नागभीड – Nagbhid House Theft News अंतर्गत मौशी गावामध्ये दिवसाढवळ्या घरफोडीची मोठी घटना उघडकीस आली आहे. कुटुंब बाहेरगावी गेले असताना चोराने कुलूप तोडून घरात प्रवेश केला. कपाटातील १ लाख ९५ हजार रुपये किमतीचे सोन्याचे दागिने चोरून नेण्यात आले. फिर्यादी महिला घरी परतल्यानंतर हा संपूर्ण चोरीचा प्रकार समोर आला. या प्रकरणी नागभीड पोलीस ठाण्यात अज्ञात आरोपीविरुद्ध गुन्हा दाखल करण्यात आला आहे. (हे हि वाचा – दारूच्या नशेत थेट पोलिसांना शिवीगाळ)
Nagbhid House Theft News: मौशी गावात बंद घरावर चोरट्यांचा डल्ला
चंद्रपूर जिल्ह्यातील नागभीड पोलीस ठाण्याच्या हद्दीत येणाऱ्या मौशी येथे भरदिवसा घरफोडीची घटना उघडकीस आली असून अज्ञात चोरट्याने बंद घराचे कुलूप तोडून कपाटातील तब्बल १ लाख ९५ हजार रुपये किमतीचे सोन्याचे दागिने लंपास केले आहेत. घरमालक कुटुंबीय मुलीला भेटण्यासाठी बाहेरगावी गेले असताना चोरट्यांनी ही संधी साधत ही चोरी केली.
मौशी येथील रहिवासी शोभा भीमराव बनकर (वय ५५) या १० सप्टेंबर २०२६ रोजी दुपारी तीनच्या सुमारास आपले पती भीमराव यांच्यासह ब्रह्मपुरी येथे राहणाऱ्या मोठ्या मुलीला भेटण्यासाठी गेल्या होत्या. घराबाहेर पडण्यापूर्वी त्यांनी बेडरूममधील कपाट लॉक करून त्याची चावी देवघराजवळील खोक्यात ठेवली होती आणि मुख्य दरवाजाला व्यवस्थित कुलूप लावले होते. दरम्यान, १२ सप्टेंबर रोजी सकाळी दहा वाजता शोभा बनकर या आपली लहान मुलगी विजया हिच्यासह घरी परतल्या असता, त्यांना घराचे कुलूप आधीच तुटलेले असल्याचे आढळले.
देवघरातील चावी शोधून उघडले बेडरूममधील कपाट
घराचा दरवाजा उघडून आत पाहिले असता घरातील साहित्याची नासधूस व फेकाफेक झालेली दिसली. बेडरूममध्ये जाऊन तपासणी केली असता, देवघराच्या खोक्यातील चावी काढून चोरट्याने कपाट उघडल्याचे आणि कपाटातच चावी अडकवून ठेवल्याचे समोर आले. चोरट्याने चांदीचे दागिने तसेच ठेवून कपाटात ठेवलेले प्रत्येकी १ तोळ्याचे दोन सोन्याचे गोफ (किंमत १ लाख २ हजार रुपये), कानातील अर्ध्या-अर्ध्या तोळ्याचे दोन जोड (किंमत ५२ हजार रुपये), ३ ग्रॅमची सोन्याची नथ (किंमत १५ हजार रुपये) आणि अर्ध्या तोळ्याची सोन्याची अंगठी (किंमत २६ हजार रुपये) असा एकूण १ लाख ९५ हजार रुपयांचा सोन्याचा ऐवज लंपास केल्याचे निष्पन्न झाले.
या प्रकरणी शोभा बनकर यांनी तातडीने नागभीड पोलीस ठाणे गाठून फिर्याद दिली. त्यांच्या तक्रारीवरून नागभीड पोलिसांनी अज्ञात चोरट्याविरुद्ध भारतीय न्याय संहिता (BNS), २०२३ च्या कलम ३३१(३), ३३१(४) (रात्री किंवा दिवसा घरफोडी) आणि कलम ३०५ (घरात चोरी) अन्वये गुन्हा दाखल केला आहे. ठाणे प्रभारी अधिकारी रमाकांत कोकाटे यांच्या मार्गदर्शनाखाली सहाय्यक पोलीस निरीक्षक दिलीप गोपीचंद पोटभरे या प्रकरणाचा पुढील तपास करत आहेत.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
