शाळेची लेट फी पालकांना आर्थिक भुर्दंड? मनसे आक्रमक

चंद्रपूर: खासगी शाळा लेट फीच्या कथित मनमानी आकारणीचा मुद्दा चंद्रपूर जिल्ह्यात चर्चेत आला आहे. शैक्षणिक शुल्क भरण्यास उशीर झाल्यास काही शाळांकडून अवाजवी विलंब शुल्क आकारले जात असल्याचा आरोप महाराष्ट्र नवनिर्माण विद्यार्थी सेनेने केला आहे. या प्रकाराची शिक्षण विभागाने चौकशी करावी, अशी मागणी जिल्हा उपाध्यक्ष कुलदीप चंदनखेडे यांनी केली आहे. शाळांनी शुल्काचे नियम पालकांसमोर स्पष्ट करावेत, असेही संघटनेचे म्हणणे आहे. नियमांचे उल्लंघन आढळल्यास संबंधित शाळांवर कारवाई करावी, अशी मागणी करण्यात आली आहे.

चंद्रपूर जिल्ह्यातील काही खाजगी शाळांकडून शैक्षणिक शुल्क उशिरा भरल्यास पालकांकडून लेट फीच्या नावाखाली अवाजवी व मनमानी शुल्क आकारले जात असल्याचा गंभीर प्रकार समोर आला आहे. या मनमानी कारभाराबाबत महाराष्ट्र नवनिर्माण विद्यार्थी सेनेचे जिल्हा उपाध्यक्ष कुलदीप चंदनखेडे यांनी तीव्र चिंता व्यक्त केली असून, अशा प्रकारच्या शुल्क आकारणीची योग्य तपासणी करून पालकांवर पडणारा अतिरिक्त आर्थिक भार कमी करण्यासाठी संबंधित शिक्षण विभागाने तातडीने लक्ष घालावे, अशी ठाम मागणी केली आहे. (वाघाच्या दहशतीत चंद्रपूर जिल्हा, वाचा बातमी)

चंद्रपुरात खासगी शाळा लेट फीचा मुद्दा ऐरणीवर

आजच्या वाढत्या महागाईच्या काळात अनेक पालक आपल्या मुलांच्या उत्तम शिक्षणासाठी अहोरात्र आर्थिक नियोजन करून कसेबसे शाळेचे शुल्क भरत असतात. मात्र, काही अपरिहार्य कारणांमुळे शुल्क भरण्यास थोडा उशीर झाल्यास शाळा प्रशासनाकडून पालकांच्या मजबुरीचा गैरफायदा घेत भरमसाठ अतिरिक्त लेट फी आकारली जात असल्याच्या अनेक तक्रारी पालकांकडून समोर येत आहेत. आधीच विविध आर्थिक अडचणींचा सामना करणाऱ्या सर्वसामान्य पालकांवर या अतिरिक्त लेट फीमुळे भुर्दंड पडत असून नाहक आर्थिक ताण सहन करावा लागत आहे. शिक्षण हा प्रत्येक बालकाचा मूलभूत व महत्त्वाचा हक्क असताना, केवळ शुल्क भरण्यास काहीसा विलंब झाला म्हणून पालकांना अशा प्रकारे अनावश्यक आर्थिक त्रासाला सामोरे जावे लागणे चुकीचे असल्याचे मनसेचे म्हणणे आहे.

शिक्षण विभागाकडे मनसेच्या प्रमुख मागण्या

या संपूर्ण प्रकरणाची दखल घेत महाराष्ट्र नवनिर्माण विद्यार्थी सेनेच्या वतीने शिक्षण विभागाच्या अधिकाऱ्यांनी जिल्ह्यातील खाजगी शाळांकडून आकारण्यात येणाऱ्या या विलंब शुल्काची सखोल तपासणी करावी, सर्व शाळांनी स्वतःचे शुल्क आकारणीचे नियम व अटी पालकांसमोर पारदर्शकपणे स्पष्ट कराव्यात आणि शासनाच्या लागू नियमांचे उल्लंघन होत असल्याचे निदर्शनास आल्यास संबंधित दोषी शाळांवर योग्य ती कायदेशीर कारवाई करण्यात यावी, अशी जोरदार मागणी करण्यात आली आहे. यासंदर्भात मनसेच्या वतीने काही प्रमुख मागण्याही मांडण्यात आल्या असून, खाजगी शाळांमधील मनमानी व अवाजवी लेट फी आकारणीच्या तक्रारींची तातडीने चौकशी करण्यात यावी,

नियमांचे उल्लंघन करून पालकांकडून वसूल केले जाणारे अतिरिक्त शुल्क तात्काळ थांबवले जावे, शाळांनी विलंब शुल्काबाबतचे सर्व नियम, अटी व शुल्क रचनेचा तपशील पालकांना स्पष्टपणे कळवावा, चुकीच्या पद्धतीने अतिरिक्त शुल्क आकारल्याचे आढळल्यास नियमानुसार कडक कारवाई व्हावी आणि पालकांना आपल्या तक्रारी सुलभतेने नोंदविण्यासाठी शिक्षण विभागाने एक प्रभावी यंत्रणा किंवा व्यवस्था उपलब्ध करून द्यावी, अशा मागण्यांचा समावेश आहे.

शिक्षण विभागाने या गंभीर प्रकरणाकडे गांभीर्याने लक्ष देऊन लवकरात लवकर पालकांना योग्य तो दिलासा द्यावा, तसेच विद्यार्थ्यांचे हित आणि पालकांची आर्थिक बाजू लक्षात घेऊन प्रशासनाने तातडीने पावले उचलली पाहिजेत. जर या मनमानी व अवाजवी शुल्क आकारणीबाबत योग्य ती कायदेशीर कारवाई करण्यात आली नाही, तर येत्या काळात महाराष्ट्र नवनिर्माण विद्यार्थी सेनेच्या वतीने तीव्र स्वरूपात लोकशाही मार्गाने आंदोलन छेडण्यात येईल, असा सज्जड इशारा जिल्हा उपाध्यक्ष कुलदीप चंदनखेडे यांनी दिला आहे. या संपूर्ण घडामोडीदरम्यान किशोर मडगुलवार, जिल्हा सचिव रमेश काडबांदे, जिल्हा अध्यक्ष जनहित प्रवीण शेवते, तालुका उपाध्यक्ष शुंभम वांढरे आणि शहर उपाध्यक्ष फिरोज पठाण यांच्यासह अनेक प्रमुख मनसैनिक मोठ्या संख्येने उपस्थित होते.