चंद्रपूर:(Warora Liquor Seizure) प्रकरणात चंद्रपूर स्थानिक गुन्हे शाखेच्या (LCB) वरोरा पथकाने मोठी कारवाई करत नंदोरी टी-पॉईंट परिसरातून ५.१५ लाख रुपयांचा मुद्देमाल जप्त केला आहे. या कारवाईत विदेशी दारूच्या २९ पेट्या, एक टोयोटा एटीओस कार आणि तीन मोबाईल फोन जप्त करण्यात आले. पोलिसांनी दोन आरोपींना अटक केली असून आणखी एक आरोपी फरार आहे. महाराष्ट्र दारूबंदी कायद्याअंतर्गत गुन्हा दाखल करण्यात आला असून वरोरा पोलीस पुढील तपास करत आहेत. (न्यायालयातून बाहेर पडताच पुन्हा ड्रग्सची विक्री, रामनगर पोलिसांची कारवाई)
जिल्ह्यात अवैध दारू तस्करांविरुद्ध स्थानिक गुन्हे शाखेने (LCB) आपली धडक मोहीम सुरूच ठेवली आहे. ३० जून २०२६ रोजी स्थानिक गुन्हे शाखा, चंद्रपूरच्या उपविभाग वरोरा पथकाला एका गोपनीय माहितीदाराकडून विश्वासार्ह माहिती मिळाली. या माहितीच्या आधारे पथकाने वरोरा पोलीस स्टेशनच्या हद्दीत येणाऱ्या मौजा नंदोरी टी-पॉईंट परिसरात सापळा रचला. या ठिकाणी अवैधरित्या विदेशी दारूची वाहतूक करणाऱ्या इसमांना रंगेहाथ पकडण्यासाठी पोलिसांनी छापा टाकला.
Warora Liquor Seizure प्रकरणात LCBची मोठी कारवाई
या यशस्वी छाप्यात पोलिसांनी दारूची अवैध वाहतूक करणारी एक पांढऱ्या रंगाची टोयोटा एटीओस जीडी (Toyota – Etios GD) कार क्रमांक MH 01 BT 1087 ताब्यात घेतली. कारची तपासणी केली असता त्यात मोठ्या प्रमाणावर विदेशी दारूचा साठा आढळून आला. यामध्ये पोलिसांना एकूण २९ पेट्या मिळून आल्या, ज्यात ७५० मिली क्षमतेच्या ३५३ विदेशी दारूच्या बाटल्या होत्या. या जप्त केलेल्या दारूची बाजारातील किंमत १ लाख ८३ हजार ८५८ रुपये आहे. तसेच वाहतुकीसाठी वापरलेली ३ लाख रुपयांची कार आणि आरोपींकडून ३० हजार रुपये किमतीचे तीन मोबाईल फोन जप्त करण्यात आले आहेत. पोलिसांनी या कारवाईत एकूण ५ लाख १५ हजार ८५८ रुपयांचा मुद्देमाल जप्त केला आहे. (शासकीय कामाचे आमिष दाखवीत कोट्यवधी रुपयांची फसवणूक, ५ जणांवर गुन्हे दाखल)
या प्रकरणी पोलिसांनी घटनास्थळावरून दोन आरोपींना ताब्यात घेतले आहे, ज्यांची नावे नरेंद्र जितेंद्र भाट (वय ३१ वर्षे) आणि सौ. दामिनी नरेंद्र भाट (दोघेही राहणार जलनगर, चंद्रपूर) अशी आहेत. या गुन्ह्यात आणखी एका आरोपीचा सहभाग समोर आला असून, सूर्या उर्फ सूरज परसंगे (रा. जलनगर, चंद्रपूर) असे त्याचे नाव असून तो सध्या फरार आहे. पोलीस त्याचा शोध घेत आहेत.
याप्रकरणी वरोरा पोलीस ठाण्यात आरोपींविरुद्ध महाराष्ट्र दारूबंदी कायद्याच्या कलम ६५ (ई)(अ) आणि ८३ अन्वये गुन्हा दाखल करण्यात आला आहे. सदरची धडक कारवाई स्थानिक गुन्हे शाखा, चंद्रपूरच्या उपविभाग वरोरा पथकाने यशस्वीरीत्या पार पाडली असून पुढील तपास वरोरा पोलीस करीत आहेत.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
