चंद्रपुरातील पान ठेल्यावर चालणाऱ्या सट्टा पट्टीवर पोलिसांची धाड

चंद्रपूर: Chandrapur Satta Raid अंतर्गत चंद्रपूर शहर पोलिसांनी घुटकाळा वार्ड येथील सम्राट अशोक चौक परिसरातील एका पानठेल्यावर कारवाई केली आहे. रात्रीच्या पेट्रोलिंग दरम्यान गुप्त माहिती मिळताच पोलिसांनी दोन पंचांसमक्ष ही धाड टाकली. पोलिसांना पाहताच सट्टा लावणारे पसार झाले, मात्र सट्टा चालवणाऱ्या मुख्य संशयिताला ताब्यात घेण्यात आले. त्याच्याकडून सट्टापट्टीच्या चिठ्ठ्या व रोख रक्कम जप्त करण्यात आली असून पोलिसांनी महाराष्ट्र जुगार कायद्यानुसार गुन्हा दाखल केला आहे. (हे हि वाचा – सिनेस्टाइल पाठलाग करून हल्ला)

मिळालेल्या माहितीनुसार, चंद्रपूर शहर पोलीस ठाण्याचे सहाय्यक पोलीस निरीक्षक युवराज प्राण सहारे हे पोलीस कर्मचारी अनिल काळबांधे व राकेश फुकट यांच्यासह रात्रीच्या वेळी शासकीय वाहनाने हद्दीत पेट्रोलिंग करत होते. दरम्यान, सम्राट अशोक चौक येथील एका पानठेल्यावर एक इसम लोकांकडून पैसे घेऊन कागदाच्या चिठ्ठ्यांवर आकडे लिहून हार-जीतचा सट्टापट्टीचा खेळ खेळवत असल्याची गुप्त माहिती पोलिसांना मिळाली. मिळालेल्या माहितीची खात्री पटल्यानंतर पोलिसांनी दोन पंचांना सोबत घेऊन तात्काळ संबंधित पानठेल्यावर धाड टाकली.

पोलिसांचे वाहन येताच पानठेल्याभोवती सट्टा लावण्यासाठी जमलेले लोक पसार झाले. घटनास्थळी उपस्थित असलेल्या संशयिताला ताब्यात घेऊन विचारपूस केली असता, त्याने आपले नाव पोशट्टी राम दंतलवार (वय ३३ वर्षे, रा. सम्राट अशोक चौक, घुटकाळा वार्ड, चंद्रपूर) असे सांगितले. पंचांसमक्ष घेतलेल्या झडतीत त्याच्या ताब्यातून आकडे लिहिलेल्या १० चिठ्ठ्या, एक निळ्या शाईचा बॉलपेन आणि २२० रुपयांची रोख रक्कम असा एकूण २२२ रुपयांचा मुद्देमाल जप्त करण्यात आला.

सार्वजनिक ठिकाणी सट्टापट्टीचा खेळ चालवून लोकांची फसवणूक व जुगार चालवल्याप्रकरणी एपीआय युवराज सहारे यांच्या तक्रारीवरून चंद्रपूर शहर पोलिसांनी आरोपी पोशट्टी दंतलवार याच्याविरुद्ध महाराष्ट्र जुगार प्रतिबंधक कायदा, १८८७ च्या कलम १२(अ) अन्वये गुन्हा नोंदवला आहे. ठाणे प्रभारी अधिकारी निशिकांत रामटेके यांच्या मार्गदर्शनाखाली पोलीस हवालदार भगवान लिंगाजी चांदेकर या प्रकरणाचा पुढील तपास करत आहेत.