तरुण पिढीला ड्रग्सपासून वाचवण्यासाठी चंद्रपूर पोलीस सरसावले; डायल करा हा नंबर

चंद्रपूर: Chandrapur Police Tipline सेवा जिल्ह्यात अधिकृतपणे सुरू झाली आहे. चंद्रपूर पोलीस प्रशासनाने जिल्ह्याला अमली पदार्थमुक्त करण्यासाठी हे मोठे पाऊल उचलले आहे. तरुण पिढीला आणि विद्यार्थ्यांना अमली पदार्थांच्या विळख्यातून बाहेर काढण्यासाठी विशेष मोहीम हाती घेण्यात आली आहे. अवैध अमली पदार्थांच्या खरेदी-विक्रीवर चाप बसवण्यासाठी पोलिसांनी मोबाईल क्रमांक जाहीर केला आहे. नागरिक आता थेट पोलिसांशी संपर्क साधू शकतात. (हे हि वाचा – चंद्रपुरात १६ किलो गांजा जप्त)

पोलीस प्रशासनाने दिलेल्या माहितीनुसार, शाळा आणि महाविद्यालयांचा परिसर तसेच जिल्ह्यात कुठेही अमली पदार्थांचे सेवन, साठा किंवा खरेदी-विक्रीसारखे गैरप्रकार चालत असल्यास नागरिकांना 7887890100 या टिपलाईन क्रमांकावर माहिती देता येणार आहे. नागरिक या क्रमांकावर थेट कॉल करून किंवा व्हॉट्सॲपच्या (WhatsApp) माध्यमातून मेसेज, व्हिडिओ किंवा फोटो पाठवून तात्काळ माहिती पोलिसांना कळवू शकतात. विशेष म्हणजे या टिपलाईनवर माहिती देणाऱ्या कोणत्याही नागरिकाचे, विद्यार्थ्याचे किंवा पालकाचे नाव, पत्ता आणि ओळख पूर्णपणे गोपनीय ठेवली जाईल, अशी ग्वाही पोलीस प्रशासनाने दिली आहे.

शालेय व महाविद्यालयीन तरुण पिढीला अमली पदार्थांच्या घातक विळख्यापासून वाचवणे आणि जिल्ह्यातील संशयास्पद ठिकाणे (हॉटस्पॉट्स) पूर्णपणे उद्ध्वस्त करणे हे या मोहिमेचे मुख्य उद्दिष्ट आहे. यासाठी स्थानिक नागरिकांचे सहकार्य अत्यंत मोलाचे आहे. आपल्या परिसरात अथवा शाळा-कॉलेजच्या आजूबाजूला अमली पदार्थांसंदर्भात कोणतीही संशयास्पद हालचाल दिसून आल्यास नागरिकांनी कसलीही भीती न बाळगता निर्भयपणे 7887890100 या क्रमांकावर संपर्क साधावा आणि चंद्रपूर पोलिसांना सहकार्य करावे, असे आवाहन पोलीस प्रशासनाच्या वतीने करण्यात आले आहे.