ब्रम्हपुरी: T120 Tigress Captured Brahmapuri दक्षिण ब्रम्हपुरी वनपरिक्षेत्रात सतत हल्ले करून दहशत निर्माण करणारी T-120 वाघीण जेरबंद करण्यात वनविभागाच्या पथकाला अखेर मोठे यश मिळाले आहे. २९ जुलै रोजी पार पडलेल्या या विशेष मोहिमेमुळे परिसरातील शेतकरी आणि ग्रामस्थांनी सुटकेचा निःश्वास सोडला आहे. त्यामुळे गेल्या अनेक दिवसांपासून या भागात पसरलेली भीती आता दूर झाली आहे. (हे हि वाचा – गुराख्यावर वाघाचा हल्ला, गुराखी जखमी)
रानभाजी तोडण्यासाठी गेलेल्या नागरिकावर केला होता हल्ला
ब्रम्हपुरी वनपरिक्षेत्रातील कुरण गट क्रमांक २१ मध्ये ९ जुलै रोजी एक अत्यंत दुर्दैवी घटना घडली होती. बल्लारपूर येथील रहिवासी अनिल भास्कर दिवटे (वय ३२) हे रानभाजी तोडण्यासाठी जंगलात गेले होते. दरम्यान, T-120 मादी वाघिणीने त्यांच्यावर अचानक हल्ला करून त्यांना ठार केले.
याशिवाय, या वाघिणीने यापूर्वीही अनेक माणसांवर जीवघेणे हल्ले केले होते. तसेच पाळीव प्राण्यांना शिकार बनवून गावात मोठी दहशत पसरवली होती. त्यामुळे शेतशिवारात जाणाऱ्या शेतमजुरांमध्ये आणि गावकऱ्यांमध्ये वनविभागाप्रती तीव्र संताप निर्माण झाला होता. परिणामी, वाढता मानव-वन्यजीव संघर्ष रोखण्यासाठी या वाघिणीला पकडणे अत्यंत गरजेचे झाले होते.
वनविभागाने आखली विशेष मोहीम
परिस्थितीचे गांभीर्य लक्षात घेऊन वनविभागाने तात्काळ शोध मोहीम सुरु केली. २९ जुलै रोजी आवळगाव उपक्षेत्रातील हळदा नियतक्षेत्रातील कक्ष क्रमांक २२२ मध्ये वाघिणीचे लोकेशन मिळाले. लोकेशन मिळताच वन कर्मचाऱ्यांनी तात्काळ त्या परिसराला वेढा घातला.
त्यानंतर ताडोबा-अंधारी व्याघ्र प्रकल्पाचे RRT प्रमुख डॉ. रविकांत खोब्रागडे यांनी बेशुद्धीकरणाचे औषध तयार केले. विशेष प्रशिक्षित पोलीस हवालदार व शूटर अजय सी. मराठे यांनी अत्यंत अचूकपणे डार्ट मारला. डार्ट लागताच काही वेळात वाघीण बेशुद्ध झाली. नंतर तिला सुरक्षितपणे पिंजऱ्यात जेरबंद करण्यात आले.
वरिष्ठ अधिकाऱ्यांच्या मार्गदर्शनात झाली कारवाई
ही धडक मोहीम उपवनसंरक्षक डॉ. कुमारस्वामी एस. आर. यांच्या प्रत्यक्ष मार्गदर्शनाखाली पार पडली. या मोहिमेत सहाय्यक वनसंरक्षक अरविंद जे., वनपरिक्षेत्र अधिकारी आकाश व्ही. सोनडवले आणि वन्यजीव तज्ज्ञ राकेश अहुजा यांनी मोलाचे योगदान दिले.
तसेच RRT पथकातील कर्मचारी विकास ताजने, योगेश लाकडे, प्रफुल वाटगुरे, गुरुनानक ढोरे, दिपेश टेंभुर्णे, वसीम शेख, अमोल कोरपे आणि अक्षय दांडेकर यांनी उत्तम कामगिरी बजावली. अखेर T-120 वाघीण जेरबंद झाल्यामुळे ब्रम्हपुरी परिसरातील तणाव आता पूर्णपणे निवळला आहे.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
