पोलिसांना पाहताच वळवली गाडी! पाठलाग करून धरले अन्…

कोरपना (चंद्रपूर): Korpana Police Bike Theft Arrest प्रकरणात कोरपना पोलिसांनी मोठी कामगिरी बजावली आहे. वणसडी टोल नाक्यावर केलेल्या नाकाबंदीत पोलिसांना पाहून पळणारा सराईत गुन्हेगार पकडला गेला. मिलिंद जयभारत डंवरे असे या संशयिताचे नाव आहे. त्याच्याकडून आदिलाबाद येथून चोरलेली दुचाकी जप्त करण्यात आली. तपासात त्याच्यावर आधीच ५ गंभीर गुन्हे दाखल असल्याचे निष्पन्न झाले. पोलिसांनी त्याला आदिलाबाद पोलिसांच्या ताब्यात दिले आहे. (हे हि वाचा – ब्रह्मपुरीत सोलर अर्थिंग रॉड ची चोरी)

तेलंगणातील आदिलाबाद येथून चोरीस गेलेली मोटरसायकल घेऊन फिरणाऱ्या एका सराईत गुन्हेगाराला कोरपना पोलिसांनी वणसडी टोल नाक्याजवळ केलेल्या नाकाबंदीदरम्यान अत्यंत हुशारीने अटक केली. मिलिंद जयभारत डंवरे (वय ३३ वर्षे, रा. लोणी, ता. कोरपना, जि. चंद्रपूर) असे या संशयित आरोपीचे नाव असून, त्याच्याकडून चोरीची दुचाकी हस्तगत करून त्याला आदिलाबाद पोलिसांच्या ताब्यात देण्यात आले आहे.

पोलिसांची नाकाबंदी पाहताच पळण्याचा प्रयत्न; पाठलाग करून ठोकल्या बेड्या

चंद्रपूरचे पोलीस अधीक्षक आयुष नोपानी यांच्या आदेशानुसार कोरपना पोलीस स्टेशनचे पथक ७ ऑगस्ट २०२६ रोजी दुपारी ३:०० ते रात्री ८:०० वाजेच्या सुमारास पोलीस स्टेशन हद्दीतील वणसडी टोल नाक्याजवळ विशेष गस्त व नाकाबंदी करत होते. यादरम्यान एक इसम संशयास्पदरीत्या दुचाकी घेऊन येत असल्याचे पोलिसांच्या निदर्शनास आले. पोलिसांची नाकाबंदी पाहताच सदर इसमाने आपली गाडी वळवून पळून जाण्याचा प्रयत्न केला, त्यामुळे पोलिसांचा संशय अधिकच बळावला.

कोरपना पोलीस पथकाने प्रसंगावधान राखून तत्काळ त्याचा पाठलाग केला आणि त्याला अडवले. पोलिसी खाक्या दाखवत त्याची चौकशी केली असता त्याने आपले नाव मिलिंद जयभारत डंवरे असे सांगितले. त्याच्या ताब्यातील TS-01-ER-0473 क्रमांकाच्या दुचाकीबाबत कसून विचारपूस करण्यात आली. वाहनाच्या क्रमांकावरून पोलिसांनी आदिलाबाद येथील पोलीस स्टेशनचे एस.आय. अशोक यांच्याशी संपर्क साधला असता, सदर दुचाकी आदिलाबाद येथील बस स्थानकावरून चोरीला गेली असून त्याबाबत तेथे चोरीचा गुन्हा दाखल असल्याची धक्कादायक माहिती समोर आली.

त्यानंतर पोलिसांनी संशयित आरोपीची आयसीजीएस (ICJS) प्रणालीद्वारे सखोल माहिती तपासली असता, तो एक सराईत गुन्हेगार असल्याचे उघडकीस आले. त्याच्याविरुद्ध यवतमाळ जिल्ह्यातील पांढरकवडा येथे २, चंद्रपूर जिल्ह्यातील राजुरा येथे २ आणि गडचांदूर येथे १ असे एकूण ५ गंभीर गुन्हे आधीपासूनच दाखल असल्याचे निष्पन्न झाले. सदर इसम कोणताही वैध व्यवसाय किंवा कामधंदा करत नसून, त्याच्या गुन्हेगारी प्रवृत्तीमुळे भविष्यात सार्वजनिक शांतता तसेच नागरिकांच्या मालमत्तेला धोका निर्माण होण्याची शक्यता होती. त्यामुळे पोलिसांनी त्याच्याविरुद्ध भारतीय नागरिक सुरक्षा संहिता (BHSS) २०२३ मधील कलम ३५ (ब) अन्वये कडक प्रतिबंधात्मक कारवाई केली असून, जप्त केलेली दुचाकी आदिलाबाद टाऊन टू पोलीस स्टेशनच्या पथकाकडे सोपवण्यात आली आहे.

ही यशस्वी कामगिरी चंद्रपूरचे पोलीस अधीक्षक आयुष नोपानी, अपर पोलीस अधीक्षक ईश्वर कातकडे आणि गडचांदूरचे उपविभागीय पोलीस अधिकारी रवींद्र जाधव यांच्या मार्गदर्शनाखाली कोरपना पोलीस स्टेशनच्या पोलीस निरीक्षक लता वाढवे यांच्या नेतृत्वात पोलीस अंमलदार नामदेव पवार (बॅज क्र. १२२६) व लक्ष्मण नुनूंजे (बॅज क्र. १६६८) यांनी पार पाडली. कोरपना पोलिसांकडून हद्दीतील गुन्हेगारी प्रवृत्तीच्या व्यक्तींवर सातत्याने कडक लक्ष ठेवले जात असून, नागरिकांच्या सुरक्षेसाठी पोलीस प्रशासन सदैव तत्पर असल्याचे कोरपना पोलिसांकडून सांगण्यात आले आहे.