चंद्रपूर: १८ महिन्यांच्या प्रतीक्षेनंतर नागपूर न्यायाधिकरणाला मिळाले अधिकारी, आमदार अडबाले यांच्या पाठपुराव्याला यश

चंद्रपूर : Nagpur Tribunal Officer नियुक्तीचा मोठा मार्ग मोकळा झाला आहे. नागपूर येथील विद्यापीठ व महाविद्यालय न्यायाधिकरण येथील पीठासीन अधिकारी पद गेल्या १८ महिन्यांपासून रिक्त होते. नागपूर विभाग शिक्षक मतदारसंघाचे आमदार सुधाकर अडबाले यांनी केलेल्या सततच्या पाठपुराव्यानंतर अखेर या जागेवर नियमित नियुक्ती करण्यात आली आहे. उच्च व तंत्रशिक्षण विभागाने याबाबतचा अधिकृत शासन निर्णय जारी केला आहे. (NHM कर्मचाऱ्यांना मुदतवाढ द्या – खासदार प्रतिभा धानोरकर)

Nagpur Tribunal Officer : १८ महिन्यांचा प्रदीर्घ खोळंबा अखेर संपला

महाराष्ट्र सार्वजनिक विद्यापीठ अधिनियम-२०१६ कलम ८१ अन्वये राज्यातील विद्यापीठ व महाविद्यालय न्यायाधिकरणेची स्थापना करण्यात आली आहे. सदर न्यायाधिकरणाची कार्यक्षेत्र ही विद्यापीठ व संलग्नीत खाजगी महाविद्यालयातील शिक्षक व शिक्षकेत्तर कर्मचारी यांच्या सेवाविषयक याचिका व अपील याचिका यांचा निपटारा करण्याची तरतुद विषद करण्यात आली आहे. परंतु, राष्ट्रसंत तुकडोजी महाराज विद्यापीठ नागपूर, संत गाडगे महाराज अमरावती विद्यापीठ अमरावती व गोंडवाना विद्यापीठ गडचिरोली कार्यक्षेत्रातील नागपूर स्थित विद्यापीठ व महाविद्यालय न्यायाधिकरण येथील पीठासीन अधिकारी दि. ३०/१०/२०२४ रोजी सेवानिवृत्त झाल्याने गेल्या १८ महिन्यांपासून नियमित अधिकारी नियुक्त केलेले नव्‍हते.

याबाबत अामदार सुधाकर अडबाले यांनी उच्च व तंत्रशिक्षण मंत्री श्री. चंद्रकांतदादा पाटील, सचिव श्री. रेड्डी यांच्याकडे सतत पत्र व्‍यवहार व प्रत्‍यक्ष भेटी घेऊन पाठपुरावा केला. त्‍यानंतर उच्च व तंत्र शिक्षण विभागाने पीठासीन अधिकारी पदावर न्‍यायमूर्ती श्रीमती मुकुलिका श्रीकांत जवळकर (मा. उच्च न्‍यायालय, मुंबई) यांची तीन वर्षांच्या कालावधीसाठी नियुक्‍ती करण्यात येत असल्‍याचा शासन निर्णय निर्गमित केला.

पिठासीन अधिकारी नियुक्‍त केल्‍यामुळे खाजगी महाविद्यालयातील शिक्षक व शिक्षकेत्तर कर्मचारी यांनी आमदार सुधाकर अडबाले यांचे आभार मानले आहे.