मूल : Mul House Theft प्रकरणामुळे चंद्रपूर जिल्ह्यातील मूल शहरात पुन्हा एकदा सुरक्षेचा प्रश्न ऐरणीवर आला आहे. श्रमिकनगर परिसरातील एका शिक्षकाच्या बंद घरात अज्ञात चोराने घरफोडी करून सोन्याचे दागिने चोरून नेल्याची घटना उघडकीस आली आहे. कुटुंब गावाला गेले असताना चोराने घराचे कुलूप तोडून कपाटातील दागिन्यांवर हात साफ केला. या प्रकरणी मूल पोलिसांनी अज्ञात आरोपीविरुद्ध गुन्हा दाखल करून तपास सुरू केला आहे. (कंत्राटदाराच्या वाहनातून १ लाखांची रोकड लंपास)
चंद्रपूर जिल्ह्यातील मूल पोलीस ठाण्याच्या हद्दीत येणाऱ्या श्रमिकनगर परिसरात एका शिक्षकाचे बंद घर फोडून अज्ञात चोराने सोन्याच्या दागिन्यांसह ४८ हजार रुपयांचा ऐवज लंपास केल्याची घटना उघडकीस आली आहे. या प्रकरणी मूल पोलिसांनी अज्ञात आरोपीविरुद्ध गुन्हा दाखल केला असून शहरात पुन्हा एकदा चोरांनी उच्छाद मांडल्याने नागरिकांमध्ये चिंतेचे वातावरण पसरले आहे.
Mul House Theft प्रकरणामुळे मूल शहरात खळबळ
या घटनेबाबत पोलिसांकडून मिळालेल्या सविस्तर माहितीनुसार, मूल येथील चौकुडे हेटी (श्रमिकनगर) वॉर्ड क्रमांक ८ मधील रहिवासी लालाजी पांडुरंग बावणे (वय ४७) हे Set ॲन्स हायस्कुल मूल येथे मागील २५ वर्षांपासून कला शिक्षक म्हणून कार्यरत आहेत. ते आपल्या कुटुंबासह या भागात राहतात. शिक्षक लालाजी बावणे हे ७ जून २०२६ रोजी सकाळी साडेआठ वाजताच्या सुमारास आपली पत्नी ज्योती आणि मुलगी यांच्यासह चिमूर तालुक्यातील लोहारा या आपल्या बहिणीच्या गावी गेले होते.
बहिणीकडे जाण्यापूर्वी त्यांनी आपल्या घराच्या मुख्य दरवाजाला कुलूप लावले होते. बावणे यांच्या घराच्या खिडक्यांना पल्ले नसल्यामुळे त्यांनी तिथे तात्पुरत्या स्वरूपात टिन लावले होते. दरम्यान, ७ जूनच्या सकाळपासून ते ९ जूनच्या सकाळी साडेनऊ वाजेपर्यंत घर बंद असल्याचा फायदा घेत अज्ञात चोराने घराचा मुख्य दरवाजा गाठला.
आज, ९ जून रोजी सकाळी साडेनऊ वाजताच्या सुमारास लालाजी बावणे हे आपल्या कुटुंबासह बहिणीच्या गावरून परत आले. घरी आल्यावर मुख्य दरवाजाचे कुलूप उघडण्यासाठी गेले असता, त्यांना दरवाजाला कुलूप दिसले नाही आणि केवळ कडी लावलेली आढळली. यामुळे संशय आल्याने त्यांनी कडी उघडून घरात प्रवेश केला असता, बेडरूममधील दृश्य पाहून त्यांना धक्काच बसला. घरातील लोखंडी कपाट उघडून आतील कपडे आणि प्लास्टिकचे डबे संपूर्ण खोलीत अस्ताव्यस्त फेकलेले होते. कपाटातील साहित्याची तपासणी केली असता, प्लास्टिकच्या डब्यात ठेवलेले सोन्याचे दागिने गायब असल्याचे त्यांच्या निदर्शनास आले.
चोराने डब्यातून २४ हजार रुपये किमतीची ३ ग्रॅम वजनाची जुनी वापरती सोन्याची नथ, १६ हजार रुपये किमतीचे २ ग्रॅम वजनाचे सोन्याचे डोरले व मणी, आणि ८ हजार रुपये किमतीचा १ ग्रॅम वजनाचा सोन्याचा शिक्का असा एकूण ४८ हजार रुपये किमतीचा मुद्देमाल लंपास केल्याचे स्पष्ट झाले.
घरात चोरी झाल्याची खात्री पटल्यानंतर लालाजी बावणे यांनी तातडीने मूल पोलीस ठाणे गाठून घडलेल्या प्रकाराबाबत तोंडी तक्रार नोंदवली. त्यांच्या तक्रारीवरून मूल पोलिसांनी अज्ञात चोराविरुद्ध भारतीय न्याय संहिता (BNS), २०२३ च्या कलम ३०५, ३३१(३) आणि ३३१(४) अन्वये घरफोडी आणि चोरीचा गुन्हा दाखल केला आहे. या प्रकरणाची गंभीर दखल घेत मूल पोलीस ठाण्याचे प्रभारी अधिकारी तथा पोलीस निरीक्षक विजय रामकृष्ण राठोड यांच्या मार्गदर्शनात तपास चक्रे फिरवण्यात आली असून, घटनेचा पुढील तपास पोलीस उपनिरीक्षक रुपेश पुंडलिक कुंभारे यांच्याकडे सोपवण्यात आला आहे.
