चंद्रपूर – Chandrapur Raghuvanshi Complex Fire वर चंद्रपूर शहर महानगरपालिकेच्या विविध विभागांनी ३० तासांहून अधिक प्रयत्नांनंतर नियंत्रण मिळवले आहे. रघुवंशी कॉम्प्लेक्समध्ये रात्रीच्या सुमारास ही आग लागली होती. सुमारे ५० दुकानांचा हा संपूर्ण कॉम्प्लेक्स धोक्यात असताना आग एकाच दुकानापुरती मर्यादित ठेवण्यात यश आले. अग्निशमन विभागातील सुमारे ३० अधिकारी-कर्मचारी बचावकार्यात सहभागी होते. आग आटोक्यात आल्यानंतर मनपाने २२ आस्थापनाधारकांना नोटिसा बजावल्या आहेत. मेसर्स इंडियन मेडिकल एजन्सी यांच्याविरुद्ध आपत्ती व्यवस्थापन अधिनियम, २००६ अंतर्गत गुन्हा दाखल करण्याची कार्यवाही सुरू असल्याची माहिती मनपाने दिली आहे. (अवैध दारूचा विळखा कारवाई करा, वाचा हि बातमी)
Chandrapur Raghuvanshi Complex Fire: ३० तासांनंतर आग नियंत्रणात
या बचावकार्यात अग्निशमन विभागातील सुमारे ३० अधिकारी-कर्मचाऱ्यांनी धाडसाने व सातत्याने कार्य केले. श्री. राहुल पंचबुद्धे व श्री. चिवंडे यांनी जोखमीच्या परिस्थितीत प्रत्यक्ष घटनास्थळी उल्लेखनीय कामगिरी बजावली. अतिक्रमण विभागाचे श्री. मनीष शुक्ला व त्यांच्या पथकाने घटनास्थळी परिस्थिती नियंत्रणात ठेवण्यासाठी सातत्याने कार्य केले. यांत्रिकी विभागाचे श्री. चेतन्य चौरे यांनी अग्निशमन वाहनांसाठी पाण्याचा अखंड पुरवठा सुनिश्चित केला. विद्युत विभागाच्या प्रगती भुरे यांनी रात्रीच्या बचावकार्यासाठी हॅलोजन लाईट्सची व्यवस्था केली. आग आटोक्यात आल्यानंतर स्वच्छता विभागाचे श्री. गर्गेलवार व त्यांच्या पथकाने जळालेला कचरा व साहित्य तातडीने हटविले.
भंडारपाल विभागातील श्री. अहेमद सिद्धिकी यांनी बचावकार्यात सहभागी अधिकारी-कर्मचाऱ्यांसाठी भोजन, नाश्ता व आवश्यक व्यवस्था उपलब्ध करून दिली. तसेच DDMO श्री. सलीम शेख यांनी घटनास्थळी प्रत्यक्ष उपस्थित राहून बचावकार्याला सक्रिय सहकार्य केले.
दरम्यान, आग नियंत्रणात आल्यानंतर रघुवंशी कॉम्प्लेक्समधील २२ आस्थापनाधारकांना मनपातर्फे नोटिसा बजावण्यात आल्या असून, नियमानुसार पुढील कार्यवाही सुरू करण्यात आली आहे. तसेच आगीच्या घटनेप्रकरणी संबंधित मेसर्स इंडियन मेडिकल एजन्सी यांच्याविरुद्ध आपत्ती व्यवस्थापन अधिनियम, २००६ अंतर्गत गुन्हा दाखल करण्याची कार्यवाही करण्यात येत असून, नियमानुसार दंडात्मक कारवाईदेखील करण्यात येत आहे. संबंधित प्रकरणात आवश्यक ती सर्व कायदेशीर व प्रशासकीय कार्यवाही नियमानुसार करण्यात येत आहे.
मा. आयुक्त श्री. अकुनूरी नरेश यांच्या मार्गदर्शनाखाली सर्व विभागप्रमुख व अधिकारी-कर्मचाऱ्यांनी समन्वयाने एकत्रितपणे काम करत मोठी दुर्घटना टाळण्यात महत्त्वाची भूमिका बजावली.
प्रकाश हांडे हे News34.in चे संपादक असून चंद्रपूर, गडचिरोली व विदर्भातील राजकारण, गुन्हेगारी, सामाजिक आणि स्थानिक घडामोडींवर वृत्तांकन करतात. पत्रकारिता क्षेत्रातील अनेक वर्षांचा अनुभव असून ते डिजिटल न्यूज आणि तपास वृत्तांकनात सक्रिय आहेत.
