वरोऱ्यात बंद घराचे कुलूप तोडून ७० हजारांचा ऐवज लंपास

वरोरा : वरोरा घरफोडी प्रकरणात चिनोरा परिसरातील रेणुका गोल्ड सिटी येथे बंद घराचे कुलूप तोडून चोरी करण्यात आली. घरातील सदस्य बाहेर गेले असताना अज्ञात चोरट्यांनी घरात प्रवेश केला. कपाटातील २० हजार रुपये रोख आणि ५० हजार रुपये किमतीचे सोन्याचे मंगळसूत्र असा एकूण ७० हजारांचा ऐवज चोरीला गेला. २८ सप्टेंबर २०२६ रोजी ही घटना उघडकीस आली. या प्रकरणी मंजूषा कांबडे यांच्या तक्रारीवरून वरोरा पोलिसांनी अज्ञात आरोपीविरुद्ध गुन्हा दाखल केला आहे. (गणेश विसर्जन मिरवणुकीत राडा, वाचा २१ जणांवर गुन्हे दाखल)

वरोरा घरफोडी; बंद घराचे कुलूप तोडून चोरी

चंद्रपूर जिल्ह्यातील वरोरा पोलीस ठाण्याच्या हद्दीत येणाऱ्या चिनोरा परिसरातील रेणुका गोल्ड सिटी येथे एक धक्कादायक घरफोडीची घटना समोर आली आहे. घरचे सर्व सदस्य आपापल्या कामासाठी बाहेर गेले असताना अज्ञात चोरट्यांनी संधी साधत बंद घराचे कुलूप तोडून आत प्रवेश केला आणि कपाटातील नगदी रकमेसह सोन्याचे दागिने असा एकूण ७० हजार रुपयांचा मुद्देमाल लांबवला. या घटनेमुळे परिसरात भीतीचे वातावरण पसरले आहे.

मुली घरी परतल्यानंतर घरफोडीचा प्रकार उघड

मिळालेल्या सविस्तर माहितीनुसार, रेणुका गोल्ड सिटी, चिनोरा येथील रहिवासी आणि आरोग्य विभाग भटाडा येथे कार्यरत असलेल्या सौ. मंजूषा संदीप कांबडे (वय ४२) या नेहमीप्रमाणे २८ सप्टेंबर २०२६ रोजी सकाळी ११:३० वाजताच्या सुमारास ऑफिसच्या बैठकीसाठी कोसरसार येथे गेल्या होत्या. त्यांचे पती शेतात गेले होते आणि दोन्ही मुली सकाळी ८ वाजेच्या सुमारास शाळेत गेल्या होत्या. दुपारी ४:३० वाजताच्या सुमारास मुली शाळेतून घरी परतल्या असता त्यांना घराचा मुख्य दरवाजा उघडा दिसला. संशय आल्याने त्यांनी शेजारी राहणाऱ्या वैशाली पडवे यांच्या मोबाईलवरून आईला फोन करून घराचे लॉक तुटल्याची माहिती दिली.

माहिती मिळताच मंजूषा कांबडे यांनी तात्काळ कोसरसार येथून घरी धाव घेतली. घराच्या आत जाऊन पाहणी केली असता बेडरुममधील लोखंडी कपाटाचे लॉक तोडलेले आढळले आणि कपाटातील कपडे अस्ताव्यस्त फेकलेले दिसून आले. कपाटाची कसून पाहणी केली असता त्यात ठेवलेले रोख २०,००० रुपये नगदी आणि ५०,००० रुपये किमतीची ६ ग्रॅम वजनाची जुनी वापरती सोन्याची पोत (मंगळसूत्र) असा एकूण ७०,००० रुपयांचा ऐवज गायब असल्याचे स्पष्ट झाले.

या प्रकरणी मंजूषा कांबडे यांनी वरोरा पोलीस ठाण्यात धाव घेऊन अज्ञाताविरुद्ध तक्रार नोंदवली. त्यांच्या तोंडी रिपोर्टवरून वरोरा पोलिसांनी भारतीय न्याय संहिता (BNS), २०२३ च्या कलम ३३१(३) आणि ३०५(a) अन्वये गुन्हा दाखल केला आहे. पोलीस निरीक्षक ओमप्रकाश शामराव सोनटक्के यांच्या मार्गदर्शनाखाली पोलीस उपनिरीक्षक अजिंक्य अनिल पवार या गुन्ह्याचा पुढील सखोल तपास करत असून अज्ञात चोरट्याचा शोध सुरू आहे.