटल्या

स्थानिक गुन्हे शाखा, चंद्रपूरच्या पथकाला मिळालेल्या गुप्त माहितीच्या आधारे २५ ऑक्टोबर २०२६ रोजी वरोरा नाका चौक येथे जोरदार नाकाबंदी आणि सापळा रचण्यात आला होता. नागपूरकडून चंद्रपूरच्या दिशेने येणाऱ्या गणराज ट्रॅव्हल्सच्या (क्र. MH 49 AT1696) बसची पोलिसांनी पंचासमक्ष कसून झडती घेतली. यावेळी बसमधून प्रवास करणाऱ्या तीन महिलांच्या साहित्याची तपासणी केली असता, त्यांच्या बॅगांमध्ये अवैध विदेशी दारूचे घबाड आढळून आले. पोलिसांनी केलेल्या जप्तीमध्ये ७५० मिली क्षमतेच्या बॉम्बे व्हिस्कीच्या ८० सीलबंद बाटल्या आणि १८० मिली क्षमतेच्या ऑफिसर चॉईस व्हिस्कीच्या १०० सीलबंद बाटल्यांचा समावेश आहे. एकूण ६१ हजार ८२० रुपये किमतीचा हा माल पोलिसांनी जप्त केला आहे.

पोलिसांनी या प्रकरणी मध्य प्रदेशातील जबलपूर येथील तीन महिला तस्करांना ताब्यात घेतले आहे. राजकुमारी धीरज जाट (वय ३६), शिवरात्री संजय जाट (वय ५९) आणि विद्या सुनील जाट (सर्व रा. बेलगाव केंजर मोहल्ला, जबलपूर, मध्य प्रदेश) अशी अटक करण्यात आलेल्या महिला आरोपींची नावे आहेत. प्राथमिक चौकशी दरम्यान या महिला नागपूरहून विदेशी दारूचा हा साठा चंद्रपुरात आणून येथील प्रिन्स केंजर (रा. केंजर मोहल्ला, चंद्रपूर) याला विक्रीसाठी देणार असल्याची धक्कादायक माहिती समोर आली आहे. या प्रकरणी मुख्य सूत्रधार प्रिन्स केंजर हा पाहिजे असलेला आरोपी असून पोलिस त्याचा शोध घेत आहेत.

या प्रकरणी स्थानिक गुन्हे शाखेच्या पथकातील अधिकारी व अंमलदारांच्या फिर्यादीवरून रामनगर पोलीस ठाण्यात महाराष्ट्र दारूबंदी कायद्याच्या कलम ६५ (अ) आणि ८३ अन्वये गुन्हा दाखल करण्यात आला आहे. स्थानिक गुन्हे शाखेचे पोलीस निरीक्षक यांच्या मार्गदर्शनाखाली एपीआय हिवसे, पीएसआय भुरले, पीएसआय बेलसरे, तसेच पोलीस अंमलदार नितीन, जयसिंग, सतीश, इम्रान, लालू, हिरा, संदीप, किशोर आणि शशांक यांच्या पथकाने ही यशस्वी कारवाई पार पाडली असून, पुढील तपास रामनगर पोलीस करीत आहेत.