ओडिशामधून बल्लारपुरात आला ५ किलो गांजा; स्थानिक गुन्हे शाखेकडून एकाला अटक

बल्लारपूर – बल्लारपूर गांजा जप्त प्रकरणी चंद्रपूर स्थानिक गुन्हे शाखेने १९ ऑक्टोबर २०२६ रोजी कारवाई केली. बामणी-बल्लारपूर मार्गावर पथकाने एकाला ताब्यात घेतले. पोलिसांनी सांगितल्यानुसार, त्याच्याकडून ५.०३३ किलो गांजा, मोबाईल आणि रोख रक्कम जप्त झाली. एकूण मुद्देमाल २ लाख ७२ हजार १८० रुपयांचा आहे. या प्रकरणी बल्लारपूर पोलीस ठाण्यात एनडीपीएस कायद्यानुसार गुन्हा दाखल आहे. (भद्रावती शहरात लाखोंचा सुगंधित तंबाखू जप्त, वाचा हि बातमी)

चंद्रपूर जिल्ह्यात अवैध अंमली पदार्थ तस्कराविरोधात स्थानिक गुन्हे शाखेने मोठी धडक कारवाई करत बल्लारपूर येथे अडीच लाखांहून अधिक मूल्याच्या गांजासह एका तस्कराला अटक केली. युवा पिढीला अमली पदार्थांच्या विळख्यातून मुक्त करण्यासाठी आणि अवैध व्यवसायांवर अंकुश ठेवण्यासाठी चंद्रपूर पोलीस दलाकडून सातत्याने कडक पावले उचलली जात असतानाच ही यशस्वी कामगिरी करण्यात आली आहे.

बल्लारपूर गांजा जप्त: नाकाबंदीत एक ताब्यात

प्राप्त माहितीनुसार, दिनांक १९ ऑक्टोबर २०२६ रोजी स्थानिक गुन्हे शाखेचे पथक चंद्रपूर जिल्ह्यात कायदा व सुव्यवस्थेच्या अनुषंगाने गस्तीवर असताना, राजुराकडून बामणी मार्गाने एक इसम मोठ्या प्रमाणात गांजा विक्रीच्या उद्देशाने चंद्रपूरच्या दिशेने घेऊन येत असल्याची अत्यंत खात्रीशीर गोपनीय माहिती मिळाली होती. या माहितीच्या आधारे वरिष्ठ अधिकाऱ्यांच्या मार्गदर्शनाखाली स्थानिक गुन्हे शाखेच्या पथकाने बामणी-बल्लारपूर मार्गावरील वेलकम बल्लारशा गेटजवळ अत्यंत कौशल्याने रणनीतिक सापळा रचून नाकाबंदी केली. यादरम्यान, वर्णनानुसार एक संशयित इसम पाठीवर राखाडी रंगाची बॅग घेऊन बल्लारपूरच्या दिशेने चालत येताना दिसताच, पोलिसांनी त्याला तातडीने चारी बाजूंनी घेराव घालून ताब्यात घेतले.

चौकशीदरम्यान पकडलेल्या आरोपीने आपले नाव राज तोताराम कोरडे (मूळ रा. अडपल्ली चेक, ता. मुलचेरा, जि. गडचिरोली, सध्या रा. इंदिरानगर, चंद्रपूर) असल्याचे सांगितले. एन.डी.पी.एस. कायद्याच्या तरतुदींचे तंतोतंत पालन करत शासकीय पंच, राजपत्रित अधिकारी आणि अधिकृत वजन-मापकाच्या समक्ष आरोपीच्या पाठीवरील बॅगेची झडती घेण्यात आली. यावेळी बॅगेमध्ये तपकिरी रंगाच्या पॅकिंग टेपने पूर्णपणे गुंडाळलेले एक संशयित पार्सल आढळले, जे पंचासमक्ष उघडून पाहिल्यानंतर त्यामध्ये सुका अंमली पदार्थ म्हणजेच गांजा असल्याचे निष्पन्न झाले.

बॅगेत सापडले ५ किलोहून अधिक गांजा

पोलिसांनी केलेल्या या कारवाईत ५.०३३ किलोग्रॅम गांजा, मोबाईल फोन आणि रोख रकमेसह एकूण २ लाख ७२ हजार १८० रुपयांचा मुद्देमाल जप्त केला आहे. प्राथमिक तपासात आरोपीने हा गांजा स्वतःच्या आर्थिक फायद्यासाठी थेट ओडिशा राज्यातून अवैध मार्गाने आणल्याची कबुली दिली आहे. या प्रकरणी बल्लारपूर पोलीस ठाण्यात अमली पदार्थ व मनोव्यापारावर परिणाम करणारे पदार्थ अधिनियम (एनडीपीएस ॲक्ट), १९८५ अंतर्गत गुन्हा दाखल करण्यात आला असून, या आंतरराज्यीय तस्करीत आणखी कोणाकोणाचा सहभाग आहे, यादृष्टीने पोलिसांनी सखोल तपास सुरू केला आहे.

सदर यशस्वी कारवाई पोलीस अधीक्षक श्री. आयुष नोपानी आणि अपर पोलीस अधीक्षक श्री. ईश्वर कातकडे यांच्या मार्गदर्शनाखाली स्थानिक गुन्हे शाखेचे पोलीस निरीक्षक अमोल काचोरे यांच्या नेतृत्वात सहाय्यक पोलीस निरीक्षक योगेश हिवसे, पोलीस उपनिरीक्षक विनोद भुरले, पोलीस उपनिरीक्षक सुनील गौरकार तसेच पोलीस अंमलदार सतीश अवथरे, लालू यादव, इम्रान खान, संदीप कांबळे, हिरालाल गुप्ता, किशोर वाकाटे, शशांक बदामवार आणि सायबर पोलीस स्टेशनचे अंमलदार यांनी पार पाडली आहे.