चंद्रपूर – Chandrapur local jobs शोधणाऱ्या जिल्ह्यातील सुशिक्षित तरुणांसाठी आनंदाची बातमी समोर आली आहे. कौशल्य विकास व रोजगार केंद्रातर्फे २९ सप्टेंबर रोजी भव्य रोजगार महाकुंभ आयोजित करण्यात येत आहे.
Chandrapur Local Jobs : तरुणांसाठी सुवर्णसंधी आणि पात्रता
महाराष्ट्र शासनाच्या कौशल्य विकास, रोजगार व उद्योजकता मार्गदर्शन केंद्र, चंद्रपूरच्या वतीने जिल्ह्यात २९ सप्टेंबर २०२६ रोजी भव्य ‘पंडित दिनदयाळ उपाध्याय रोजगार महाकुंभ’ आयोजित करण्यात येत आहे. “युवाशक्ती हीच राष्ट्रशक्ती” या संकल्पनेवर आधारित असलेल्या या महत्त्वपूर्ण उपक्रमासाठी जनजागृती व नोंदणी भागीदार (Mobilizing Partner) म्हणून चंद्रपूर गडचिरोली स्थानीय लोकाधिकार सेनेच्या अध्यक्षा श्रीमती गोमती शारदा मनोहर पाचभाई यांची अधिकृत नियुक्ती करण्यात आली आहे. यासंदर्भातील अधिकृत पत्र जिल्हा कौशल्य विकास केंद्राच्या सहायक आयुक्त श्रीमती अ. ला. तडवी यांनी जारी केले आहे.
गोमती पाचभाई यांची मोबिलायझिंग पार्टनर म्हणून नियुक्ती
या उपक्रमांतर्गत जिल्ह्यातील सर्व तालुक्यांमधील नोकरी इच्छुक तरुण-तरुणींपर्यंत माहिती पोहोचवणे, त्यांची मोफत नोंदणी करून घेणे आणि त्यांना मेळाव्यात सहभागी होण्यासाठी प्रोत्साहित करण्याची जबाबदारी श्रीमती गोमती पाचभाई यांच्या नेतृत्वाखाली स्थानीय लोकाधिकार सेनेवर सोपवण्यात आली आहे. या रोजगार महाकुंभाला जिल्ह्यातून मोठा प्रतिसाद मिळत असून, आतापर्यंत ३५ उद्योजकांनी १९२ रिक्त पदांची नोंदणी केली आहे. तसेच सोशल मीडिया व विविध केंद्रांच्या माध्यमातून आतापर्यंत २,७५७ उमेदवारांनी यशस्वीरीत्या नोंदणी पूर्ण केली आहे.
जिल्ह्यातील सुशिक्षित बेरोजगारांना त्यांच्या जवळच्या भागातच मुलाखतीची संधी मिळावी यासाठी एकाच वेळी १५ केंद्रांवर हा रोजगार मेळावा व प्लेसमेंट ड्राईव्ह राबवला जात आहे. यामध्ये चंद्रपूर येथील सिपेट ताडाली, बल्लारपूर इन्स्टिट्यूट ऑफ तंत्रज्ञान, शासकीय आयटीआय वरोरा, शासकीय आयटीआय सावली, साई खाजगी आयटीआय भद्रावती, राष्ट्रीय खाजगी आयटीआय राजुरा, महाराष्ट्र इन्स्टिट्यूट ऑफ पॉलिटेक्निक ब्रह्मपुरी या तांत्रिक संस्थांचा समावेश आहे. यासोबतच गोंडपिपरी येथील चिंतामणी महाविद्यालय, पोंभूर्णा येथील चिंतामणी विज्ञान महाविद्यालय, चिमूरचे राष्ट्रसंत तुकडोजी महाराज महाविद्यालय, जिवतीचे विदर्भ महाविद्यालय, कोरपना तालुक्यातील गडचांदूर येथील महात्मा गांधी विज्ञान महाविद्यालय, मुलचे कर्मवीर महाविद्यालय, नागभीडचे राष्ट्रपिता महात्मा गांधी महाविद्यालय आणि सिंदेवाही येथील सर्वोदय महाविद्यालय या १५ ठिकाणी ही भरती प्रक्रिया पार पडणार आहे.
या नियुक्तीनंतर बोलताना श्रीमती गोमती पाचभाई यांनी सांगितले की, जिल्ह्यातील तरुण-तरुणींना स्थानिक पातळीवर हक्काचा रोजगार मिळवून देणे हेच लोकाधिकार सेनेचे मुख्य ध्येय आहे. महाराष्ट्र शासनाने उपलब्ध करून दिलेल्या या संधीचा लाभ घेण्यासाठी चंद्रपूर जिल्ह्यातील सर्व भागांतील सुशिक्षित बेरोजगार युवक-युवतींनी कोणतीही दिरंगाई न करता आपली नोंदणी त्वरित पूर्ण करावी आणि २९ सप्टेंबर रोजी होणाऱ्या या महाकुंभात मोठ्या संख्येने उपस्थित राहावे.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
